မတ်မလီု၊ အဝ်ဂါတ် ၃၀
ၚုဟ်သြန်ဍုၚ်သ္အာၚ် တိုန်ကၠုၚ်ကဵုဆဂှ်ဝွံ အပ္ဍဲအကြာတ္ၚဲတံဏံ ကလေၚ်စှ်ေကၠုၚ်သိုက်က်ကီုလေဝ် ၚုဟ်ဗၞိက်ဖျာ ပါလုပ်သီုကဵု ဗၞိက်စသုၚ်သ္ဇိုၚ်တံဂှ် ဟွံကလေၚ်စှ်ေဏီဖိုဟ်ရ။
ဟိုတ်နူၚုဟ်မးသြန်ဍုၚ်ဗၟာ စှ်ေကၠုၚ်တုဲ ၚုဟ်ဒဝ်ဠာအပ္ဍဲဍုၚ်ဝွံ အပ္ဍဲဂိတုအဝ်ဂါတ် သတ္တာဟဒုတိယဂှ် မွဲဒဝ်ဠာ ဒှ်လဝ် ၇၀၀၀ ဒ္ကေဝ်ပြၚ်တုဲ ၚုဟ်သြန်ၝာတ်သေံဂှ်လေဝ် မွဲၝာတ်ဂှ် ဒှ်အာ ၂၀၀ ဒ္ကေဝ်ပြၚ် ရံၚ်အာပ္ဍဲဝၚ်မ္ဂး ဒှ်အာလဝ်ၚုဟ်သၠုၚ်အိုတ်ရ။
ဆ္ဂး ၚုဟ်သြန်ဍုၚ်သ္အာၚ်ဝွံ ပ္ဍဲဂိတုအဝ်ဂါတ် သတ္တာဟလက္ကရဴအိုတ်ဂှ် မွဲဒဝ်ဠာအမေရိကာန်ဂှ် ဗ္ဒါဲ ၅၅၀၀ ဒ္ကေဝ်၊ ၚုဟ်သြန်ဍုၚ်သေံဂှ်လေဝ် မွဲၝာတ်ဂှ် ၚုဟ်ကလေၚ်စှ်ေအာ စဵုကဵုဗ္ဒါဲ ၁၅၀ ဒ္ကေဝ်ပြၚ်ရ။
ၚုဟ်သြန်ဍုၚ်သ္အာၚ် ကလေၚ်စှ်ေကၠုၚ်ကီုလေဝ် အပ္ဍဲဍုၚ်ဏံဂှ်တှ်ေ ၚုဟ်ဗၞိက်စၞစသုၚ်သ္ဇိုၚ်တံကဵု ကပေါတ်ဗၞိက်ဗွဲမဂၠိုၚ် ၚုဟ်ဟွံကလေၚ်စှ်ေမွဲသာ် ဆက်ဒှ်ဒၟံၚ်အတိုၚ်တြေံဂှ်ရ ညးဗြဴတၠသ္ၚိတံ ဒှ်ဒၟံၚ်အခက်အခုဲအိုတ်ရ။
ညးဗြဴတၠသ္ၚိမွဲတၠဂှ်တှ်ေ ၚုဟ်ဒဝ်ဠာကဵု ၚုဟ်သြန်ၝာတ်သေံ ကလေၚ်စှ်ေကၠုၚ်ကီုလေဝ် ဟိုတ်နူၚုဟ်ဗၞိက်ဟွံစှ်ေတုဲ ဒးဒှ်ကၠုၚ်ဒဒိုက်ဂၠိုၚ်ကၠုၚ်တုဲ နကဵုသၟာဗၞိက်ဂမၠိုၚ် ဟွံဗ္စာရဏာ လ္တူညးဍုၚ်ကွာန်တံပုဟ်ဂှ် ပါ်ပါဲလဝ်ရ။
“သြန်ဒဝ်ဠာတံစှ်ေလေဝ် ၚုဟ်ၝာတ်တံ စှ်ေလေဝ် ၚုဟ်ဗၞိက်ဖျာဂှ်တှ်ေ ဟွံစှ်ေပုဟ်။ ပါဲနူကဵုၚုဟ်ဖျာဟွံစှ်ေ ဂှ် သာတုဲဒှ်ကၠုၚ်အခက်အခုဲရ။ ၚုဟ်စှ်ေတှ်ေ ဒးဗက်ဖျေံကဵုဂှ် ဒှ်ကလောန်ဍေံတံဏောၚ်လေဝ်။ လၟုဟ်တှ်ေ ၚုဟ်စှ်ေမံၚ်ဖိုဟ် တၠဖျာတအ် သၟာဗၞိက်တံဂှ် ဓဝ်ဗ္စာရဏာဟွံမွဲအိုတ်ရ” သာ်ဝွံ ညးဟီုရ။
ၚုဟ်ဗၞိက်ဟွံစှ်ေတုဲ ဒးခၞေံရပ်စပ်စသုၚ်ဒၟံၚ် နူကဵုကၠာတေံကီုလေဝ် ဟွံရုမ်ဂပ်ရတုဲ သွက်ဂွံစသုၚ်မှာန်န်ရဂှ် ဒှ်ဒၟံၚ်အကာဲအရာ ဒှ်ဟွံမာန်ရပုဟ်ဂှ် ညးဗြဴတၠသ္ၚိဂမၠိုၚ် ဟီုလဝ်အိုတ်ရ။
တၠသ္ၚိမွဲတၠပၠန်ဂှ်လေဝ် သြန်ဍုၚ်သ္အာၚ်တံ ၚုဟ်စှ်ေမ္ဂး ၚုဟ်ဗၞိက်တံ ဒးကလေၚ်စှ်ေဏောၚ် ဆ္ဂး ကၠိုဟ်ကေတ်ဟွံမာန် ဒှ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ၚုဟ်ဗၞိက်ဖျာစှ်ေတှ်ေ ဍေံလေဝ် ဒးစှ်ေကီုဏောၚ်။ မူဟိုတ်ဟွံစှ်ေရောဟီုဂှ် အဲလေဝ် ကၠိုဟ်ကေတ်ဟွံမာန်ပုဟ်။ ကဝ်ဖဳမေတ်ရဂှ် တိုန်အာစဵုကဵုပိဆ။ စနူကဵုတၞုၚ်ဝုန် သောဲသောဲဗြောဲဗြောဲတံရဏောၚ်။ သီုဖအိုတ်ဂှ် ၚုဟ်တိုန်ဒၟံၚ်ဖအိုတ်။ လၟုဟ် ပိုယ်တံဂှ် ပြဟ်ဟ်ဏံ ၜိုတ်ဇကုသ္ပမာန်ရ။ ဗီုကၠာတေံဂှ် ရပ်စပ်ဟွံမာန်ရပုဟ်။ ဒးခၞေံအာရ” သာ်ဝွံ သ္ဂးရ။
အခိၚ်လၟုဟ် ၚုဟ်ဒဝ်ဠာကဵု ၚုဟ်သြန်ၝာတ် ကလေၚ်စှ်ေကၠုၚ်ကီုလေဝ် ၚုဟ်ဗၞိက်ဖျာတံ ဟွံစှ်ေတုဲ ညးဍုၚ်ကွာန်ကဆံၚ်မၞိဟ်သ္ဇိုၚ်တံ ဒးဒုၚ်စသိုၚ်ဒၟံၚ် ပြသၞာသြန်လုပ်ကဵုသြန်တိတ် ဟွံသၟဟ်တးတံဂှ်ရ။
သၟာဗၞိက်တံဂှ်တှ်ေ ၚုဟ်ဗၞိက်ဖျာတံ ဆက်နွံဒၟံၚ်အတိုၚ်တြေံဂှ်ဝွံ ဟိုတ်နူရာန်လဝ် အခိၚ်ၚုဟ်လှုဲဍုၚ်သ္အာၚ်တိုန်တံဂှ်တုဲ ၚုဟ်က္ဍၚ်ဒၟံၚ်ရောၚ် ထ္ၜးလဝ်ဟိုတ်ရ။
သြန်ဍုၚ်သ္အာၚ်တံ စှ်ေကၠုၚ်တုဲ ၚုဟ်ဗၞိက်တံ ဆက်သၠုၚ်တိုန်ဒၟံၚ်ကီုလေဝ် ကံၚ်ဇြဳပၞာန် ကေုာံ ဂကောံသၟာဗၞိက်သၟဝ်တဲညးတံဂှ် ဒဵုကဵုအခိၚ်လၟုဟ် ပသောၚ်ကလးကဵုလဝ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ