မာဲချံက်၊ အဝ်ဂါတ် ၃၁
အတိုၚ်ကိုန်စဳမာန် ပရေၚ်ရပ်ဒက် ကောန်ကလောန်ဆုဲပြံၚ်ဟွံလုပ်သၞောဝ် ပ္ဍဲဍုၚ်သေံဂှ်တုဲ အပ္ဍဲပွိုၚ်ၜါဂိတုပြၚ်ဏံ စၟဳတ်လဝ် ကောန်ကလောန်ဆုဲပြံၚ်ၜါကိုဋ်ပြၚ်ဂှ် ပ္ဍဲကဵုဏံ ရေၚ်တၠုၚ်ကေတ်လဝ်အရေဝ် လၟိဟ်ကောန်ကလောန်ဍုၚ်ဗၟာ ၉၀၀ ပြၚ် အတိုၚ်သၞောဝ်ဏောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဝန်ဇၞော်သၟာကမၠောန်ဍုၚ်သေံရ။
ကိုန်စဳမာန်ပွိုၚ် ၁၂၀ တ္ၚဲ ဂကောံဝန်ဇၞော်သၟာကမၠောန်ဍုၚ်သေံ သ္ဂောံရပ်ဒက်ကောန်ကလောန်ဆုဲပြံၚ် ဟွံဗဗွဲကဵုသၞောဝ်ဂှ် တုဲကၠုၚ်ဂိတုဂျောန် ၅ တေံ စစၟဳတ်လဝ်ရ။
အတိုၚ်ကိုန်စဳမာန်ပရေၚ်ရပ်ဒက် ကောန်ကလောန်ဆုဲပြံၚ် ဟွံလုပ်သၞောဝ်တံဂှ်မ္ဂး စဵုကဵုဂိတုအဝ်ဂါတ် ၂၂ အပ္ဍဲပွိုၚ် ၇၈ တ္ၚဲဂှ် စၟဳတ်ဂွံလဝ် ကောန်ကလောန် ၂၀၈၀၀၀ ပြၚ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဂကောံဝန်ဇၞော်သၟာကမၠောန်ဍုၚ်သေံဂှ်ဝွံ စၟဳတ်လဝ် ဒၞါဲကောန်ကလောန်နွံ ၁၅၇၀၀ ပြၚ်ဂှ်တုဲ ပ္ဍဲကဵုဏံ ကေတ်လဝ်အရေဝ် ၅၃၉ ဒၞါဲရောၚ် သ္ဂးရ။
အတိုၚ်တၚ်လလောၚ်တြးဂှ်မ္ဂး ကောန်ကလောန်ဍုၚ်ဗၟာ ၉၁၇ တၠ၊ ကောန်ကလောန်ကာမ္ဗောဒဳယျာ ၂၀၈ တၠ၊ ကောန်ကလောန်လာအိုဝ် ၁၈၈ တၠ၊ ကောန်ကလောန်ဗဳယေတ်နာမ် ၂၆ တၠ ကေုာံ ကောန်ကလောန်တၞဟ်သ္အာၚ် ၁၀၂ တၠတံဝွံ ဒးဒုၚ်ကေတ်အာအရေဝ် အတိုၚ်သၞောဝ်ဏောၚ် မဒှ်ရ။
ဟိုတ်နူအကာဲအရာ ပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ပိုန်ဒြပ်၊ ပရေၚ်မၞိဟ်နာနာသာ် မက္တဵုဒှ်ဒၟံၚ် ပ္ဍဲကၟိန်ဍုၚ်ဗၟာဂှ်ကဵု ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တံတုဲ သၟတ်နွံပ္ဍဲဍုၚ်ဂမၠိုၚ်ဝွံ နကဵုနဲကဲနာနာသာ် တိတ်ကၠုၚ်ဍုၚ်သ္အာၚ်တံ ဂၠိုၚ်ကၠုၚ်ရ။
ဗွဲတၟေၚ် ဍုၚ်သေံကြပ်အိုတ်ကုဍုၚ်ဗၟာ အာကၠုၚ်လောဲသွာအိုတ်ဂှ် နကဵုဂၠံၚ်လုပ်သၞောဝ်ကီု ဂၠံၚ်ဟွံလုပ်သၞောဝ်တံကီု လုပ်စိုပ်ကၠုၚ် ဂၠိုၚ်နူကဵုကၠာတေံရ။
နူကဵုဒေသပယျဵု သေံ−ဗၟာ ဏံမွဲကဆံၚ် သၟာကမၠောန်ဆုဲပြံၚ်ဍုၚ်ဗၟာ ဟွံလုပ်သၞောဝ် လိက်တၞးသက်သဳဟွံမွဲတံဂှ်ဝွံ မွဲဏှမွဲဏှဟီုဂွံ ဒးဒုၚ်ရပ်ဒၟံၚ်ရောၚ် ဂွံတီကေတ် ဇရေၚ်ညးရေၚ်တၠုၚ်ပရေၚ်သၟာကမၠောန်တံရ။
ပရိုၚ်−သြၚ်လောန်တိုၚ်(မ်)
ဗီု−Thai Police Center