ၜၚ်ကံက်၊ အဝ်ဂါတ် ၃၀
သွက်ဂွံထ္ပက်အဇာ က္ၜၚ်ကျာဗ္တိုက် အာယုက်လအ်ဒၟံၚ်တံဂှ် ဒပ်ပၞာန်ကျာဍုၚ်သေံ မိက်ဂွံရာန်ဒၟံၚ် က္ၜၚ်ကျာဗ္တိုက် Gripen 39 ပ္တိတ်နူ ကမ္ပဏဳ SAAB ဍုၚ်သွဳဒေန်ဂှ် ပ္ဍဲဂိတုအဝ်ဂါတ် ၂၇ တေံ ဟီုလဝ်ရ။
ပ္ဍဲကဵုသ္ဇက်ဂွံရုဲစှ်ဂမၠိုၚ် ကေတ်အခိၚ်ပွိုၚ် ၁၀ ဂိတုတုဲဂှ် ဒပ်ကျာဍုၚ်သေံ သ္ဂုတ်သွာတ်လဝ် သွက်ဂွံရာန်အာ က္ၜၚ်ကျာဗ္တိုက် ဂကူ JAS 39 Gripen E/F မၞုံကဵုအစောံစရာဲ မကိတ်ညဳကဵု ဗျူဟာဒပ်ကျာ၊ တၚ်နွံပၟိက် ဒပ်ပၞာန်တံဂှ်ဏောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အကြာက္ၜၚ်ကျာဗ္တိုက် Gripen ကဵု က္ၜၚ်ကျာဗ္တိုက် F-16 ပ္တိတ်နူကမ္ပဏဳအမေရိကာန် လံက်ဟဳမာတေန်ဂှ် ဒပ်ပၞာန်ကျာသေံ ရုဲစှ်လဝ်တုဲ တၚ်သ္ဂုတ်သွာတ် သ္ဂောံရာန်လက္ကရဴအိုတ်ဂှ် ကၠတ်ထဝ် ဒးဖျေံစၟတ်ဏောၚ် မဒှ်ရ။
ဒဒှ်ရဒပ်ပၞာန်ကျာဍုၚ်သေံ အနာဂတ်တေံ မိက်ဂွံရာန်အာ က္ၜၚ်ကျာဗ္တိုက် Gripen ဂှ် ဆက်စၠောံလဝ် ကုညးတံရောၚ် ညးမၞုံအခေါၚ်ဟီုဂး ကမ္ပဏဳ SAAB သ္ပဒတန်လဝ် ကုဌာန်ပရိုၚ်ရိုက်တာရ။
ဒဵုကဵုအခိၚ်လၟုဟ် ဗ္ကန်လဝ်ကီု ထ္ပက်လဝ်လိက်ကသုက်တံကီု ဟွံမွဲဏီပုဟ်ဂှ် ညးမၞုံအခေါၚ်ဟီုဂးဂှ် ဟီုဗပေၚ်လဝ်ရ။
ဒပ်ပၞာန်ဍုၚ်သေံလၟုဟ်ဝွံ ပိုၚ်ပြဳလဝ် က္ၜၚ်ကျာဗ္တိုက် JAS 39 Gripen ၁၁ ဖ္ဍိုက်ကဵု က္ၜၚ်ကျာဗ္တိုက် F-16 ကဵု F-5 ပ္တိတ်နူအမေရိကာန်တံ ဂၠိုၚ်ကဵုဒါဇြိန်ရ။
ဆ္ဂး ဒပ်ပၞာန်ကျာသေံ ရပ်စပ်ကၠုၚ် က္ၜၚ်ကျာဗ္တိုက် F-16 ကဵု F-5 တံဂှ်ဝွံ နူကဵုသၞာံ ၁၉၈၀ ပေၚ်တုဲတေံရ။
သွက်သၞာံကၠုၚ်စိုပ် နူကဵု ၂၀၂၅ စဵုကဵု ၂၀၂၉ ဂှ် သွက်ဂွံရာန်အာ က္ၜၚ်ကျာဗ္တိုက်တၟိ ပန်ဖ္ဍိုက်ဂှ် ဒပ်ပၞာန်ကျာသေံ အာတ်မိက်လဝ် သြန်ဘဏ္ဍာ သွက်သၞာံဘဏ္ဍာ ၂၀၂၅ ဂှ် ၁၉ ဗဳလျာန်ၝာတ် (၅၆၀ ပြကောဋိကိုဋ် ဒဝ်ဠာအမေရိကာန်) ရ။
အတိုၚ်ကိုန်စဳမာန်သၞာံဇမၠိၚ် ဒပ်ပၞာန်ကျာသေံ သွက်ဂွံထ္ပက်အဇာ ဒၞါဲက္ၜၚ်ကျာဗ္တိုက် အာယုက်လအ်ဒၟံၚ်တံဂှ်မ္ဂး ပ္ဍဲသၞာံဘဏ္ဍာ ၂၀၃၄ ဏံ သွက်ဂွံရာန်အာ က္ၜၚ်ကျာဗ္တိုက် ၁၂ ဖ္ဍိုက်ဂှ် ဒပ်ပၞာန်ကျာသေံ စဳဇန်ဒၟံၚ်ရ။
သြန်ဗာတ်ဂျက် သ္ကုတ်ပထမဂှ် ကဵုလဝ်အခေါၚ် ပ္ဍဲဂိတုဂျောန်တေံတုဲ သ္ကုတ်ဒုတိယကဵု သ္ကုတ်တတိယဂှ် ဂိတုဂတဏံမံက်မ္ဂး ကဵုအာအခေါၚ် စၟဳတ်ဏောၚ်ဂှ် ဂွံတီကေတ်ရ။
Ref: Reuters