ပေါဲပၞာန်ယူကရုၚ် ညံၚ်အသိၚ်ဂွံသၠုၚ်တိုန် လ္ပကၠောန်ဂှ် ထြာပ် ဖ္တိုက်ဖ္အောဝ် ပူတေန်

နျူယျံက်၊ နဝ်ဝေမ်ဗာ ၁၂

တုဲကၠုၚ် ပ္ဍဲဂိတုနဝ်ဝေမ်ဗာ ၇ တေံ ဒဝ်နေဝ်ထြာပ် ကဵု ဗလာဒဳမာပူတေန်တံဝွံ တက်ကျာကဵုဖုၚ်တုဲ သဳကၠဳလဝ် အကာဲအရာပေါဲပၞာန်ယူကရုၚ်ရောၚ် နိဿဲကဵု ညးမစုက်လုက်ကဵု ကိစ္စဏံဂှ်တုဲ ပ္ဍဲဂိတုနဝ်ဝေမ်ဗာ ၁၀ တေံ Washington Post ထ္မံက်ထ္ၜးလဝ်ရ။

ထြာပ် ဂွံဇၞးလဝ် ပေါဲရုဲမာဲသမ္မတအမေရိကာန်ဂှ်ဝွံ ညံၚ်ပေါဲပၞာန်ယူကရုၚ် အသိၚ်ဂွံသၠုၚ်တိုန် လ္ပကၠောန်ညိဂှ် ကဵုလဝ်ကသပ် ဇရေၚ်သမ္မတရုယှာတုဲ ပ္ဍဲယူရောပ် ဇြဟတ်ပၞာန်ဝါယှေန်တာန် နွံဒၟံၚ်တၟာဂလိုၚ်ရောၚ် ဒဒှ်ရကဵုလဝ်သတိဂှ် Washington Post ချူလဝ်ရ။

အပ္ဍဲအခိၚ်ကာလစန်ဒက်မာဲတေံ ညံၚ်ပေါဲပၞာန်ယူကရုၚ် ဂွံတုဲဒှ်အာ အပ္ဍဲပွိုၚ် ၂၄ နာဍဳဂှ် ကၠောန်အာဏောၚ် ထြာပ် ဟီုလဝ်ရ။

ဆ္ဂး ကြဴနူပၞာန်ဂၠးကဝ်ဒုတိယတုဲဂှ် ပေါဲပၞာန်ဇၞော်အိုတ် က္တဵုဒှ်ဒၟံၚ် ပ္ဍဲယူရောပ်ဏံ ဂွံတုဲဒှ်အာ ညးကၠောန်အာသာ်လဵုရောဟီုဂှ် ဟီုပ္တိတ်လဝ်ဟွံမွဲရ။

ဒဝ်နေဝ်ထြာပ်ဝွံ ပ္ဍဲဂိတုနဝ်ဝေမ်ဗာ ၆ တေံ သဳကၠဳလဝ် ကုသမ္မတယူကရုၚ် ဗလာဒဳမာ ဇြဳလာန်သကဳတုဲဂှ် သဳကၠဳလဝ်ကဵု သမ္မတပူတေန် အဆက်က်ရ။

စပ်ကဵုအကာဲအရာ ဒဝ်နေဝ်ထြာပ် စိုပ်ကၠုၚ်ဇရေၚ်သ္ၚိဗု ခြာဟွံလအ်ဏံဂှ်တုဲ အကြာဍုၚ်နေတိုဝ်ဂမၠိုၚ် ပရေၚ်ဒှ်ဓဝိၚ် စပ်ကဵုတၚ်ဒတူလိုၚ် လ္တူမဟာမိတ်အမေရိကာန်တံဂှ် မံက်ကၠုၚ်ဒၟံၚ်ရ။

တုဲပၠန် ယူကရုၚ်ကလိဂွံဒၟံၚ် အရီုဗၚ်ပရေၚ်ပၞာန် နူကဵုအမေရိကာန် ဗွဲမဂၠိုၚ်ဂၠေၚ်ဂှ်လေဝ် ပ္ဍဲလက်ထက်ထြာပ် ဒှ်ကၠုၚ်သမ္မတဏံ အကာဲအရာဖေက်ဒှ်အာလံက်ဂတးဂှ်လေဝ် ဒှ်ဒၟံၚ်ဓဝိၚ်ရ။

ဂွံသဳကၠဳကဵု ထြာပ် ပရေၚ်ယူကရုၚ်ဏံဂှ် ပူတေန် ဒှ်ဒၟံၚ်ဒတုဲကီုလေဝ် တၚ်အာတ်မိက်ကရေမ္မလေန်တံဂှ်တှ်ေ ဂွံပြံၚ်လှာဲအာ ဟွံမွဲပုဟ်ဂှ် ဌာနဝန်ဇၞော်ကာဍုၚ်သ္အာၚ်ရုယှာ ဟီုလဝ််ရ။

ပူတေန်ဂှ်တှ်ေ သွက်ပရေၚ်ၜိုဟ်လလမ်ယူကရုၚ်ဂှ် ထ္မံက်ထ္ၜးလဝ် တၚ်အာတ်မိက်ညးတံဂှ်တုဲ နကဵုယူကရုၚ် ပွမပ္တိတ်ဒြဟတ် သ္ဂောံဒှ်ကောန်ဂကောံနေတိုဝ်ဂှ် ဒးဒေါအ်အာဏောၚ်တုဲ နူကဵုဒေသညးတံ မသီဂွံလဝ် ပန်ဒေသဂှ်လေဝ် ဒပ်ယူကရုၚ်သီုဖအိုတ် သွက်ဂွံဆုတ်ကလေၚ်ကဵုဂှ် အာတ်မိက်လဝ်ရ။

ထြာပ်ဝွံ ကြဴနူဂွံဇၞးကေတ်ပေါဲရုဲမာဲတုဲဂှ် ပါဲနူကဵုပူတေန်ဂှ် သဳကၠဳလဝ် ကုသ္ကိုပ်ဝန်ဇၞော်ဂျာမနဳ အိုဝ်လာဖ် ယှူ၊ သမ္မတကိုဝ်ရဳယျာသၠုၚ်ကျာ ယောန်သက်ယောတံရ။

နကဵုယူကရုၚ် စၞးဒးရန်တၟံ သ္ဂောံကေတ်ဇၞးဂှ် ထေက်ကဵုဒးစွံအာရီု သွက်ဂွံဂွံပရေၚ်ၜိုဟ်လလမ်ဂှ် ဗရိုၚ်ယာန် လာန်ဇြာ ညးကဵုကသပ်ပရေၚ်ဍုၚ်ကွာန်ကဆံၚ်လ္တူ လ္ပာ်ထြာပ် ဟီုလဝ်ရ။

ဟိုတ်ဂှ်ရ နကဵုယူကရုၚ် ယဝ်ရပ္တိတ်ကၠုၚ်ဒြဟတ် သွက်ဂွံကေတ်ပရေၚ်ၜိုဟ်လလံမ္ဂး သ္ဂောံဒးဗလးအာတဲ ဒေသခရိုၚ်မဳယျာ မပါလုပ် တိဍာ်ရုယှာသီဂွံလဝ်တုဲတုဲ လၟုဟ်တံသီုဖအိုတ်ဂှ် နွံဒၟံၚ်ရ။

Ref: The Guardian