ကိဗ်၊ အဝ်ဂါတ် ၂၃
အပ္ဍဲလၟေၚ်တရဴယူကရုၚ် မပြာကတ်ပ္ဍဲဝၚ်ဂှ် သ္ကိုပ်ဝန်ဇၞော်အိန္ဒိယ နရာန်ဒရာ မိုဝ်ဒဳဝွံ ဆဵုဂဗလဝ် သမ္မတဗိုဝ်လိုဝ်ဒဳမာ ဇြဳလာန်သကဳ ပ္ဍဲဂိတုအဝ်ဂါတ် ၂၃ တေံတုဲ သွက်ဂွံဂၠါဲသွဟ် ဂွံပတုဲဒှ် ပေါဲပၞာန် မက္တဵုဒှ်ဒၟံၚ် ကုရုယှာဂှ် ကဵုအာဇြဟတ်ဂရိုဟ်ဏောၚ် စၟဳစလဝ်ရ။
ကြဴနူရုယှာ သၠိုၚ်လုပ်ၜက်ၜေတ်ဗ္တိုက်တုဲ ဂွံၜါသၞာံဘာ်ပြၚ်ဂှ် သ္ကိုပ်ဝန်ဇၞော် မိုဝ်ဒဳ ပါလုပ်လဝ် နဒဒှ်ညးရေၚ်တၠုၚ်ဒတုဲဖဵု ပရေၚ်ၜိုဟ်လလမ်ရ။
အခိၚ်ရုယှာ သီဒၟံၚ် ဒေသသ္ကုတ်ဗၟံက် ယူကရုၚ်ဂှ် ယူကရုၚ်လေဝ် လုပ်စိုပ်တွဵုဒၞက်ရုယှာတုဲ ကၠောန်သ္ပဒၟံၚ် ပၞာန်ထ္ပက်ဇၞော်ကဵုဇြဟတ်တံ ဂွံကၠုၚ်ၜါသတ္တာဟယျ မဒှ်ရ။
“ပြသၞာလဵုမှ သောၚ်ကလး ပ္ဍဲဗလးမုက်ပၞာန် ဟွံဂွံပုဟ်” သာ်ဝွံ သ္ကိုပ်ဝန်ဇၞော် မိုဝ်ဒဳ ဟီုလဝ် ကၠာဟွံဂွံစ လၟေၚ်တရဴညးဂှ်ရ။
သွက်သ္ဂောံကလေၚ်ဂွံ ပရေၚ်ၜိုဟ်လလမ် ကေုာံ ညံၚ်ပရေၚ်ညိၚ်ဝတ်တံဂှ် ပွမပ္တိတ်ဇြဟတ် နကဵုနဲကဲကလုတ်တမာန် ကေုာံ ပရေၚ်သဳကၠဳတံဂှ် အန္ဒိယ ထံက်ဂလာန်တုဲ ၜိုဟ်သၟဟ်အစောံ ရေၚ်တၠုၚ်အာ ဗွဲမပြဟ်ဏောၚ်ဂှ် ညးဟီုဗပေၚ်လဝ်ရ။
မိုဝ်ဒဳဝွံ ဒှ်သ္ကိုပ်ဝန်ဇၞော်အိန္ဒိယ အာစိုပ်လဝ် ယူကရုၚ် ကၠာအိုတ်ရ။
ကြဴနူယူကရုၚ် လုပ်စိုပ်ဗ္တိုက်လဝ် ဒေသကာသ် သ္ကုတ်ပလိုတ် ဍုၚ်ရုယှာဂှ်တုဲ အကြာမဝ်သကိုဝ် ကဵု ကိဗ်တံဂှ် ဂွံဂၠါဲသွဟ် နကဵုနဲကလုတ်တမာန်ဂှ် ရံၚ်ကေတ်တှ်ေ သာဝါတ်ဂါတ်အာရ။
သ္ကိုပ်ဝန်ဇၞော် မိုဝ်ဒဳဝွံ ဍုက်ကေဝ်ဒၟံၚ်ကဵု သမ္မတရုယှာ ဗလာဒဳမာ ပူတေန် ဗွဲမလောန်ဏောၚ် ပ္ဍဲယူကရုၚ် မၞိဟ်ဗွဲမဂၠိုၚ် ညာတ်လဝ်ဂှ်ရ နကဵုညး ဒှ်ကၠုၚ်မၞိဟ်ပ္ညဳပ္ညပ် မစိုပ်တရဴမွဲ မာန်ဟာဟီုဂှ် ဟွံသောၚ်ခဍောၚ် ဒှ်ဒၟံၚ်ရ။
ညးဝွံ တုဲကၠုၚ်ဂိတုဂျူလာၚ်တေံ အပ္ဍဲလၟေၚ်တရဴ မဝ်သကိုဝ်ဂှ် မိန်တုဲဆက်လဝ်မိတ် ကုက္ဍိုပ်သ္ကိုပ်ရုယှာဂှ်ရ ဒးဒုၚ်ဟီုဖျေံလဝ်ကဝု ကုကောန်ဍုၚ်ယူကရုၚ်တံရ။
စပ်ကဵုပဋိပက္ခ ယူကရုၚ် က္တဵုဒှ်ဒၟံၚ်လၟုဟ်ဏံဂှ်တုဲ တၠုၚ်လအာ သ္ဂောံဂၠါဲသွဟ်ပရေၚ်ၜိုဟ်လလမ်ဂှ် သ္ကိုပ်ဝန်ဇၞော် မိုဝ်ဒဳ ဂွံသဳကၠဳကဵု သမ္မတဇြဳလာန်သကဳဂှ် စၟဳစလဝ်တုဲ ပရေၚ်ဍုက်ကေဝ်ဒဒှ်ေဒယှ် ယူကရုၚ်−အိန္ဒိယ ဂွံဇြိဟ်နက်ကၠုၚ်ဂှ်လေဝ် သွက်ဂွံသဳကၠဳအာဂှ် စဳဇန်လဝ်ရ။
အပ္ဍဲပရေၚ်ဆဵုဂဗ ကုမိုဝ်ဒဳဂှ် ဒဒှ်ရစၟဳစလဝ် သွက်ဂွံထ္ပက်စၟတ်တဲ လိက်တၞးဗွဲမဂၠိုၚ်ဂၠေၚ်ဂှ် သမ္မတဇြဳလာန်သကဳ ဟီုလဝ်ရ။
ရံၚ်အာဝၚ်မ္ဂး အိန္ဒိယဝွံ ကုရုယှာဂှ် ပရေၚ်ဆက်ဆောံမခိုဟ်ဂေါဝ်နွံတုဲ သွက်ဂွံပြိုၚ်ပ္ကာန် ကုကြုက် လ္ပာ်ဒးပ္တဝ် စပ်ကဵုဒေသဂှ် ပရေၚ်ပံၚ်တောဲရေၚ်တၠုၚ် စပ်ကဵုဂီုကၠီု ကုဍုၚ်ပလိုတ်တံလေဝ် နွံဒၟံၚ်ရ။
Ref: AFP