တၞၚ်သဳ၊ သေပ်တေမ်ဗာ ၂၇
အပ္ဍဲပေါဲဗ္တိုက် မက္တဵုဒှ်ဆက်ဒၟံၚ် အပ္ဍဲပွိုၚ်ဍုၚ်တၞၚ်သဳ ရးတၞၚ်သဳဂှ် ၜါလ္ပာ်ဇီုကပိုက်ချိုတ်တံ နွံဒၟံၚ်ရောၚ် ဂွံတီကေတ် ဇရေၚ်ဒပ်စဵုဒၞါညးဍုၚ်ကွာန် ခရိုၚ်ဗိက် ကရောၚ်ပၞာန်ပံၚ်ကောံ ၁ ရ။
လ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကဵုဂကောံကွာန်ဗာန်ဠဝ် ကဵု ကွာန်(ခြောက်မိုင်) နကဵုဇြဟတ်ဒပ် ပွဳပွူ ၃၀၀ ဂှ်တုဲ အကြာဒပ်ပံၚ်ကောံစဵုဒၞါညးဍုၚ်ကွာန်တံဂှ် စနူဂိတုသေပ်တေမ်ဗာ ၄ စဵုကဵု ၂၂ ဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အတိုၚ်ဂလာန် ဂကောံဇြဟတ်ပၠန်ဂတးတံ ဟီုဂှ်မ္ဂး ကုဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် က္တဵုဒှ်ဒၟံၚ်ပေါဲဗ္တိုက်ဆေၚ်မုက် မွဲတ္ၚဲ ဟွံအောန်နူကဵုၜါဝါရောၚ် သ္ဂးရ။
ပ္ဍဲကဵုပေါဲဗ္တိုက်ဆေၚ်မုက် မက္တဵုဒှ်လဝ် ကြပ်ပွိုၚ် ၂၀ တ္ၚဲဂှ် ကောန်ဒပ်ကံၚ်ဇြဳပၞာန် ၃၀ ပြၚ် ချိုတ်အာလဝ်တုဲ ဟွံအောန်နူကဵု ၄၀ တၠ ဇီုကပိုက်ကလိဂွံလဝ်ဝပ်တုဲ နူကဵုကံၚ်ဇြဳပၞာန်ဂှ် သီဂွံလဝ် လွဟ် ၂ ဇကိုအ် ကေုာံ မကမ်ညိညဂှ် ညးဒုၚ်တာလျိုၚ် လလောၚ်ပရိုၚ် ဒပ်စဵုဒၞါညးဍုၚ်ကွာန် ခရိုၚ်ဗိက် ကရောၚ်ပၞာန်ပံၚ်ကောံ ၁ ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် ကောန်သ္ဂံၚ်လ္ပာ်ဒပ်ပံၚ်ကောံမဟာမိတ်ပၠန်ဂတးတံ မွဲတၠ ပြဟ်လလုဲအာလဝ်တုဲ ၁၁ တၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
အပ္ဍဲပေါဲဗ္တိုက်မက္တဵုဒှ်လဝ် ပ္ဍဲဂိတုသေပ်တေမ်ဗာ ၁၂ ဂှ် ကောန်ဒပ်ကံၚ်ဇြဳပၞာန်မွဲတၠ ဂြိပ်တိတ်တုဲ ဖျေံလဝ်လွဟ် ပ္ဍဲဒပ်ပံၚ်ကောံစဵုဒၞါညးဍုၚ်ကွာန်တံရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ အခိၚ်ထ္ပက်ကၠုၚ်ကရောၚ်ပၞာန် နူကဵုဒဒန်(ဗောဓိကမ်း) တၞၚ်သဳဂှ် ညးဍုၚ်ကွာန်ကောန်အရာပ် လ္တူဍုၚ် ဟွံအောန်နူကဵု ၂၀ တၠဂှ် ရပ်ဒက်လဝ် နဒဒှ်ဇွောံစဵုဒၞါပၞာန်တုဲ စိုပ်ကွာန်ဗာန်ဠဝ်မှ ကလေၚ်ဗလးကဵုလဝ်ဂှ် ဂွံတီကေတ်ရ။
အခိၚ်ထ္ပက်ကရောၚ်ပၞာန်ဂှ် ဒပ်ကံၚ်ဇြဳပၞာန် ဗ္တိုက်ဒၟံၚ်ပ္ဍဲကွာန်တံ သီုလွဟ်ဇၞော် သီုထောံမခတိုဟ်နကဵုဒရုၚ်တံဂှ်တုဲ နူကဵုကွာန်ကျဲထုၚ်ကုန်၊ ဗာန်ဠဝ်၊ ဗာန်လေန် ကေုာံ ကွာန်ညံၚ်ပေန်ကုန်တံဂှ် ညးဍုၚ်ကွာန်ဒေသ ၄ တၠ ချိုတ်တုဲ ဟွံအောန်နူကဵု ၉ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်လ္ၚဵုတံလေဝ် ဇီုကပိုက်လီုလာ်အာလဝ်ရောၚ် သ္ဂးရ။
ကရောၚ်ပၞာန်ကံၚ်ဇြဳပၞာန်ဏံဝွံ ဆက်နွံဒၟံၚ် လ္ပာ်ဂကောံကွာန်ဗာန်ဠဝ်တုဲ ပ္ဍဲဂိတုသေပ်တေမ်ဗာ ၂၄ တေံဂှ်လေဝ် ဗ္ဒါဲကွာန်ဗာန်လမွတ် ဂၠံၚ်ဇၞော်ပျဳထံၚ်သုဂှ် ပေါဲဗ္တိုက်ၜါလ္ပာ် က္တဵုဒှ်လဝ်တုဲ ဒဵုကဵုအခိၚ်လၟုဟ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
ပေါဲဗ္တိုက်တံဏံဂှ်တှ်ေ ဒပ်စဵုဒၞါညးဍုၚ်ကွာန် ခရိုၚ်ဗိက် ကရောၚ်ပၞာန်ပံၚ်ကောံ ၁၊ ကရောၚ်ပၞာန် ၂၊ တမ်ဒပ် KNLA (၁၁) ၊ ပကဖ ပဠဝ်၊ ဂကောံဒရုၚ်၊ ဂကောံဒရုၚ် ခရိုၚ်ဗိက် ကေုာံ ဂကောံဒရုၚ် ADF တံဒှ်တမ် ဒပ်ပံၚ်ကောံမဟာမိတ်ပၠန်ဂတးတံ ပံၚ်တောဲပါလုပ်ဗ္တိုက်လဝ်ရ။
တုဲကၠုၚ် ပ္ဍဲဂိတုအဝ်ဂါတ် သတ္တာဟလက္ကရဴအိုတ်ဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်(ခြောက်မိုင်) ပွိုၚ်ဍုၚ်တၞၚ်သဳဂှ် ပန်တ္ၚဲအဆက်က် ဒးဒုၚ်ဗ္တိုက်တုဲ ဗိုလ်ဇၞော်မွဲတၠ မပါလုပ် ကောန်ဂကောံဒပ်ကံၚ်ဇြဳပၞာန် ဟွံအောန်နူကဵု ၇ တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Myeik PDF