ဝါယှေန်တာန်၊ နဝ်ဝေမ်ဗာ ၁၉
ဒဝ်နေဝ်ထြာပ် ဂွံဇၞးလဝ် ပေါဲရုဲမာဲသမ္မတအမေရိကာန်ဂှ်ဝွံ သွက်ဂွံက္ဍိုက်ပ် ဂကောံအလဵုအသဳညး ဒဒှ်ရညးရုဲစှ်လဝ် မၞိဟ်မပထုဲဝိုၚ်တံဂှ်ဏောၚ်ဂှ် ဥက္ကဌကၠတ်ထဝ်သၟဝ် ရဳပါပလေတ်ကာန် ပ္ဍဲကၟိန်ဍုၚ်ကဆံၚ်သၠုၚ်အိုတ်ဂှ် ဟီုလဝ်ရ။
မၞိဟ်ထြာပ် မရုဲစှ်လဝ်ဂမၠိုၚ်ဂှ်ဝွံ ဒှ်မၞိဟ်မပြံၚ်လှာဲကၠေံ အကာဲအရာပကတိဏံတံဂှ်ရောၚ် ဥက္ကဌကၠတ်ထဝ်သၟဝ် မိုက်ဂျောန်သေန် ဟီုဏာလဝ် ပ္ဍဲကဵုဌာန်ပရိုၚ် CNN ပ္ဍဲအစဳဇန် State of the Union မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၁၇ တေံဂှ်ရ။
ထြာပ်ဂှ်တှ်ေ ရုဲစှ်ဒၟံၚ် မၞိဟ်မက္ဍိုက်ပ် ပ္ဍဲကဵုဂကောံအလဵုအသဳညးတၟိဂှ်ဖိုဟ်တုဲ ရံၚ်ကေတ် စဳဇန်လဝ် သွက်ဂွံပၠောပ်ပ္တိုန်စရၚ်ယၟု ညးမၞုံကဵုပရေၚ်ဆဵုဂဗ လ္ပာ်မူဝါဒ မဆက်စပ်ကဵုကဆံၚ်ဌာနန္တရ မဆေၚ်စပ်ဂမၠိုၚ်ဂှ်ရ။
ဟိုတ်ဒၟါနူမၞိဟ်ညးမရုဲစှ်လဝ်လ္ၚဵုတံဂှ်တုဲ ပ္ဍဲဝါယှေန်တာန် ပရေၚ်ဒှ်ဓဝိၚ်ဂွိၚ်ဂွါဲတံ က္တဵုဒှ်ဒၟံၚ်တုဲ သီုၜါဗော်ဂှ် ဂွိၚ်ဒၟံၚ်အိုတ်ရ။
ဆ္ဂး နကဵုညးမဒးဒုၚ်ပၠောပ်ပ္တိုန်စရၚ်ယၟုဂမၠိုၚ် ယဝ်ရဖ္ဍိုက်ဗပေၚ်တၚ်နွံပၟိက်ဂမၠိုၚ် ဟွံမာန်မ္ဂး စွံလဝ်အစဳဇန်ဒုတိယတုဲယျဂှ် ညးမစုက်လုက်ကဵုထြာပ်တံ ဟီုလဝ်ရ။
မၞိဟ်ထြာပ်မရုဲစှ်လဝ် နဒဒှ်ဝန်ဇၞော်ကာစဵုဒၞါ မၞုံယၟု ပိ ဟာတ်သက်ဂှ်ဝွံ ဒှ်ညးကယျာန်ပါဲလဝ် တၚ်စောဲစပ်ပရေၚ်ပကီုပရာပ် စပ်ကဵုလိၚ်မွဲရ။
မာတ်ဂေ ညးမဒှ်ကၠုၚ် ဂအုပ်ညးရေၚ်တၠုၚ်ဂဗုတ် ပ္ဍဲကဵုဂကောံအလဵုအသဳဂှ်ဝွံ ဒှ်ညးပါလုပ်ဒၟံၚ် ပ္ဍဲပရိုၚ်ဟောလဟောလံၚ် စပ်ကဵုဒ္ဂေတ်ဝတ်ဂှ် အဓိကမွဲရ။
ညးမရန်လဝ် နဒဒှ်ဝန်ဇၞော်ပရေၚ်ထတ်ယုက် မၞုံယၟု ရဝ်ဗာတ် အေဖ်ကနေဒဳ ဂျူနဳယျာဂှ်ဝွံ ဟိုတ်နူဂလာန်ပ္တိုန်ဒုဟ်ဟီုဂးလဝ် စပ်ကဵုဂဥုဲစဵုဒၞါတံဂှ်တုဲ ဒှ်ညးဒးဒုၚ်စၟဳတ်ဒၟံၚ်ရ။
အလဵုထြာပ်ဝွံလေဝ် အခိၚ်ဒးဆေၚ်ဒၟံၚ်မုက်ကဵု တၚ်စောဲစပ်ဗွဲမဂၠိုၚ်ဂၠေၚ် ပါလုပ်သီုကဵု ပရေၚ်ကဵုသြန်ကၟာတ်ပရိုၚ်ကိစ္စစပ်ကဵုလိၚ်ဂှ် ဂွံဇၞးလဝ် ပေါဲရုဲမာဲရ။
ကောန်ဗၠာဲထြာပ် ဒဝ်နေဝ်ထြာပ် ဂျူနဳယျာဂှ်ဝွံ စဵုဒၞါဟီုဂးဒၟံၚ် ကုပရေၚ်မအံၚ်ညးတေံ မရုဲစှ်လဝ်ဂှ်တုဲ နကဵုညးတံ ဒဒှ်ရတီကေတ်လဝ် မၞိဟ်ခိုဟ်၊ မၞိဟ်ပရေံတံရဂှ် ပ္ဍဲဂိတုနဝ်ဝေမ်ဗာ ၁၇ တေံ ဟီုလဝ်ကဵု ဌာန်ပရိုၚ် Fox News ရ။
Ref: BBC