ဝါယှေန်တာန်၊ အဝ်ဂါတ် ၂၉
ဒဒှ်ရသမ္မတတြေံတြေံဂမၠိုၚ် အခေါၚ်ဗၠးနူဒုဟ်ဒဏ် နူကဵုအကာဲအရာ ဒးဒုၚ်စောဲလဝ်ဂဗုတ် စပ်ကဵုဂဗုတ်ရာဇဝတ်တံ နွံရောၚ် နူကဵုဂအုပ်ရုၚ်သၞောဝ်ဓဝ် အမေရိကာန် ကြဴနူသ္ဂုတ်သွာတ်လဝ်တုဲဂှ် ညးရေၚ်တၠုၚ်ဂဗုတ် အလဵုအသဳဖေဝ်ဒရာဂမၠိုၚ် ပ္တိတ်ဒၟံၚ်ဇြဟတ် သွက်ဂွံကလေၚ်စောဲဂဗုတ် ကုဒဝ်နေဝ်ထြာပ် ဟိုတ်နူပ္တိတ်ဇြဟတ် သွက်ဂွံပြံၚ်လှာဲသွဟ်ပေါဲရုဲမာဲ ၂၀၂၀ မဒးကျအာလဝ်တေံ ဟွံဗဗွဲကဵုသၞောဝ်ဂှ်ရ။
ကံၚ်ဇြဳတၟေၚ်အမေရိကာန် ဂျက်သမေတ် ကေုာံ ဂကောံညးဂှ် ပ္တိတ်ဒၟံၚ်ဇြဟတ် သွက်ဂွံကလေၚ်စောဲဂဗုတ် ကုသမ္မတတြေံ ထြာပ်ဂှ်ကီုလေဝ် ပရေၚ်ပ္တိုန်ရုၚ်စၟဳတ်ဂှ်တှ်ေ ကၠာပေါဲရုဲမာဲသမ္မတ နဝ်ဝေမ်ဗာ ၅ ဏံဂှ် သ္ဇက်ဂွံဒှ်ကၠုၚ် ဟွံမွဲရ။
ပ္ဍဲအရာပ္တိတ်ဇြဟတ် သွက်ဂွံကလေၚ်စောဲဂဗုတ်ဂှ် ညံၚ်ရဴကၠာတေံကီု တၚ်စောဲစပ်ပန်သာ် ပါလုပ်ကီုလေဝ် အလန်ဏံဂှ်တှ်ေ သွက်ပြဝ နူအခိၚ်ဒှ်လဝ်သမ္မတတေံ ဟွံသေၚ်တုဲ စွံလဝ်ပွန် ကုထြာပ် မပ္တိတ်ဒၟံၚ်ဇြဟတ် သွက်ဂွံဒုၚ်ရုဲစှ်ဂှ်ဏောၚ် မဒှ်ရ။
ဒဝ်နေဝ်ထြာပ်ဝွံ အခိၚ်ဒှ်သမ္မတတေံ နူကဵုဒးဒုၚ်စောဲစပ်လဝ်ဂဗုတ် စပ်ကဵုဂဗုတ်ရာဇဝတ် သွက်ပြဝညးမရေၚ်တၠုၚ်လဝ် အပ္ဍဲအဝဵု စပ်ကဵုသၞောဝ်သ္ဇိုၚ်ဒက်ပ္တန် ညးမဂွံလဝ်အခေါၚ်ကၠောန်ဂှ် အခေါၚ်ဗၠးနူဒုဟ်ဒဏ်နွံရောၚ် ရုၚ်သၞောဝ်ဓဝ်အမေရိကာန် သ္ဂုတ်သွာတ်လဝ် ပ္ဍဲဂိတုဂျူလာၚ် ၁ တေံရ။
စပ်ကဵုပ္တိတ်ဇြဟတ် သွက်ဂွံကလေၚ်စောဲဂဗုတ်ဂှ်တုဲ ညးရေၚ်တၠုၚ်ဂဗုတ် သမ္မတတြေံ ထြာပ်တံ မုဟွံဟီုလဝ်ဏီရ။
ဟိုတ်နူတၚ်သ္ဂုတ်သွာတ် ရုၚ်သၞောဝ်ဓဝ် အခေါၚ်ဗၠးနူဒုဟ်ဒဏ်နွံဂှ်တုဲ ဂဗုတ်မစောဲစပ်လဝ်လ္တူညးသီုဖအိုတ်တံဂှ် ထေက်ကဵုဒးရုပ်သီရောၚ် ထြာပ် ချူပ္တိုန်လဝ် လ္တူမဳဒဳယျာပရေၚ်မၞိဟ်ရ။
သွက်တၚ်စောဲစပ် ကၠာတေံဂှ် အပ္ဍဲညးဒုဟ်ဒဏ်ဟွံမွဲပုဟ် ထြာပ် ဟီုလဝ်တုဲ ဂဗုတ်ညးဒးဆေၚ်ဒၟံၚ်မုက် တၞဟ်ဟ်တံဂှ်လေဝ် ညံၚ်ဟွံဂွံကလေၚ်ဂွံအဝဵု ဒှ်ဂဗုတ် ပရေၚ်ဆဝ်မ္ၚုဟ် လ္ဂောံကဵုပရေၚ်ဍုၚ်ကွာန်တံ ပါလုပ်ဒၟံၚ်တံရောၚ် ဟီုလဝ်ရ။
အတိုၚ်လိက်လစွံစိုတ် ကံက်ကပှ်လဝ်တံဂှ်မ္ဂး ပြဟ်ဟ်ဏံ ညးစၞးဒဳမဝ်ကရေတ် ကာမေဝ်လာ ဟာရေသ်ဂှ် ဂြိပ်ဒၟံၚ်ဂတ ထြာပ် တၟံကၠံညိညဂှ် ဂွံတီကေတ်ရ။
ပ္ဍဲပေါဲရုဲမာဲ ၂၀၂၀ တေံ ထြာပ်ဝွံ ဒးကျအာလဝ် သမ္မတလၟုဟ် ဂျဵုဗိုၚ်ဒေန်ဂှ်ကီုလေဝ် ဟွံဒုၚ်ဝန် ဒဒှ်မကျဂှ်တုဲ ပ္တိတ်လဝ်ဇြဟတ် သွက်ဂွံကလေၚ်ဂတး သွဟ်ပေါဲရုဲမာဲရောၚ် ဒးဒုၚ်စောဲစပ်လဝ်ရ။
သွက်ဂွံတာဒၞါ တၚ်လလောၚ်တြးကၠတ်ထဝ် ဒဒှ်ရသ္ပစၟတ်သမ္တီ သွဟ်ပေါဲရုဲမာဲဂှ်တုဲ ညးထံက်ဂလာန်ထြာပ် မၞိဟ်ပလီုပလာ်ဂမၠိုၚ် လုပ်စိုပ်ဍိုက်ဗ္တိုက်လဝ် ကၠတ်ထဝ် ပ္ဍဲဂိတုဂျာန္နဝါရဳ ၆ ဂှ်ရ။
စပ်ကဵုလၟေၚ်ဒဒှ်ဏံတုဲလေဝ် ထြာပ်ဝွံ ဒးဆေၚ်ဒၟံၚ်မုက်ကဵု တၚ်စောဲစပ် ဗွဲတၞဟ်ခြာရ။
ပ္ဍဲသမ္မတတြေံတံဂှ် အခေါၚ်ဗၠးနူဒုဟ်ဒဏ်နွံရောၚ် ဂကောံနာဲဗ္စာ ရုၚ်သၞောဝ်ဓဝ် မသ္ဂုတ်သွာတ်လဝ် နကဵု ၆မာဲ၊ ၃ မာဲဂှ် နာဲဗ္စာထြာပ်ခါန်ကၞက်ပ္တိုန်လဝ်ဂှ် ၃ တၠ ပါလုပ်ရောၚ် ဂွံတီကေတ်ရ။
Ref: Reuters