ထဝါဲ၊ အဝ်ဂါတ် ၃၁
ပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ကျံက်သုက်ကုန် ပွိုၚ်ဍုၚ်ထဝါဲ ရးတၞၚ်သဳဂှ် လ္ပာ်ဒပ်ကံၚ်ဇြဳပၞာန် ၁၀ တၠပြၚ် ချိုတ်အာလဝ်တုဲ ရပ်ဂွံလဝ်အကြာပ်ဒပ်မွဲတၠဂှ် ဂွံတီကေတ် ဇရေၚ်တမ်ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗုရ။
ဒပ်ကံၚ်ဇြဳပၞာန် နူကဵုကွာန်မံၚ်မေဝ်ယှံၚ် ထ္ပက်ကၠုၚ်ကရောၚ်ပၞာန် လ္ပာ်ကွာန်ကျံက်သုက်ကုန် နကဵုဇြဟတ်ဗ္ဒါဲ ၈၀ ဂှ် ဒပ်ပံၚ်ကောံစဵုဒၞါညးဍုၚ်ကွာန်တံ ကြတ်ဗ္တိုက်လဝ် ပ္ဍဲဂိတုအဝ်ဂါတ် ၂၈ တုဲကၠုၚ်တေံ အခိၚ်နူဂယး ၜိုတ် ၉ နာဍဳဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် ၂ နာဍဳ ၃၀ မိနေတ်တုဲ လ္ပာ်ကံၚ်ဇြဳပၞာန် ဇီုကပိုက်ချိုတ်တံ နွံလဝ်ရ။
အခိၚ်ဖျေံဒၟံၚ်ဗ္ဒိုပ် ဟိုတ်နူလုပ်စိုပ်ဒးဒုၚ်ဗ္တိုက်လဝ်တုဲ နူလ္ပာ်ဒပ်ကံၚ်ဇြဳပၞာန် ဟွံအောန်နူကဵု ၁၆ တၠ ချိုတ်အာလဝ်တုဲ ရပ်ဂွံလဝ် အကြာပ်ဒပ်မွဲတၠ သီုကဵုမကမ်လွဟ်လက်နက်တံဂှ် ညးဒုၚ်တာလျိုၚ်လလောၚ်ပရိုၚ် ဒပ်စဵုဒၞါညးဍုၚ်ကွာန် ကိုဝ်ဖိုဝ်ချဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပြဟ်ဟ်ဏံ ကရောၚ်ပၞာန် ဒးဒုၚ်ဗ္တိုက်ဏံဂှ်ဝွံ ကလေၚ်ဆုတ်အာဒပ် ပ္ဍဲကွာန်မံၚ်မေဝ်ယှံၚ်တုုဲ ဖျေံဒပ်မံၚ်ဒၟံၚ် ပ္ဍဲကဵုသ္ၚိနွံအပ္ဍဲကွာန်တံဏောၚ်ဂှ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရ။
အကြာပ်ဒပ်ကံၚ်ဇြဳပၞာန် ရပ်ဂွံလဝ်မွဲတၠဂှ်တှ်ေ အတိုၚ်အခေါၚ်အရာ ဂၠုဲပၞာန်မွဲတၠ ထေက်ကဵုဂွံဂှ် ရေၚ်တၠုၚ်ကဵုလဝ်ရောၚ် ကိုဝ်ဖိုဝ်ချဝ် ဟီုရ။
သ္အာၚ်နူဂှ်ပၠန် အပ္ဍဲပေါဲဗ္တိုက်ၜါလ္ပာ်ဂှ် ညးဗြဴဒေသ အာယုက် ၆၀ သၞာံမွဲတၠ နူကဵုကွာန်ကျံက်သုက်ကုန်ဂှ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရေၚ်ဗ္တိုက်ဏံဂှ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု YPDF ၊ ဒပ်ဒမၠုက် (ဘီးလုံး) ၊ ကျားသစ်နက်၊ ဒပ်ပၞာန်ဗၠးၜးကောန်ဂကူထဝါဲ DNLA ကေုာံ ကရောၚ်ပၞာန်သာဂရတံ ပံၚ်တောဲဗ္တိုက်လဝ်ရ။
တုဲကၠုၚ် ပ္ဍဲဂိတုအဝ်ဂါတ် ၁၉ ကဵု ၂၀ တေံဂှ်လေဝ် သၞေဟ်ကၚ်စၟဳတ်ဖယျာမေဝ် ဗ္ဒါဲကွာန်မံၚ်မေဝ်ယှံၚ် ပွိုၚ်ဍုၚ်ထဝါဲဂှ် ဒးဒုၚ်ဗ္တိုက်လဝ် ကဵုသနာ်ပါ ၜါတ္ၚဲအဆက်က်တုဲ ကောန်ဒပ်ကံၚ်ဇြဳပၞာန်ၜါတၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−YPPDF