ဗေကျေန်၊ အဝ်ဂါတ် ၂၆
သွက်ဂွံထိၚ်ဒက် ပရေၚ်ဂီုကၠီု ကေုာံ ပရေၚ်ညိၚ်ဝတ်တံဂှ်တုဲ ဒပ်ပၞာန်ကြုက် ဒဒှ်ရဒပ်ပၞာန်၊ ပၞာန်ကျာ ကေုာံ ဒပ်ပံၚ်ကောံ ဒပ်ဗၠာဲသၟိၚ်တံ ဂေတ်ကၚ် မၚ်ရံၚ်လဝ် ပ္ဍဲပယျဵုဍုၚ်ဗၟာဂှ် ဒပ်ပၞာန်ကြုက် ဟီုလဝ် ပ္ဍဲဂိတုအဝ်ဂါတ် ၂၆ တေံရ။
အပ္ဍဲပရေၚ်ဂေတ်ကၚ်ဏံဂှ် မ္ၚးနူကဵု ရူအဳလဳ၊ ချာန်ကာန်ဂှ် ဒေသတၞဟ်ဟ် မဆက်စပ်ဒၟံၚ် ပယျဵုဍုၚ်ဗၟာဂှ် စွံအဓိက ဂေတ်လဝ်ကၚ်ရောၚ် ဒပ်ပၞာန်ကြုက် ထ္မံက်ထ္ၜးလဝ် ပ္ဍဲတၚ်လလောၚ်တြးမွဲဂှ်ရ။
ဌာန်ဂအုပ်ၝောံဒပ် သ္ကုတ်သၠုၚ်ကျာ ဒပ်အမၠံက်ညးဍုၚ်ကွာန်ကြုက်ဂှ် သွက်ဂွံစမ်ၜတ်အစောံစရာဲ ကောန်ဒပ်ဂမၠိုၚ် ချဳဒရာၚ် ဗွဲမမြက်ဇက်၊ ကၟာတ်လဒဵု ထိၚ်ဒက်မာန်တံ၊ အစောံစရာဲဗ္တိုက်မွဲစွံတံဂှ်တုဲ ဒဒှ်ရရေၚ်တၠုၚ်လဝ် သွက်ပရေၚ်ထိၚ်ဒဝ် ပရေၚ်ဂီုကၠီု၊ ပရေၚ်ညိၚ်ဝတ် ဒေသပယျဵုဂှ် ဒပ်ပၞာန် ဟီုရ။
အခိၚ်ကံၚ်ဇြဳပၞာန်ကဵု ဒပ်ပၠန်ဂတးတံ ဒှ်ဒၟံၚ်ပေါဲဗ္တိုက်ဂှ် မကမ်လွဟ်ဇၞော် ဒတုံဗ္တိုဟ်ထ္ကးအာလဝ် ပ္ဍဲဍုၚ်ကြုက်တုဲ မၞိဟ်ဂမၠိုၚ် ဇီုကပိုက်ကလိဂွံလဝ်ဝပ်တုဲ စမြိုၚ်ဂမၠိုၚ်လေဝ် ဒးလီုလာ်အာလဝ်ရ။
ဟိုတ်နူအကာဲအရာသာ်ဏံတုဲ ပ္ဍဲပယျဵုဍုၚ်ကြုက်ဂှ် ဒပ်ပၞာန်ကြုက် ထပ်ကၠောန်အာ ပရေၚ်ပ္ကတ်ပ္ကေၚ်ပရေၚ်ပၞာန်တံဏီဏောၚ်ဂှ် လ္ပာ်ကြုက် ဟီုလဝ်ရ။
ခြာဟွံလအ်ဏီ ဒပ်ပၞာန်ကြုက် ကၠောန်လဝ် ပရေၚ်ပ္ကတ်ပ္ကေၚ်ပရေၚ်ပၞာန် ပန်ပှော်နတဲ ပ္ဍဲဗ္ဒါဲပယျဵုဍုၚ်ဗၟာဂှ်ရ။
ဟိုတ်နူပဋိပက္ခဍုၚ်ဗမာတုဲ ပရေၚ်ညိၚ်ဝတ် ကေုာံ ပရေၚ်မၞိဟ် ပယျဵုၜါဍုၚ်ဏံ ဒှ်အာလဝ်လ္ပာ်လဟုတ်ဂှ် ကြုက် ဟီုရ။
အတိုၚ်ကတိ မကဵုလဝ် ပ္ဍဲဍုၚ်ဗမာ ညံၚ်ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် သ္ဂောံကလေၚ်ဒှ်အတိုၚ်တြေံဂှ် ဍုၚ်ကြုက် ဒဒှ်ရဆက်ပ္တိတ်အာဇြဟတ်ဏောၚ်ဂှ် ဝန်ဇၞော်ကာဍုၚ်သ္အာၚ်ဍုၚ်ကြုက် ဝါန်ယိ တုဲကၠုၚ်ခြာဟွံလအ်တေံ ဟီုလဝ်ရ။
Ref: Reuters