ဗာတဳကာန်သဳတဳ၊ သေပ်တေမ်ဗာ ၂၅
သွက်ဂွံကလေၚ်ဗလးကဵု က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ မဒးဒုၚ်ရပ်လဝ် ပ္ဍဲဍုၚ်ဗၟာဂှ်ကီု ကဵုအာအခေါၚ်ဇူဒီု အပ္ဍဲတွဵုဒၞက် နန်ဗာတဳကာန်ဂှ်ဏောၚ်ဂှ် Pope ဖရာန်သေတ် ဟီုကၠုၚ်လဝ်ဂှ် ဌာန်ပရိုၚ်အဳတလဳတံ ထ္မံက်ထ္ၜးလဝ် ပ္ဍဲဂိတုသေပ်တေမ်ဗာ ၂၄ တေံရ။
နကဵုညး ဒဒှ်ရအာတ်မိက်အာ ပရေၚ်ဗၠးၜး ဒဝ်အံၚ်သာန်သုကျဳဂှ်ကီု၊ ဒဒှ်ရဆဵုဂဗလဝ် ကောန်ဒဝ်အံၚ်သာန်သုကျဳ ပ္ဍဲရဝ်မ တုဲဂှ်ကီု၊ သွက်ဂွံကဵုအခေါၚ်ဇူဒီု အပ္ဍဲတွဵုဒၞက်ညးတံဂှ် ဒဒှ်ရညးပ္တိုန်လဝ်ဂလာန် ပ္ဍဲနန်ဗာတဳကာန်ဂှ် Pope Francis ဟီုလဝ်ရ။
စပ်ကဵုအကာဲအရာ မက္တဵုဒှ်ဒၟံၚ် တ္ၚဲဏံတုဲ ပိုယ်တံ ကဟဳဒၟံၚ်ဟွံဂွံ၊ ဒးကၠောန် မွဲမွဲသာ်ဏောၚ်ဂှ် Pope Francis ဟီုရ။
သွက်ညးဂမၠိုၚ် ဂွံခိုဟ်စ၊ သွက်သၞောတ်ဒဳမဝ်ကရေဇြဳ ဇၟာပ်ပ်မၞိဟ် ပါလုပ်ရီုဗၚ်မာန်ဂှ် အနာဂတ်ဍုၚ်ဗၟာဝွံ သ္ဒးကလိဂွံပရေၚ်ၜိုဟ်လလမ် မဒုၚ်သ္ဇိုၚ်ကဵု ဂုဏ်သိက္ခာ၊ အခေါၚ်အရာမၞိဟ် ကေုာံ ပရေၚ်ရှ်ေသှ်ေတံဂှ်ဏောၚ်ဂှ် Pope Francis ဟီုရ။
ဒဝ်အံၚ်သာန်သုကျဳ အာယုက် ၇၉ သၞာံဂှ် စပ္တံနူကဵုပရေၚ်ဒ္ဂေတ်လီုစလာပ် စဵုကဵုဟွံဒ္ဂေတ်ဗက်စဳပၞောန်ကဝ်ဝေဒ် နကဵုတၚ်စောဲစပ်နာနာသာ်ဂှ် ဖျေံစၟတ်လဝ် ဒဏ်ထံၚ် ၂၇ သၞာံတုဲ ပ္တိုန်ရုၚ် ကၟာတ်တြၚ်တုဲ စၟဳတ်ညးဂှ်ဝွံ ကၠောန်ဒၟံၚ်ညံၚ်ညးဂွံကၠေံအာ နူပရေၚ်ဍုၚ်ကွာန်ဏောၚ်ဂှ် ဂကောံအခေါၚ်အရာမၞိဟ်တံ ဟီုလဝ်ရ။
စပ်ကဵု Pope Francis ဟီုကၠုၚ်သာ်ဏံဂှ်တုဲ ဆက်စၠောံလဝ် ဇရေၚ်ညးမၞုံအခေါၚ်ဟီုဂး ကံၚ်ဇြဳပၞာန်ကီုလေဝ် ဟွံဂွံလဝ်အဆက်ရ။
ကောန်ဒဝ်အံၚ်သာန်သုကျဳ ကေန်အာရေတ်ဂှ်တှ်ေ ဟိုတ်နူကဵုကၠုၚ်အခေါၚ်စ္ၜုဲစ္ၜော်သာ်ဏံတုဲ မိညး တၚ်တဴဂုဏ် ကု Pope Francis ဏောၚ်ဂှ် ဟီုလဝ်ရ။
ဆ္ဂး ဟိုတ်နူမၞိဟ်ဒးဂၞပ် ဒဝ်အံၚ်သာန်သုကျဳ အပ္ဍဲဍုၚ်ကီု၊ မ္ၚးဍုၚ်ကီု ဂၠိုၚ်တုဲ နကဵုကံၚ်ဇြဳပၞာန် သွက်ဂွံကဵုအာအခေါၚ်ဂှ် ဒုၚ်တဲချပ်ကဵုအာဟွံသေၚ်ပုဟ်ဂှ် ကေန်အာရေတ် သ္ဂးရ။
ဒပ်ပၞာန်ဝွံ နူစသီအဝဵုတုဲ ရပ်ဒက်လဝ် ဒဝ်အံၚ်သာန်သုကျဳတုဲ အတိုၚ်မဳဒဳယျာ အပ္ဍဲဍုၚ်တံ ထ္မံက်ထ္ၜးလဝ်ဂှ်မ္ဂး ဒဝ်အံၚ်သာန်သုကျဳဝွံ ဒးဒုၚ်စသိုၚ်ဒၟံၚ် ပြသၞာပရေၚ်ထတ်ယုက် ပါလုပ်သီုကဵုယဲဇွိုန်ၚေက်တံဂှ် ဟီုကၠုၚ်လဝ်ရ။
Ref: DailyMail