ဒိုက်ဥူ၊ သေပ်တေမ်ဗာ ၂၁
ပ္ဍဲကဵုထံၚ်ဒိုက်ဥူ ရးဗဂေါ မြဟ်ဒၟံၚ်နကဵုယၟုပရေံပရေံဂှ် ပ္ဍဲကောန်ထံၚ်ပရေၚ်ဍုၚ်ကွာန်မွဲတၠ နကဵုတၚ်စောဲစပ် ဂွံဆဵုကေတ် တၞးလိက်ရပ်စပ် ပ္ဍဲအရာခၟူၜံက်တံဂှ်တုဲ ညးဇၞော်ထံၚ်တံ ၜုၚ်တက်ပျဲပျာံလဝ်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM ရ။
သ္ကိုပ်ဗ္ဒမ်ထံၚ် ယျေဝ်ထောဋ်ဝေန် ကေုာံ ဒုအကြာပ်ဒပ် သဝ်အံၚ်ကိုဝ်လေတံ ဂွံဆဵုကေတ် သၞော်ၜံက်တံဂးတုဲ ကောန်ထံၚ်ပရေၚ်ဍုၚ်ကွာန်မွဲတၠ ဒးဒုၚ်ဖျေံစၟတ်လဝ် ဒဏ်ထံၚ်ပိသၞာံ နကဵုၝောံပိုဒ် ၅၀၅ ဂှ် ပ္ဍဲဂိတုသေပ်တေမ်ဗာ ၁၄ တုဲကၠုၚ်တေံ ၜုၚ်တက်ပျဲပျာံလဝ်ရ။
ပွမၜုၚ်တက်ကောန်ထံၚ်ပရေၚ်ဍုၚ်ကွာန်ဂှ် သ္ကိုပ်ဗ္ဒမ် ယျေဝ်ထောဋ်ဝေန် သ္ကိုပ်သ္ကတုဲ လိုန်က္ဍိုပ်ကောန်ထံၚ်ဂှ် နကဵုဒၞပ်ပၞာန်ကီု၊ တေအ်ထၞိက်မုက် နကဵုဒၞပ်ပၞာန်သၟးဟွံက ဒဒှ်ရကၠောန်သ္ပၜုၚ်တက်လဝ် ဗွဲမသ္ကာတ်မြဟ်တုဲ ကလိဂွံလဝ်ဝပ် ဇၞော်ကဵုဇြဟတ်ရ။
ကိုဝ်တိုက်ထောန်ဥူ ကောန်ကမ္မတဳက္ဍိုက်ပ် PPNM ဂှ် “အခိၚ်ၜုၚ်တက်ဂှ်လေဝ် ၜုၚ်တက်ဟွံမွဲကဵုပွဗ္စာရဏာ တေအ်ထၞိက်က္ဍိုပ် တေအ်ထၞိက်မုက်တံသၟးဟွံက ဒးဒုၚ်ၜုၚ်တက်လဝ် သီုကဵုလေံ (ဝါးဆစ်ပိတ်တုတ်) တံဂှ်တုဲ လက္ကရဴစး ကလိဂွံလဝ်ဝပ်စာ်ခွာတ်တံရ” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ပ္ဍဲကဵုထံၚ်တံဂှ် ကၟာတ်လဒဵုလဝ် အခေါၚ်သုၚ်ၜံက်ကီုလေဝ် ညးယိုက်ဝန်ထံၚ်စာတ်တံ ဂွံဂွံသြန်လုပ်အကြာတုဲ ပၠောပ်နၚ် ထုပ်ၜံက်တံကဵု ဂဥုဲတၞးတံဂှ်တုဲ သွံတြးဒၟံၚ်ရောၚ် သ္ဂးရ။
သ္ကိုပ်ဗ္ဒမ် ၅ ထံၚ်ဒိုက်ဥူ မၜုၚ်တက်လဝ် ကောန်ထံၚ်ပရေၚ်ဍုၚ်ကွာန်တံ ကေုာံ ညးယိုက်ဝန်ထံၚ်စာတ် ပါလုပ်လဝ် ပ္ဍဲကဵုပရေၚ်ၜုၚ်တက်တံဂှ် အခိၚ်ကာလအပြံၚ်အလှာဲ သွက်ဂွံကေတ်ကဵုဗဗွဲဓဝ်ဂှ် စၟတ်သမ္တီလဝ် ဗွဲမစှ်ေကဵုသၞောတ်ရောၚ် PPNM ကဵုလဝ်သတိရ။
အတိုၚ်တၚ်နၚ် ဂကောံမၚ်မွဲကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ ညးဍုၚ်ကွာန်ကောန်အရာပ် ၂၇၀၀၀ ပြၚ်နွံတုဲ ပ္ဍဲကဵုဏံ ၂၀၀၀၀ ပြၚ် ဆက်ဒးဒုၚ်ထိၚ်ဒဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Google