နျူယျံက်၊ သေပ်တေမ်ဗာ ၂၄
အကြာအေဿရေ ကေုာံ ဂကောံဟေဿဗိုဝ်လာ နွံလက်ဗနန် အလဵုအသဳတဳဟဳရာန် ထံက်ပၚ်ကဵုလဝ်ဂှ် ကြပ်ပွိုၚ်မွဲသၞာံ ညံၚ်ဂွံပါလုပ်ကၠုၚ် ပ္ဍဲပဋိပက္ခ ဂၠါဲသၞတုဲ ပ္ဍဲသ္ကုတ်လဒေါဝ်အာယှ ညံၚ်ပေါဲပၞာန်ဂွံဒှ်က္ဍိုပ်ကၠံပေၚ်ၚ်ဂှ် အေဿရေ ခၞံဗဒှ်ဒၟံၚ်တုဲ ဒဒှ်ရဖဵုအဆက်လက္ကရဴ ကလေၚ်ပလေဝ်ဟွံဂွံတံ ဒှ်ကၠုၚ်မာန်ဂှ် သမ္မတအဳရာန် ကဵုလဝ်သတိ ပ္ဍဲဂိတုသေပ်တေမ်ဗာ ၂၃ တေံရ။
သွက်ဂွံတိုန်စိုပ် ကောံဓရီုနာနာ ကုလသမဂ္ဂတုဲ စိုပ်ကၠုၚ်နျူယျံက်တုဲ ပ္ဍဲအရာဟီုကဵု အ္စာပရိုၚ်ဂမၠိုၚ်ဂှ် သမ္မတအဳရာန် မာသတ် ပဳဇက်ခဳယာန်ဂှ် နကဵုညးတံ ပ္ဍဲသ္ကုတ်လဒေါဝ်အာယှဂှ် ဟွံမိက်ကဵုဒှ်ဍုၚ် မဖန်ဗဒှ်ပရေၚ်ဟွံညိၚ်ဝတ်တံဂှ်တုဲ ဖဵုအဆက်လက္ကရဴဂမၠိုၚ်ဝွံ စဵုကဵုကလေၚ်ပလေဝ်ဟွံဂွံ အကာဲအရာပရေံကၠုၚ်မာန်ဂှ် ဟီုလဝ်ရ။
နကဵုညးတံ ဟွံမွဲပၟိက်ကဵုပေါဲပၞာန်တုဲ မိက်ဂွံမံၚ်တဴ ဗွဲမၜိုဟ်လလမ်တုဲ ညံၚ်ပေါဲပၞာန်ဇၞော် ဇြဟတ်ၜိုတ်နွံ မ္ဒးပ္တိတ်ကၠေံ ဂွံဒှ်ကၠုၚ် ဖန်ဗဒှ်ဒၟံၚ်ဂှ်ဝွံ ဒှ်အေဿရေရဏောၚ်ဂှ် သမ္မတအဳရာန် ဟီုရ။
သီုကဵုကတိပါၚ် ရပ်စပ်အာ မူဝါဒကာဍုၚ်သ္အာၚ် မစှ်ေကဵုဗျူဟာတံဂှ် ပ္ဍဲဂိတုဂျူလာၚ်တုဲကၠုၚ်တေံ သမ္မတ ပဳဇက်ခဳယာန် ဂွံဒုၚ်ရုဲစှ်လဝ်ဂှ် အခိၚ်အေဿရေ ကလိလောန်ဒၟံၚ် ပရေၚ်ဂစိုတ်ကမၠက်ဂကူမၞိဟ် ပ္ဍဲဂါဇြာ ဗွိုၚ်ဍုၚ်သ္အာၚ်တံ သ္ၚိတ်ဇြဟတ်ဒၟံၚ်ရောၚ် စောဲစပ်လဝ်ရ။
ပ္ဍဲဂိတုသေပ်တေမ်ဗာ ၂၃ တေံ ကြဴနူအေဿရေ ဗ္တိုက်ကဵုပၞာန်ကျာ ကုပွန်ဂကောံဟေဿဗိုဝ်လာ မၞုံပ္ဍဲဍုၚ်လက်ဗနန်ဂှ်တုဲ တၚ်ဖ္တိုက်ဖ္အောဝ် သမ္မတ ပဳဇက်ခဳယာန် သ္ဂောံသောၚ်ကလး ပြသၞာသ္ကုတ်လဒေါဝ်အာယှတံ နူကဵုပရေၚ်သဳကၠဳဂှ် မံက်တိတ်ကၠုၚ်လဝ်ရ။
ပ္ဍဲပဋိပက္ခ အကြာအေဿရေ ကေုာံ ဟေဿဗိုဝ်လာဂှ် အဳရာန်ပါလုပ်အာဟာ စပ်ကဵုသၟာန်ဏံတုဲ ကုဂကောံလဵုဟွံဟီု မတဝ်စၞေဟ် စဵုဒၞါဒၟံၚ် အခေါၚ်အရာညးတံ၊ ပရေၚ်ဂျိုၚ်တဴညးတံဂှ် နကဵုအဳရာန် ရီုဗၚ်ကဵုအာဏောၚ် ကလေၚ်သှ်လဝ်ရ။
အကြာအေဿရေ ကေုာံ ဟေဿဗိုဝ်လာဂှ် ဒှ်ဒၟံၚ်ပန်ပှော် ကြပ်အရိုဟ်တ္ၚဲတုဲ သီုၜါလ္ပာ်ဂှ် ကောန်အရာပ်ဂၠိုၚ်ကဵုလ္ၚီ ဒးဂြိပ်ဒဴလဝ်ရ။
နကဵုညးတံ ဟွံမွဲပၟိက်ကဵုပဋိပက္ခတုဲ ဆမိက်ဂွံဗတုဲဒှ်ကၠေံ ပေါဲပၞာန်ဂါဇြာရဏောၚ်ဂှ် ဂကောံဟေဿဗိုဝ်လာ ဟီုလဝ်ရ။
သွက်ပေါဲပၞာန်ဂါဇြာ ဂွံတုဲဒှ်အာဂှ် မ္ၚးနူကဵုအဳဂျေတ်၊ ကာတာတံဂှ် အမေရိကာန် မထံက်ဒၟံၚ်ဂလာန် ကုအေဿရေတံ လုပ်အကြာပ္ညဳပ္ညပ် ပ္တိတ်ဒၟံၚ်ဇြဟတ်ကီုလေဝ် ဆက်အာဂတဟွံဂွံ ဒှ်ဒၟံၚ်ရ။
ဇၞော်သ္ကိုပ်မူဝါဒကာဍုၚ်သ္အာၚ် သမဂ္ဂဥရဝ်ပ ဂျဵူဇက် ဗိုဝ်ယဴဂှ် ပဋိပက္ခ အကြာအေဿရေ ကေုာံ ဂကောံဟေဿဗိုဝ်လာတံဝွံ ဒှ်ကၠုၚ်ဒၟံၚ် ညံၚ်ရဴပေါဲပၞာန် ဒးပ္တိတ်ဇြဟတ်ၜိုတ်နွံတုဲ ဒးဗ္တိုက်အာမွဲဏောၚ်ယျဂှ် ကဵုလဝ်သတိရ။
Ref; Reuters