ပ္ဍဲတွဵုရးဍုၚ်မန် ထပ်ပံက်တန်ဗ္တောန်ကွတ်ပၞာန် လၟေၚ် (၄)

မတ်မလီု၊ အဝ်ဂါတ် ၂

ဒပ်ကံၚ်ဇြဳပၞာန် ဒးဂိဇီုကပိုက်ချိုတ်ဂၠိုၚ်ဒၟံၚ် အပ္ဍဲပရေၚ်ပၞာန်ရးသေံ−မာန္တလေဝ်ဂှ်ဝွံ ပ္ဍဲတွဵုရးဍုၚ်မန်ဂှ် ထပ်ကော်ဒၟံၚ် တန်ဗ္တောန်ကွတ်ပၞာန် လၟေၚ် ၄ ရောၚ် ဂွံတီကေတ် အတိုၚ်လိက်ပရိုၚ်တြးဝါဒ လလောၚ်ပ္တိတ်လဝ် ပ္ဍဲဂိတုဂျူလာၚ် ၃၁ တေံရ။

အတိုၚ်လိက်ပရိုၚ်တြးဝါဒ ကံၚ်ဇြဳပၞာန် ထ္မံက်ထ္ၜးလဝ်တံဂှ်မ္ဂး ကုညးမတိုန်စိုပ် တန်ဗ္တောန်ကွတ်ပၞာန် လၟေၚ် ၄ တံဂှ် ဂကောံသ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် သ္ကိုပ်သ္ကဂှ် အာစိုပ်ဆဵုဂဗလဝ် ပ္ဍဲကဵုဘာတန်ဗ္တောန်ဒေသ နွံလ္တူဍုၚ်မတ်မလီုတံဂှ်တုဲ ထံက်ပၚ်ကဵုလဝ်သြန်ရ။

ဆ္ဂး တန်ဗ္တောန်ကွတ်ပၞာန် လၟေၚ် ၄ ဏံဂှ် လၟိဟ်မၞိဟ်မူစိ တိုန်စိုပ်ရောဂှ်ကီု၊ ဖျေံအာကွတ်ပၞာန် ပ္ဍဲဘာတန်ဗ္တောန်လဵုရောဂှ်ကီု တၚ်နၚ်ဗွဲလစှ်ေတံဂှ် ထ္မံက်ထ္ၜးလဝ် ဟွံမွဲရ။

အတိုၚ်ဂလာန်ညးဒေသ ဟွံမိက်ထ္မံက်ယၟုမွဲတၠဂှ်မ္ဂး သွက်ဂွံယိုက်လျိုၚ်ပၞာန်ဂှ် သ္ကိုပ်အုပ်ဓုပ်ကွာန်အရာပ်တံကဵု က္ဍိုပ်သ္ၚိကၠံတံ ဗက်ကံက်ဒၟံၚ်သြန် အပ္ဍဲအရာပ်တံတုဲ လိၚ်ကေတ်တုဲ ကဵုလုပ်မံၚ်ပၞာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အဏံဂှ် နူသ္ကိုပ်အုပ်ဓုပ်ကွာန်အရာပ် က္ဍိုပ်သ္ၚိကၠံတံ သ္ကိုပ်အုပ်ဓုပ်တံဂှ် ကံက်ဒၟံၚ်လှုဲ သ္ၚိလှုဲနွံလ္ၚဵုတံဂှ်ရ။ တုဲတှ်ေ ထ္ပက်အဇာ လိၚ်ကဵုဂှ်နွံ။ ကဵုလှုဲ ကဵုရဲဒေသတၞဟ်ဟ်တံဂှ်တုဲ ကဵုလုပ်စၞးရ” သာ်ဝွံ သ္ဂးရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်တန်ဗ္တောန်ကွတ်ပၞာန်တံဂှ် ကဵုသ္ကိုပ်အုပ်ဓုပ်ကွာန်အရာပ်တံ ကံက်စရၚ် ပ္ကောံပ္ကေဝ်ဒၟံၚ်တံ နွံတုဲ လ္ၚဵုတံဂှ်တှ်ေ ရပ်ဒက်ဗွဲအနိၚ်အထက်တုဲ ပ္ကောံပ္ကေဝ်ဒၟံၚ်ကောန်ပၞာန်တံ နွံလဝ်ရ။

သ္အာၚ်နူဂှ်ပၠန် သွက်ဂွံလုပ်ယိုက်လျိုၚ်ပၞာန်ဂှ် သ္ကိုပ်အုပ်ဓုပ်ကွာန်အရာပ်တံ ထ္ပက်အဇာ ကုညးဒိုက်ဝါတ်တံ ပါလုပ်သီုကဵုကောန်ကလောန်ဆုဲပြံၚ်တံတုဲ မွဲတၠမ္ဂး နူ ၃၀ ကိုဋ်ဒ္ကေဝ် စဵုကဵု ၅၀ ကိုဋ်ဒ္ကေဝ် ကဵုတုဲ ကဵုယိုက်ဒၟံၚ်လျိုၚ်ပၞာန်တံ နွံဒၟံၚ်ရ။

ညးဒုၚ်တာလျိုၚ် ခရိုၚ်သဓီု PDF ကိုဝ်အေမေန်ထောန်ဂှ်တှ်ေ ပ္ဍဲကဵုညးယိုက်လျိုၚ်ပၞာန်တံဂှ် ရဲဒးဒၟံၚ်ထံၚ် နကဵုဂဗုတ်ကၠတ်ဂၠံက် ပါလုပ်သီုကဵု ဂဗုတ်ဂဥုဲၜူမာဲတံဂှ်လေဝ် ကဵုတန်ဗ္တောန်တုဲ ဗလးဒၟံၚ်မုက်ပၞာန်တေံဂှ် ဂွံဆဵုကၠုၚ်ရောၚ် ဟီုရ။

“ ရဲဒးဒၟံၚ်ထံၚ် နကဵုဂဗုတ်ဂဥုဲၜူမာဲတံ နကဵုဂဗုတ်ကၠတ်ဂၠံက်တံဂှ် ပ္တိတ်တုဲ စုတ်ဒၟံၚ်ပ္ဍဲဒပ်ဍေံတံရ။ ကဵုတန်ဗ္တောန်တုဲ ဗလးဒၟံၚ် မုက်ပၞာန်တေံရ။ ကောန်ဒပ်သၟဝ်တဲကံၚ်ဇြဳပၞာန် ရပ်စပ်ဒၟံၚ်ဂဥုဲၜူမာဲတံဂှ်လေဝ် ရပ်ဂွံဒၟံၚ်နွံရ” သာ်ဝွံ သ္ဂးရ။

အတိုၚ်လိက်ကံက်ကပှ်တၚ်နၚ် ဇြဟတ်ရာမညဖေဝ်ဒရာခေတ်တၟိ NRFF မလလောၚ်ပ္တိတ်လဝ် ပ္ဍဲဂိတုဂျောန် ၁၈ တေံဂှ်မ္ဂး ပ္ဍဲတွဵုရးဍုၚ်မန် သွက်တန်ဗ္တောန်ကွတ်ပၞာန် လၟေၚ် (၁) ဂှ် ဒးဒုၚ်ပ္ကောံလဝ် ၂၀၀ တၠပြၚ်တုဲ သွက်လၟေၚ် (၂) ဂှ် ဟွံအောန်နူကဵု ၄၀၀ တၠ နွံလဝ်ရ။

သ္အာၚ်နူဂှ်ပၠန် သွက်တန်ဗ္တောန်ကွတ်ပၞာန် လၟေၚ် (၃) ဂှ် ပ္ဍဲတွဵုရးဍုၚ်မန် မၞိဟ်တၟိတၟိ ဒးဒုၚ်ပကောံပကောန်ပၞာန်ဂှ်တှ်ေ ၁၆၅ တၠ နွံရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။

ကောန်တန်ဗ္တောန် ဒးဒုၚ်ပကောံလဝ်တံဂှ် ကဵုတိုန်စိုပ်လဝ်တန်ဗ္တောန် နဒဒှ်ကောန်ဒပ် ပ္ဍဲကဵုဘာတန်ဗ္တောန်ဒပ်ပၞာန် တကက−၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ်ကဵု ဘာတန်ဗ္တောန်ပ္ကတ်ပ္ကေၚ်ကွတ်ပၞာန်သ္ဇိုၚ် စၟတ် ၉ ဖျေံသ္ဇိုၚ်ပွိုၚ်ဍုၚ်သဓီုဂှ်ရ။

အတိုၚ်လိက်ဒုၚ်စဳရေၚ် ဂကောံမၚ်လ္ၚတ် ကေၚ်ကာဍုၚ်ဗၟာ ကေုာံ ပဋိပက္ခ BACS ဂှ်မ္ဂး ဒပ်ကံၚ်ဇြဳပၞာန် ဒးဆောံလေၚ်ဒၟံၚ်ဇြဟတ်ဒပ်ဂှ်ဝွံ သွက်တန်ဗ္တောန်ကွတ်ပၞာန် လၟေၚ် ၁ ကဵု လၟေၚ် ၂ ဂှ် ပံက်လဝ်တန်ဗ္တောန် ၂၁ ဘာတုဲ ပကောံဂွံလဝ်ကောန်ပၞာန် ဗ္ဒါဲ ၉၀၀၀ ပြၚ်ရ။

ပရိုၚ်−သြၚ်လောန်တိုၚ်(မ်)

ဗီု−MOI