ဝါယှေန်တာန်၊ နဝ်ဝေမ်ဗာ ၁၉
စပ်ကဵုအစဳဇန် သ္ဂောံရပ်စပ်အာ ဒပ်ပၞာန် ပ္ဍဲအရာဗက်ဗဒဴပ္တိတ် ကုညးဆုဲပြံၚ်မံၚ်တန်တဴ သက်သဳဟွံမွဲတံ ကဵုဂအုံဗွဝ်ဂှ်တုဲ သမ္မတအမေရိကာန် ဒဝ်နေဝ်ထြာပ် ဂွံဒုၚ်ရုဲစှ်လဝ်ဂှ် သ္ပဒတန် ထ္မံက်ထ္ၜးလဝ် ပ္ဍဲမဳဒဳယျာပရေၚ်မၞိဟ်ညးရ။
ထြာပ် လလောၚ်တြး အကာဲအရာကၟိန်ဍုၚ် ကာတၟေၚ်မွဲတုဲ ရပ်စပ်အာဒပ်ပၞာန်ဏောၚ်ဂှ်ရ ညးဆုဲပြံၚ်မံၚ်တန်တဴဂမၠိုၚ် ဂွံဒးဒုၚ်ဗက်ဗဒဴပ္တိတ်နူဍုၚ် ကဵုဂအုံဗွဝ် ဒှ်မာန်ရောၚ် ညးပ္တိုန်ထ္ၜးပရိုၚ်ဂမၠိုၚ် ဟီုဂးလဝ်တုဲဂှ် နူကဵုထြာပ် ဒဒှ်ရပရိုၚ်ဏံဍာံစၟတ်ဂှ် ကဵုကၠုၚ်လဝ်သမ္တီ နူကဵုမဳဒဳယျာပရေၚ်မၞိဟ်ညး မွဲကဆံၚ်ရ။
သွက်ဂွံရီုဗၚ်ကဵုအာ အေဂျေန်ဇြဳ အကံက်အခေါန် ကေုာံ ပရေၚ်ကောပ်ကာဲ ပရေၚ်မၞိဟ်လုပ် မၞိဟ်တာလျိုၚ်နွံ သ္ဂောံဗက်ဗဒဴပ္တိတ် ညးဆုဲပြံၚ်မံၚ်တန်တဴတံဂှ် ဒဒှ်ရပကောံအာ ဂကောံဒပ်မၚ်မွဲကောန်ဂကူတံဂှ်ဏောၚ်ဂှ် အပ္ဍဲအခိၚ်ကာလစန်ဒက်မာဲတေံ ထြာပ် ဟီုကၠုၚ်လဝ် ဂၠိုၚ်ၚ်ကဵုဝါရ။
ပ္ဍဲဝၚ်ဍုၚ်အမေရိကာန် သွက်ပရေၚ်ဗက်ဗဒဴပ္တိတ်မၞိဟ်ကဵုဂအုံဗွဝ် ဇၞော်အိုတ်ဏံဂှ် နကဵုထြာပ် ညံၚ်ကတိညးဂွံဗိုန် ကၠောန်ၜိုတ်အာသာ်လဵုရော အခိၚ်တၚ်သၟာန်သာ်ဏံတံ မံက်တိတ်ကၠုၚ်ဒၟံၚ်ဂှ် ညး သ္ပဒတန်ကၠုၚ်လဝ်ရ။
ပ္ဍဲကဵုတ္ၚဲ ညးစယိုက်ဂၠေၚ်အာတာလျိုၚ် နဒဒှ်သမ္မတ ပ္ဍဲသၞာံ ၂၀၂၅ ဂိတုဂျာန္နဝါရဳ ၂၀ ဂှ် စထဍေၚ်ပ္တိတ်အာ ညးဆုဲပြံၚ်မံၚ်တန်တဴတံဂှ်ဏောၚ်ဂှ် ထြာပ် ဟီုကၠုၚ်လဝ် ဂၠိုၚ်ၚ်ကဵုဝါရ။
ဆ္ဂး နကဵုအလဵုအသဳအမေရိကာန် ၜိုန်စကၠောန်ကၠုၚ် အစဳဇန်ဏံ ဗွဲမလုပ်သၞောဝ်မာန်ကီုလေဝ် နကဵုသၞာဲဒဴဂမၠိုၚ် ဂွံဒးဂဗကၠုၚ် တၚ်ကော်ဆဴ စပ်ကဵုပရေၚ်ပလံၚ်ဗစိုပ်တံဂှ် နွံဒၟံၚ်ရ။
ညးယိုက်ဝန် ဗၞတ် ၂၀၀၀၀ ကဵုလဝ်တာလျိုၚ် သွက်အစဳဇန်ဏံဂှ် ဂၠိုက်ဂၠါဲရပ်ဒက်အာ ညးဆုဲပြံၚ်မံၚ်တန်တဴ ဂၠိုၚ်ကဵုပြကောဋိကိုဋ်တံမာန်ဟာဟီုဂှ် ညးစိစောန်ကၠိုဟ်ကေတ်ပရူဏံဂမၠိုၚ် ဒှ်ဒၟံၚ်သံသယအိုတ်ရ။
ယဝ်ရကၠောန်အာသာ်ဏံဏောၚ်မ္ဂး သြန်ဒးအိုတ်တၟာဂလိုၚ်ဏောၚ်ကီုလေဝ် ထြာပ်ဂှ်တှ်ေ နကဵုအလဵုအသဳညး ၜိုန်သြန်ဒးအိုတ် တၟာဂလိုၚ်ကီုလေဝ် ထ္မံက်အာရုပ်ရဴဏောၚ်ဂှ် ဟီုလဝ်ရ။
ဆ္ဂး ညးဂှ်တှ်ေ စပ်ကဵုအစဳဇန်ဏံတုဲ ၜိုတ်တၚ်နၚ်ဗွဲလစှ်ေ ဗၞတ်ညိညရဟေၚ် ထ္မံက်ထ္ၜးလဝ်ဂှ် ဂွံဆဵုကေတ်ရ။
ကောန်ဒပ်ဂမၠိုၚ် သ္ဂောံဂွံအခေါၚ်ဖျေံသ္ဇိုၚ် လ္တူတိအမေရိကာန်ဂှ် ဒဒှ်ရစဳဇန်လဝ် သ္ဂောံလလောၚ်တြး အကာဲအရာကာမံက်တိုန်ဂှ် ထြာပ်ဟီုကၠုၚ်လဝ် နူကၠာတေံတုဲတုဲရ။
အပ္ဍဲလက်ထက်အလဵုအသဳထြာပ် ပွိုၚ်ပန်သၞာံကၠာတေံဂှ် သီုနူကဵုပယျဵု သီုအပ္ဍဲဍုၚ်အမေရိကာန်တံဂှ် ဗက်ဗဒဴပ္တိတ်လဝ် ညးဆုဲပြံၚ်မံၚ်တန်တဴတံ ၁ ဒဿမ ၅ ပြကောဋိကိုဋ်ရ။
Ref: BBC