တာကာ၊ အဝ်ဂါတ် ၂
သၞောတ်ပါ်ပရအ်ကမၠောန်အလဵုအသဳခလပ်ဆ မက္တဵုဗဒှ်လဝ် ပရေၚ်ဟွံညိၚ်ဝတ်တုဲ အလုံဍုၚ်မွဲ မၞိဟ်ဒးချိုတ်အာလဝ် နွံဂှ် က္ဍိုပ်သ္ကိုပ်ကွးဘာထ္ၜးဆန္ဒဒစဵုဒစးသၞောတ်ဏံ တြဴတၠဂှ် ပ္ဍဲဂိတုအဝ်ဂါတ် ၁ တေံ ဒပ်ဗၠာဲသၟိၚ်ဗေန်ဂလာန်ဒေတ် ကလေၚ်ဗလးကဵုလဝ်ရ။
အခိၚ်အလဵုအသဳ ပ္တိတ်ဒၟံၚ်ဇြဟတ် သွက်ဂွံဖအောန်ဖျေံ ပရေၚ်ကြံၚ်မ္ၚိုဟ် ကေုာံ သွက်ဂွံဒစးဒုၚ်ကာစဵုဒၞါ ညံၚ်ပေါဲထ္ၜးဆန္ဒတံ ဟွံဂွံဒှ်ဂှ် ကလေၚ်ဗလးကဵုလဝ် က္ဍိုပ်သ္ကိုပ်ကွးဘာတံဂှ်ရ။
ဂကောံကွးဘာဒစဵုဒစး ပရေၚ်ပါ်ကဆံၚ်တံဂှ် ပ္ဍဲဂိတုတုဲကၠုၚ်တေံ ကၠောန်သ္ပလဝ် ပေါဲထ္ၜးဆန္ဒ အလုံဍုၚ်မွဲကီုလေဝ် ဒးဒုၚ်ပါ်ထ္ကးလဝ် ကုဒပ်ဗၠာဲသၟိၚ်ရ။
အပ္ဍဲပရေၚ်ဟွံညိၚ်ဝတ်ဏံ လၟိဟ်မၞိဟ် ၂၀၆ တၠ ဟွံအောန် ဒးချိုတ်အာလဝ်ဂှ် ဌာန်ပရိုၚ် AFP နိဿဲကေတ် စရၚ်အၚ်ရုၚ်ဂဥုဲ ကေုာံ ဒပ်ဗၠာဲသၟိၚ်တံဂှ်တုဲ ထ္မံက်ထ္ၜးလဝ်ရ။
အပ္ဍဲကာလပရေၚ်အုပ်ဓုပ် သ္ကိုပ်ဝန်ဇၞော် ယှုက်ဟာသဳနာ ပွိုၚ် ၁၅ သၞာံဏံ ပေါဲထ္ၜးဆန္ဒဇၞော်ကဵုဇြဟတ် က္တဵုဒှ်လဝ်တုဲဂှ် ဒပ်ဗၠာဲသၟိၚ် ရပ်ဒက်လဝ် လၟိဟ်မၞိဟ်ဂၠိုၚ်ကဵုလ္ၚီ ပါလုပ်သီုကဵု က္ဍိုပ်သ္ကိုပ်ဂကောံကွးဘာ ထ္ၜးဆန္ဒတံဏံဂှ်ရ။
ကုက္ဍိုပ်သ္ကိုပ်ကွးဘာ နာဟေသ် အေဿလာမ် ကေုာံ ကွးဘာတၞဟ်ဟ်ၜါတၠဂှ် ပ္ဍဲဂိတုဂျူလာၚ် ၂၆ တေံ ထံၚ်ပရိုၚ်နကဵုကယျိုၚ်အရာပ်တံ ကဵုစှ်ေလဝ် နူကဵုရုၚ်ဂဥုဲ ဍုၚ်တာကာ ဗွဲအနိၚ်အပိုၚ်တုဲ ကော်ဏာလဝ် ဒၞါဲလဵုရောဟီုဂှ် ဟွံဂွံတီကေတ်ပုဟ်ဂှ် သ္ဂးရ။
ပ္ဍဲဂိတုအဝ်ဂါတ် ၁ အခိၚ်လဒေါဝ်တ္ၚဲဂှ် နာဟေတ် ဒဒှ်ရစိုပ်ကၠုၚ်လဝ်သ္ၚိဂှ် ညးမဒှ်အပါဂှ် သ္ပဒတန်လဝ်ကီုလေဝ် သောဲသောဲဗြောဲဗြောဲဂှ် ဟွံဟီုလဝ်ရ။
မၞိဟ်တၞဟ်ဟ် ထိၚ်လဝ် ပိတၠပၠန်ဂှ်လေဝ် ဒဒှ်ရထိၚ်လဝ်ညးတံ သွက်ဂွံဗၠးဘဲဏောၚ် အလဵုအသဳ ဟီုလဝ်ရ။
က္ဍိုပ်သ္ကိုပ်ကွးဘာ သီုတြဴတၠဂှ်ဝွံ နကဵုဆန္ဒညးတံ ကၠုၚ်စိုပ်ဒုၚ်ရပ်လဝ် ဇရေၚ်ဒပ်ဗၠာဲသၟိၚ်ဂှ် ဝန်ဇၞော်သၞောဝ်ဓဝ် အနဳသူ ဟုသ် ဟီုလဝ် ပ္ဍဲဂိတုအဝ်ဂါတ် ၁ ဂှ်ရ။
ပ္ဍဲဍုၚ်ဗေန်ဂလာန်ဒေတ် လၟိဟ်မၞိဟ် ၁၇၀ ပြကောဋိကိုဋ်နွံဂှ် ကၟာတ်လဝ် ဇာဇၞိက်မဝ်ဗိုၚ်အေန်တာနိတ် ပွိုၚ် ၁၁ တ္ၚဲတုဲ ဖျေံလဝ်ကောန်ပၞာန်ဂမၠိုၚ်တုဲ ကြဴနူလလောၚ်ပ္တိတ်အမိၚ်တိတ်ဗ္တံဟွံဂွံတုဲဂှ် အလဵုအသဳ သ္ကိုပ်ဝန်ဇၞော် ဟာသဳနာဝွံ ထိၚ်အကာဲအရာမာန်လဝ်ရ။
အခိၚ်ပရေၚ်ဟွံညိၚ်ဝတ် က္တဵုဒှ်ဂှ် အပံၚ်မၞိဟ် ၁၀၀၀ ပြၚ် ဒးဒုၚ်ရပ်လဝ်ရောၚ် မဳဒဳယျာအပ္ဍဲဍုၚ်တံ ထ္မံက်ထ္ၜးလဝ်ရ။
ပ္ဍဲဗေန်ဂလာန်ဒေတ် အခိၚ်ညးသၟတ် ၜိုတ် ၁၈ ပြကောဋိကိုဋ် ကလောန်ဟွံမွဲ ဒှ်ဒၟံၚ်ဂှ် ကမၠောန်အလဵုအသဳကဝက်ပြၚ်ၚ်ဂှ် ပါဲစွံလဝ်သွက်ဂကောံမၞိဟ်လ္ၚဵုတံဂှ်တုဲ ကွးဘာဂမၠိုၚ် သ္ကိုပ်သ္ကတုဲ ဒစဵုဒစး ထ္ၜးလဝ်ဆန္ဒ ကုပြဝအလဵုအသဳဂှ်ရ။
Ref: AFP