မတ်မလီု၊ နဝ်ဝေမ်ဗာ ၂၁
အလုံဍုၚ်မွဲ အပ္ဍဲသၞာံဏံ ပွိုၚ်ပန်ဂိတုဂှ် ဟိုတ်နူကံၚ်ဇြဳပၞာန် ဗ္တိုက်ကဵုက္ၜၚ်ကျာတံဂှ်တုဲ ကောန်ၚာ်သၟတ်ဂမၠိုၚ်မပါလုပ် ကောန်အရာပ် ၅၄၃ တၠ ချိုတ်အာလဝ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံချဳဒရာၚ်ပရေၚ်ထပိုတ်ရိုဟ်ကၞက်သြန်ဆီဍေက်ရ။
ပ္ဍဲသၞာံဏံ နူဂိတုဂျောန် စဵုကဵုအပ္ဍဲဂိတုသေပ်တေမ်ဗာဂှ် အလုံဍုၚ်မွဲ ကံၚ်ဇြဳပၞာန် ဗ္တိုက်ထောံကၠုၚ်လဝ်မခတိုဟ် နကဵုက္ၜၚ်ကျာဗ္တိုက်ဂှ် ၁၂၁၀ ဝါ၊ ကဵုဒရုၚ်ဂှ် ဗ္ဒါဲ ၁၀၀ ဝါနွံရ။
အတိုၚ်လိက်ဒုၚ်စဳရေၚ်ဂှ်မ္ဂး ပရေၚ်ဗ္တိုက်ကဵုက္ၜၚ်ကျာဂှ်ဝွံ စွံပွန်ဗ္တိုက်ကၠုၚ်လဝ် စမြိုၚ်သာသနာ၊ ဘာဗ္တောန်လိက် ကေုာံ ရုၚ်ဂဥုဲ ဗ္ဒမ်ဂဥုဲတံဒှ်တမ် မပ္တံကဵုဒၞါဲညးဍုၚ်ကွာန်ကောန်အရာပ်ဂမၠိုၚ် ပါလုပ်သီုကဵုကောန်ၚာ်သၟတ်၊ ညးဗြဴယိုက်ဂဝ်ဂၞဴ၊ ညးအာယုက်ဇၞော်ဇၞော်တံ မ္ဒးပြဟ်လလုဲဂၠိုၚ်မာန်တံဂှ်ရ။
ဟိုတ်နူပရေၚ်ဗ္တိုက်ဏံတုဲ ကောန်ၚာ်သၟတ် ၄၉ တၠကဵု ညးဗြဴ ၉၆ တၠ မပါလုပ် ညးဍုၚ်ကွာန်ကောန်အရာပ် အပံၚ်ဖအိုတ် ၅၄၃ တၠ ချိုတ်အာလဝ်တုဲ ၈၂၇ တၠ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ဟိုတ်နူပရေၚ်ဂကောံပၞာန်တံ ဗ္တိုက်ကၠုၚ်ကဵုက္ၜၚ်ကျာဂှ်တုဲ အပ္ဍဲပွိုၚ်ပန်ဂိတုဂှ် သ္ၚိ ၆၃၃ မ၊ စမြိုၚ်သာသနာ ၇၉ မ၊ ဘာဗ္တောန်လိက် ၂၆ မ၊ ရုၚ်ဂဥုဲ ကေုာံ ဗ္ဒမ်ဂဥုဲ ၁၁ မ၊ စမြိုၚ်စပ်ကဵုပရေၚ်ပိုန်ဒြပ် ၄၃၄ မ၊ ရုၚ် UN ၁ မ၊ ဗ္ဒိုပ်ပါဲဒဴဘဲပၞာန် ၂ ကေုာံ ထံၚ်စာတ် ၂ လီုလာ်ဆောံလေၚ်အာလဝ်ရောၚ် ထ္မံက်ထ္ၜးလဝ်ရ။
ဗက်ကဵုဒေသမ္ဂး ပ္ဍဲတွဵုရးသေံဂှ် ဒးဒုၚ်လဝ် ပရေၚ်ဗ္တိုက်ပၞာန်ကျာ နူကဵုကံၚ်ဇြဳပၞာန်တံ ဂၠိုၚ်အိုတ်တုဲ အပံၚ်ဖအိုတ် ကၠောန်ကၠုၚ်လဝ် ပရေၚ်ဗ္တိုက်ပၞာန်ကျာ ဟွံအောန်နူကဵု ၁၅၂ ဝါရ။
ကြဴနူပၞာန်သီအဝဵုတုဲဂှ် ဍုၚ်သ္အာၚ်တံ ကၟာတ်လဒဵုကၠုၚ်လဝ် ကမၠောန်ပရေၚ်ပိုန်ဒြပ်ကံၚ်ဇြဳပၞာန်တံဂှ်ကီုလေဝ် ဟွံစိုပ်တရဴဒှ်လဝ်တုဲ သွက်ဂွံဗ္တိုက်ထောံမခတိုဟ် ကုညးဍုၚ်ကွာန်ကောန်အရာပ်တံဂှ် ရာန်ကေတ်ဂွံဒၟံၚ် ကၠေၚ်က္ၜၚ်ကျာတံ ရုမ်မ်ဂပ်ပ်ဂှ်ရောၚ် သ္ဂးရ။
ဟိုတ်ဂှ်ရ နကဵုဂကောံဍုၚ်သ္အာၚ်ဂမၠိုၚ် သွက်ဂွံကေတ်ကဵုအရေဝ် ကုကမ္ပဏဳသွံတြးဒၟံၚ်ကၠေၚ်က္ၜၚ်ကျာ ဖျေံသ္ဇိုၚ်အပ္ဍဲဍုၚ်တံ၊ ကမ္ပဏဳဒုၚ်လျိုၚ်ဂၠံၚ်ဍာ်တံကဵု က္ၜၚ်ဖ္ဍိုက်ကဵုဒၟံၚ်ကၠေၚ်က္ၜၚ်ကျာတံ ဗွဲမစိုပ်တရဴဂှ် နွံဒၟံၚ်ပၟိက်ရောၚ် အာတ်မိက်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG