ဇြပ်ဗု၊ သေပ်တေမ်ဗာ ၂၈
ကောန်ဂကောံရီုဗၚ်ဟံၚ်ပြာ် (ပိုင်ရှင်မဲ့) မဒှ်ဂကောံရီုဗၚ်ဖျေံသ္ဇိုၚ်ဍုၚ်ဇြပ်ဗု တွဵုရးဍုၚ်မန်တံ ကြဴနူဒးဒုၚ်ရပ်ဒက်တုဲဂှ် ဂကောံရီုဗၚ်ဟံၚ်ပြာ်ဗွဲမဂၠိုၚ် ဒေါအ်ဇူကၠုၚ် ကမၠောန်ရီုဗၚ်တံအိုတ်ဂှ် ကောန်ဂကောံဟွံမိက်ထ္မံက်ယၟုတံ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ အပ္ဍဲဂိတုသေပ်တေမ်ဗာ သတ္တာဟတတိယဂှ် ရပ်ဒက်လဝ် ဥက္ကဌဂကောံရီုဗၚ်ဟံၚ်ပြာ် (ပိုင်ရှင်မဲ့) ဥူယျေဝ်မေန်ထိုက် မပါလုပ် ကောန်ဂကောံဒ္စိတ်တၠ နကဵုတၚ်စောဲစပ် ဆက်စပ်ကဵု ဒပ်စဵုဒၞါညးဍုၚ်ကွာန် PDF ၊ ပါလုပ်ရီုဗၚ် ပ္ဍဲအရာပလံၚ်ဗစိုပ်လွဟ်လက်နက်တံဂှ်ရ။
ကောန်ဂကောံရီုဗၚ်ဟံၚ်ပြာ် (ပိုင်ရှင်မဲ့) ဒးဒုၚ်ရပ်တံဂှ်ဝွံ ပ္ဍဲအရာရေၚ်တၠုၚ်ကမၠောန်ရီုဗၚ်တံဂှ် ကြေပ်အကြာၜါလ္ပာ်တုဲ ဒးဒုၚ်ရပ်လဝ်ရောၚ် ပရိုၚ်မံက်တိတ်ဒၟံၚ်ဂှ်ရ ဂကောံရီုဗၚ်ဟံၚ်ပြာ်သှ်ေတံလေဝ် ဂွံကၠောန်ကမၠောန်ရီုဗၚ်တံဂှ် ဒှ်ကၠုၚ်ဓဝိၚ်အိုတ်ရ။
ဂကောံရီုဗၚ်ဟံၚ်ပြာ်တံ ဒေါအ်ဇူကၠုၚ်ဂှ်ရ နဒဒှ်ဖဵုအဆက်လက္ကရဴဂှ်တှ်ေ နကဵုမၞိဟ်ယဲ အပ္ဍဲဒေသတံ ဂွံအာကၠုၚ် ရုၚ်ဂဥုဲ၊ ဗ္ဒမ်ဂဥုဲ ကာမံက်တိုန် ဒှ်ကၠုၚ်ဒဒိုက်ဏောၚ်ဂှ် ဂွံတီကေတ်ရ။
ကောန်ဂကောံရီုဗၚ်ဟံၚ်ပြာ် (ပိုင်ရှင်မဲ့) ဒးဒုၚ်ရပ်လဝ်တံဂှ် လ္ပာ်ကံၚ်ဇြဳပၞာန် စၟဳတ်သၟာန်သၟုက်ဒၟံၚ် ပ္ဍဲဒၞါဲစၟဳတ်ဝါကလိ ဒပ်ဖျေံသ္ဇိုၚ်ဇြပ်ဗုတံဂှ်တုဲ ဒဵုကဵုအခိၚ်လၟုဟ် ဟွံကလေၚ်ဗလးကဵုဏီပုဟ်ဂှ် ဂွံတီကေတ်ရ။
ပ္ဍဲပွိုၚ်ဍုၚ်ဇြပ်ဗု အပ္ဍဲကာလသီအဝဵုဏံ နကဵုတၚ်စောဲစပ် အခိၚ်အာပလံၚ်မၞိဟ်ယဲ ဖံက်ပလီုသၞောဝ်တိတ်ဗ္တံဟွံဂွံတံဂှ်ကီု၊ တက်ဗီုရုပ် ဇွကောန်ဒပ်ကံၚ်ဇြဳပၞာန်တံတုဲ ပ္တိုန်လ္တူလပှ်ကျာတံဂှ်တုဲ ဒပ်ကံၚ်ဇြဳပၞာန် ရပ်ဒက်လဝ် ကောန်ဂကောံရီုဗၚ်ဟံၚ်ပြာ်ပိတၠ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−ဂကောံရီုဗၚ်ဟံၚ်ပြာ် (ပိုင်ရှင်မဲ့)