ကြုၚ်ဒဵု၊ အဝ်ဂါတ် ၃၀
တွဵုရးကရေၚ် ပွိုၚ်ဍုၚ်ကအ်ကြိက် အပ္ဍဲဒေသဍုၚ်ကြုၚ်ဒဵုဂှ် လ္ပာ်ကံၚ်ဇြဳပၞာန် ဂလိုၚ်ပ္တိုန်ကၠုၚ် ဇြဟတ်ဒပ်တုဲ ပေါဲဗ္တိုက်ဆေၚ်မုက်ၜါလ္ပာ်တံ ဆက်က္တဵုဒှ်ဒၟံၚ်ရောၚ် တမ်ရိုဟ်ပရိုၚ်ဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုကွာန် မၞုံအပ္ဍဲဒေသ ဍုၚ်ကြုၚ်ဒဵုဂှ် လ္ပာ်ဒပ်ကံၚ်ဇြဳပၞာန် ဂလိုၚ်ပ္တိုန်ကၠုၚ် ဇြဟတ်ဒပ်ကီု၊ ပ္ဍဲကဵုသ္ကုတ်ဂၠံၚ်အာယှ ကြုၚ်ဒဵု−ကအ်ကြိက် ကေုာံ သ္ကုတ်ဂၠံၚ်ကြုၚ်ဒဵု−နဘူဂှ်လေဝ် သၠုၚ်ပ္တိုန်ဂီုကၠီုတုဲ စၟဳတ်သၟာန်သၟုက်ဒၟံၚ် ညးဍုၚ်ကွာန်ဒေသတံဂှ် ကၠောန်ၜိုတ်ဒၟံၚ်ရောၚ် တမ်ရိုဟ်ပရိုၚ်ဒေသတံ သ္ဂးအိုတ်ရ။
သ္အာၚ်နူဂှ်ပၠန် လ္ပာ်ကွာန်မျပတိုၚ် ဂၠံၚ်ဇၞော် (နဘူး−တံတားကျိုး ကအ်ကြိက်) အပ္ဍဲဒေသနဘူ ဍုၚ်ကြုၚ်ဒဵုဂှ်လေဝ် ဒပ်ကံၚ်ဇြဳပၞာန်တံ အာကၠုၚ်ချဳဒရာၚ်ဒၟံၚ်ပရေၚ်ပၞာန်တံ နွံဒၟံၚ်တုဲ ပ္ဍဲဂိတုအဝ်ဂါတ် ၂၈ အခိၚ်ဇိုၚ်သဝ်တ္ၚဲဂှ် ထပ်က္တဵုဒှ်လဝ် ပေါဲဗ္တိုက်ဆေၚ်မုက် ကုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံရ။
ဗ္ဒါဲကွာန်မျပတိုၚ်ဂှ် ဗ္ဒိုပ်ဒဵုယျေန်ကွေဝ် ဒပ်ကံၚ်ဇြဳပၞာန်နွံတုဲ ဒပ်ကံၚ်ဇြဳပၞာန် အာကၠုၚ်ချဳဒရာၚ်ဒၟံၚ် နူကဵုဗ္ဒိုပ်ဒပ်ယျေန်ကွေဝ်ဏံကဵု ဒပ်ပံၚ်ကောံ KNLA တံ က္တဵုဒှ်လဝ် ပရေၚ်ပန်ပှော်တုဲ လ္ပာ်ဒပ်ကံၚ်ဇြဳပၞာန် ဇီုကပိုက်ဒးလဝ်ဂၠိုၚ်တုဲ ပန်ပှော်လဝ် သီုကဵုလွဟ်ဇၞော်တံဂှ်ရ ညးဒေသတံ ဒးဂြိပ်ဒၟံၚ်ရောၚ် တမ်ရိုဟ်ပရိုၚ်ဗလးတိတံ ဟီုရ။
ပ္ဍဲကွာန်မျပတိုၚ်ဂှ် ဒပ်ကံၚ်ဇြဳပၞာန် အာကၠုၚ်ချဳဒရာၚ်ဒၟံၚ်ပရေၚ်ပၞာန်တံ နွံဒၟံၚ်ဂှ်ရ ပရေၚ်ပန်ပှော် ကုဒပ်ပံၚ်ကောံ KNLA တံဂှ် က္တဵုဒှ်ဒၟံၚ် မွဲဏှမွဲဏှတုဲ အပ္ဍဲပေါဲဗ္တိုက်ကၠာတေံဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ဘာလကျာ် ကေုာံ စမြိုၚ်သ္ၚိဒၟံၚ် အပ္ဍဲကွာန်တံ ဒးဇီုကပိုက်လီုလာ်အာလဝ်ရ။
ဒပ်ကံၚ်ဇြဳပၞာန်ဝွံ သွက်ဂွံထိၚ်ဒက် ဒေသတေန်ဂါန်ညဳနံၚ်ဂှ် ထ္မံက်ဒၟံၚ်ပရေၚ်ပၞာန်အံၚ်ဇေယျကီုလေဝ် ဟွံအံၚ်ဇၞးတုဲ ဒးဆုတ်ကလေၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media