မတ်မလီု၊ အဝ်ဂါတ် ၃၀
စပ်ကဵုအစဳဇန် ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပကီုပရာပ် ကံၚ်ဇြဳပၞာန်ဂှ်တုဲ သွက်ဂွံဒစဵုဒစးအာ ကေုာံ သွက်ဂွံကေတ်အာအရေဝ် လ္တူပွမပံၚ်တောဲကၠောန်အာတံ ပိုတ်တ်သ္ကုတ်တ်ဂှ် ဗော်ဍုၚ်မန်တၟိ AD လလောၚ်ပ္တိတ်ကဵုလဝ်သမ္တီရ။
သွက်ဂီုကၠီုကွာန်၊ အရာပ်ဂးတုဲ စပ်ကဵုပကောံဂၠါဲဒၟံၚ် ကောန်အရာပ်မၞိဟ်တြုံ အာယုက်လ္တူ ၃၅ သၞာံတံဂှ် ပ္ဍဲဂိတုအဝ်ဂါတ် ၂၉ တေံ ဂကောံက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD လလောၚ်ပ္တိတ်ကၠုၚ် လိက်စၞောန်ပၟိၚ်ရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ် ဂကောံဂီုကၠီုညးဍုၚ်ကွာန် ကံၚ်ဇြဳပၞာန် ထ္မံက်အာရုပ်ရဴဏံဂှ်ဝွံ သွက်ဂွံဗပေၚ်ဇြဟတ် မနွံဒၟံၚ်ပၟိက်တံဏောၚ်ဂှ်ရ လ္ပပံၚ်တောဲညးသ္ကအ်အိုတ်ညိဂှ် ကဵုလဝ်သမ္တီ ကုဂကောံအုပ်ဓုပ်ကွာန်တံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂကောံဂီုကၠီုညးဍုၚ်ကွာန် ဍေံတံကၠောန်ဒၟံၚ်လၟုဟ်ဂှ် ဒှ်ကမၠောန်ဗပေၚ်ကဵု ဇြဟတ်ကံၚ်ဇြဳပၞာန် မဍိုန်လျဒၟံၚ် ဍေံတံနွံဒၟံၚ်ပၟိက်တံမွဲဂှ် ပိုယ်ညာတ်သာ်ဏံရ။ ဟိုတ်ဂှ်ရ စပ်ကဵုအရာဏံတုဲ ပိုယ်တံ ဒစဵုဒစးအာ ပိုတ်တ်သ္ကုတ်တ်ဏောၚ်။ ညးဒေသနွံမံၚ်ပ္ဍဲဒေသပိုယ်တံ ချဳဒရာၚ်သီုဖအိုတ် လ္ပပံၚ်တောဲပါလုပ် ပ္ဍဲကမၠောန်ဏံအိုတ်ညိဂှ် ဗွဲတၟေၚ် ပိုယ်တံ ကဵုလဝ်သမ္တီ ကုဂကောံအုပ်ဓုပ်ကွာန်တံရ” သာ်ဝွံ သ္ဂးရ။
ပ္ဍဲလိက်စၞောန်ပၟိၚ်ဂှ် ရန်လဝ် သွက်တိဍာ်ဗော်ဍုၚ်မန်တၟိ AD ချဳဒရာၚ်ဒၟံၚ်တံ နူကဵုဒေသမန်၊ ကရေၚ်၊ တၞၚ်သဳ ပွိုၚ်ဍုၚ်ကျာ်မြဟ်၊ ကအ်ကြိက်၊ မုဟ်ဍုၚ်၊ ဇြပ်ဗု၊ ရေဝ်သၟဝ်ကျာ ကေုာံ ပွိုၚ်ဍုၚ်ဍာ်ဗုတံ မဒှ်ရ။
နူကဵုဂကောံကောပ်ကာဲဗဟဵု ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပကီုပရာပ် ကံၚ်ဇြဳပၞာန် ဒက်ပ္တန်လဝ်ဂှ် ပကောံဒၟံၚ်မၞိဟ် သွက်ဂီုကၠီုဂၠံၚ်၊ ဂီုကၠီုအရာပ်တံ စနူကဵုရးဒေသ၊ တွဵုရး၊ ခရိုၚ်၊ ပွိုၚ်ဍုၚ် ကေုာံ စဵုကဵုဂကောံကွာန်အရာပ်တံရ။
ကုညးမပါလုပ် ပ္ဍဲဂကောံဂီုကၠီုညးဍုၚ်ကွာန်တံဂှ် ကဵုတန်ဗ္တောန်ပၞာန်ကီု၊ ဗ္ဂပ်ကဵုလွဟ်ကီု၊ ထံက်ပၚ်ပလံၚ်ဗစိုပ် ကေုာံ သွက်ဂွံဟံၚ်ပြာ်ဆုဲပြံၚ်ဒၞါဲ ကောန်ဒပ်ကလိဂွံဝပ်တံ တာလျိုၚ်တံဏံဂှ်လေဝ် သွက်ဂွံကဵုအာဂှ် ကံၚ်ဇြဳပၞာန် စဳဇန်လဝ်ရ။
သ္အာၚ်နူဂှ်ပၠန် ဗွဲမစိုပ်တရဴ ဂွံလုပ်ပေါဲဗ္တိုက်မာန်ဂှ်လေဝ် ပ္ကတ်ပ္ကေၚ်ကဵု နဲဗျူဟာ မကိတ်ညဳကဵု အကာဲအရာတံကီု၊ ကောန်ဒပ်တံဂှ်လေဝ် သွက်ဂွံရပ်စပ်အာ ပ္ဍဲကဵုတာလျိုၚ်ဂီုကၠီုတိဍာ် ကေုာံ ပရေၚ်စဵုဒၞါ၊ တာလျိုၚ်ဗလးမုက်ပၞာန်တံ မဒှ်ရ။
နာဲဗညာမန်ဂှ်တှ်ေ “ ဒးဒုၚ်ဓဇက်ပၠောပ်ဏာဒှ်ဒှ် နစိုတ်ဇကုဇကုဒှ်ဒှ် နူစပါလုပ်အာ ပ္ဍဲဂကောံဏံဂှ် ပိုယ်တံ စၟတ်ကေတ် နဒဒှ်ဂကောံကံၚ်ဇြဳပၞာန်မွဲရဏောၚ်။ စပ်ကဵုလ္တူဏံတုဲလေဝ် ပိုယ်တံ ရေၚ်တၠုၚ်ကေတ်အာအရေဝ်ဏောၚ်” သာ်ဝွံ သ္ဂးရ။
ဆ္ဂး ကေတ်အာအရေဝ် နကဵုဗီုပြၚ်သာ်လဵုရောဟီုဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် လလောၚ်ပ္တိတ်လဝ် သောၚ်ၚ်ကၠးကၠးဂှ် ဟွံမွဲဏီရ။
အကာဲအရာဒပ်ပၞာန်ဗၟာလၟုဟ်ဂှ်ဝွံ ဒးဒုၚ်ဗိုၚ်ဗ္တိုက်ဒၟံၚ် အလုံဍုၚ်မွဲတုဲ ဂြိပ်တိတ်၊ ဖျေံလွဟ်၊ ဒးဒုၚ်သီဗ္ဒိုပ်တံ နွံဒၟံၚ်တုဲ ပွမကလေၚ်ဗပေၚ်ဇြဟတ်ဂှ်ဝွံ ဒှ်သွက်ဂွံဆက်လမျီု ကံၚ်ဇြဳပၞာန်ဏောၚ်ဂှ် ထ္မံက်ထ္ၜးလဝ် ပ္ဍဲလိက်စၞောန်ပၟိၚ်ဂှ်ရ။
ဟိုတ်ဂှ်ရ နကဵုဂကောံအုပ်ဓုပ်ဂမၠိုၚ် လ္ပပံၚ်တောဲရေၚ်တၠုၚ် ပ္ဍဲကဵုဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပကီုပရာပ် ကံၚ်ဇြဳပၞာန်ဏံအိုတ်ညိဂှ် စၞောန်လဝ် ကုဒေသ၊ ပွိုၚ်ဍုၚ်၊ အရာပ် မဆက်စပ်တံရ။
ယဝ်ရ ဂကောံအုပ်ဓုပ်ကွာန်အရာပ်တံ ဟွံဒ္ဂေတ်ဗက် လိက်စၞောန်ပၟိၚ်ဂှ်မ္ဂး ပါလုပ် အပ္ဍဲဂကောံဂီုကၠီုညးဍုၚ်ကွာန် နဒဒှ်ကောန်ဂကောံကီု ပလံၚ်ဗစိုပ်တံဂှ် ကၠောန်သ္ပကၠုၚ်မ္ဂး ကေတ်အာရေဝ် ပိုတ်တ်သ္ကုတ်တ်ဏောၚ်ဂှ် ဗော်ဍုၚ်မန်တၟိ AD လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ