ၜၚ်ကံက်၊ နဝ်ဝေမ်ဗာ ၁၀
တၚ်သ္ဂုတ်သွာတ် အလဵုအသဳသေံ ကဵုအာအခေါၚ်ညးဆုဲပြံၚ်မံၚ်တန်တဴ ကေုာံ ကောန်ဍုၚ်အရၚ် ဂကောံမၞိဟ်အောန် ဗွဲမဂၠိုၚ်ဂၠေၚ် ဒှ်ကောန်ဍုၚ်ဂှ် နူကဵုကမ္မယှေန်အခေါၚ်အရာမၞိဟ်ကောန်ဂကူသေံ NHRC ဒုၚ်တၠုၚ်လဝ်ရ။
အစဳဇန်ဂကောံဝန်ဇၞော်ဂမၠိုၚ် မလလောၚ်တြးလဝ် ပ္ဍဲဂိတုနဝ်ဝေမ်ဗာ ၈ ဂှ် ရန်တၟံလဝ် သွက်ညးမံၚ်စံၚ်ပ္ဍဲဍုၚ်သေံ ဍာ်ဇမၠိၚ် ဟွံသေၚ်မ္ဂး ညးက္တဵုဒှ်မၞိဟ် ပ္ဍဲဍုၚ်သေံ ၄၈၃၀၀၀ ပြၚ်တံ သ္ဂောံကဵုအခေါၚ်ဒှ်ကောန်ဍုၚ်သေံရ။
လ္ဂောံကဵုမူဝါဒဏံ နူကဵုကံၚ်ဇြဳဂီုကၠီုကောန်ဂကူ မပ္တိုန်လဝ်ဂလာန်ဂှ်မ္ဂး စဳဇန်ရေၚ်တၠုၚ်အာ သွက်ဂွံကဵုကောန်ဍုၚ်အရေၚ် ဂကောံမၞိဟ်အောန်တံ ဒှ်ကောန်ဍုၚ်ဗွဲမလုပ်သၞောဝ်ဏောၚ် မဒှ်ရ။
အတိုၚ်မူဝါဒ ကလေၚ်ပလေဝ်လဝ်ဏံဂှ်မ္ဂး နကဵုညးမအာတ်ပ္တိုန်လဝ်ဂမၠိုၚ် ဒဒှ်ရဍိုက်ပေၚ်ကဵု ဍာ်ဒ္ကေဝ်ညးတံ မခုတ်လဝ်ဂှ်ကီု၊ ရာဇဝၚ်အတိက် စပ်ကဵုအမှုရာဇဝတ်တံဂှ် အလဵုညးတံ ဒးသ္ပဒတန်အာဏောၚ်တုဲ လၟေၚ်ကမၠောန်စၟဳတ်အေဂျေန်ဇြဳနာနာသာ် အခိၚ်လအ်တံဂှ် ဟွံဒးကေတ်ရပုဟ်ဂှ် ဂွံတီကေတ်ရ။
ပ္ဍဲကဵုကောံဓရီု ဖအိုတ်ကၠေံညးဟွံမွဲကဵုဍုၚ် မကၠောန်ဗဒှ်လဝ် ပ္ဍဲဍုၚ်ဂျဳနဳဗာ သၞာံ ၂၀၁၉ ဂှ် ဍုၚ်သေံ ကဵုလဝ်ကတိ သၞာံ ၂၀၂၄ ဏံ ဒဒှ်ရရေၚ်တၠုၚ်အာ ညံၚ်ညးဟွံမွဲကဵုဍုၚ်တံ ဂွံအိုတ်အးအာဏောၚ် မဒှ်ရ။
ပြဟ်ဟ်ဏံ ပ္ဍဲကဵုဍုၚ်သေံ ညးမမၚ်ဒၟံၚ် သ္ဂောံသ္ပဒတန်အကာဲအရာညးတံဂှ် နွံမံၚ် ၈၂၀၀၀၀ ပြၚ်တုဲ ပ္ဍဲကဵုဏံ အပံၚ်မၞိဟ် ၄၈၀၀၀၀ ပြၚ်ဝွံ ကလိဂွံအာ အခေါၚ်ဒှ်ကောန်ဍုၚ်ဏောၚ်ဂှ် သ္ကိုပ်ဝန်ဇၞော် ဗဴဓေါန်ဓါန် ယှေန်နာဝတ် ဟီုလဝ်ရ။
အစဳဇန်ဏံဂှ် ဒှ်အစဳဇန် မသၟဟ်တးကဵုအခေါၚ်အရာမၞိဟ်ဍုၚ်သ္အာၚ်တံဂှ်တုဲ သီုကဵုကိတ်ညဳကဵု သၞောဝ်သ္ဇိုၚ်ဒက်ပ္တန်ဍုၚ်သေံ၊ တၚ်တုပ်စိုတ် အခေါၚ်အရာစပ်ကဵုပရေၚ်ဍုၚ်ကွာန် ကေုာံ ဂကောံမှာဇန်ဍုၚ်နာနာတံဂှ်ရောၚ် အလဵုအသဳသေံ ဟီုရ။
လၟေၚ်ကမၠောန်ဏံဂှ် ကမ္မယှေန်အခေါၚ်အရာမၞိဟ် ကောန်ဂကူဂှ် ဒုၚ်တၠုၚ်ကီုလေဝ် ညံၚ်ပရေၚ်စလာပ်ဒ္ဂေတ်လီုတံ ဟွံဂွံမွဲ သွက်ဂွံရေၚ်တၠုၚ်အာဂှ် ဖ္တိုက်ဖ္အောဝ်လဝ်ရ။
သီုညးဖအိုတ် ဂွံဒှ်ကဆံၚ်တုပ်သၟဟ် တၚ်ရန်တၟံဏံ ဂွံအံၚ်ဇၞးဂှ် သွက်ဂွံထ္မံက်ရုပ်ရဴ မူဝါဒဏံဂှ် ကမ္မယှေန်အခေါၚ်အရာမၞိဟ် ဖ္တိုက်ဖ္အောဝ်လဝ် အလဵုအသဳရ။
Ref: Thethaiger/Bangkokpost