ၜၚ်ကံက်၊ အဝ်ဂါတ် ၂၈
ပ္ဍဲကောံဓရီု ကဆံၚ်ဝန်ဇၞော်အာဇြဳယာန်ဂမၠိုၚ် မကၠောန်ဗဒှ်လဝ် ပ္ဍဲဍုၚ်လာအိုဝ် ဍုၚ်ဗဳယာန်ကျေန် မရနုက်ကဵု ၅၇ ဝါဂှ် အတိုၚ်ဝန်ဇၞော်ကာဍုၚ်သ္အာၚ်ယာယဳ မာရေတ် ကဵုလဝ်ကတိဂှ် ပ္ဍဲဂိတုအဝ်ဂါတ် ၂၆ တေံ သွက်ဍုၚ်ဗၟာဂှ် အလဵုအသဳသေံ ထပ်ကဵုလဝ်ဒါန် အရီုဗၚ်ပရေၚ်ဗ္စာရဏာမၞိဟ် ၚုဟ်မးမၞုံ ၉ ပြကောဋိကိုဋ်ၝာတ်ရ။
ဝန်အပ္ဍဲလၟိုန် ဌာနဝန်ဇၞော်ကာဍုၚ်သ္အာၚ်ဍုၚ်သေံ အက်သဳရဳ ပေန်တာရူချဳဂှ် သွက်ဂွံရီုဗၚ် ညးဍုၚ်ကွာန်ဍုၚ်ဗၟာဂှ် ကဵုလဝ်အရီုဗၚ်သြန်ဏံ ဇရေၚ်သေန်တာကဵုအရီုဗၚ် စပ်ကဵုပရေၚ်ကောပ်ကာဲဘဲအန္တရာယ် အာဇြဳယာန် AHA Center စၞးအလဵုအသဳရ။
တုဲကၠုၚ် နူဂိတုဂျူလာၚ် ၂၁ စဵုကဵု ၂၇ ပ္ဍဲကဵုကောံဓရီုအာဇြဳယာန် မကၠောန်ဗဒှ်လဝ် ပ္ဍဲဍုၚ်ဗဳယာန်ကျေန်ဂှ် ဝန်ဇၞော်မာရေတ် ဒဒှ်ရကဵုလဝ်ဂတိပါၚ် ထပ်ရီုဗၚ်ကဵုအာ အရီုဗၚ်သာ်ဏံဏောၚ်ဂှ် ဝန်အပ္ဍဲလၟိုန် အက်သဳရဳ ဟီုလဝ်ရ။
ကြဴနူသီအဝဵုတုဲ နဒဒှ်အရီုဗၚ်ပရေၚ်ဗ္စာရဏာမၞိဟ် သွက်ဍုၚ်ဗၟာဂှ် ဍုၚ်သေံ ပအပ်ကဵုလဝ် ဒဝ်ဠာအမေရိကာန် ၄၅၀၀၀ ( ၁၅ ဒဿမ ၇၅ ပြကောဋိကိုဋ်ၝာတ်) ရောၚ် ဝန်အပ္ဍဲလၟိုန် အက်သဳရဳဂှ် ဟီုရ။
သြန်ထံက်ပၚ်တံဏံဂှ် ပအပ်ကဵုလဝ် ဇရေၚ်ဂကောံဍုၚ်သ္အာၚ်ဂမၠိုၚ် ညံၚ်ရဴအေဂျေန်ဇြဳ ကုလသမဂ္ဂ ကေုာံ ဂကောံဇိုၚ်ခ္ဍာ်ဍုၚ်သ္အာၚ်တံရ။
သွက်ဂွံပလံၚ်ဗစိုပ် အရီုဗၚ်တံဏံ ဇရေၚ်ညးမမံၚ်စံၚ် ပ္ဍဲဒေသအာကၠုၚ်ဝါတ်ဂါတ် ပ္ဍဲဍုၚ်ဗၟာတံဂှ် နူကဵုသေန်တာ AHA ပ္တိတ်ဇြဟတ်ရေၚ်တၠုၚ်ကဵုတုဲ အရီုဗၚ်ဏံ ဒှ်တဴအထံက်အရီုမာန်ရောၚ် လ္ပာ်ဍုၚ်သေံ ဟီုရ။
သွက်ဂွံကဵုအရီုဗၚ်ပရေၚ်ဗ္စာရဏာမၞိဟ် သွက်ဍုၚ်ဗၟာဂှ် ဍုၚ်သေံ သ္ဂုတ်သွာတ်လဝ်တုဲ တၚ်ရန်တၟံ ဂွံအံၚ်ဇၞးမာန် ထ္မံက်အာရုပ်ရဴ နကဵုအဖဝ်မိတ် ဗွဲမဂၠိုၚ်ဂၠေၚ်ဏောၚ်ဂှ် ဝန်အပ္ဍဲလၟိုန် အက်သဳရဳ ဟီုရ။
ရန်ကဵုဒတုဲဖဵု ညးဍုၚ်ကွာန်ဍုၚ်ဗၟာတုဲ ဍုၚ်သေံ လုပ်စိုပ်ကၠောန်သ္ပ လ္ပာ်လဟဵုကဵု ပံၚ်တောဲရေၚ်တၠုၚ်တံဂှ် ဒဒှ်ရညးတံဒှ်ဇြဟတ်ဂှ် သ္ကိုပ်စၞောန်ပ္ညုၚ် ကေၚ်ကာသေန်တာ AHA လဳယာန်မေန် ဟီုလဝ်ရ။
ပ္ဍဲဍုၚ်ဗၟာ ကြဴနူအသိၚ်ပၞာန်အပ္ဍဲဍုၚ် သ္ကာတ်ကၠုၚ်တုဲ ဍုၚ်ဇိုၚ်ဝုတ်ဒိုဟ် ဍုၚ်သေံဝွံ ဒးဒုၚ်လဝ်တဲ ညးဒဒိုက်ဍုၚ်ဗၟာ ဗွဲမဂၠိုၚ်ကဵု ညးဆုဲပြံၚ်မန်တန်တဴတံရ။
Ref: Bangkokpost