ကျာ်ထဝ်၊ နဝ်ဝေမ်ဗာ ၃၀
ကောန်ဂကောံရီုဗၚ်မှာဇန်(ကော့စနိုင်)မွဲတၠ မဖျေံသ္ဇိုၚ်အရာပ် (ကော့စနိုင်) ဍုၚ်ကျာ်ထဝ် တွဵုရးဍုၚ်မန်ဂှ် ဒးဒုင်ဖျေံစၟတ်လဝ်ဒဏ်ထံၚ် ၁၀ သၞာံ နကဵုတၚ်စောဲစပ် ထံက်ပၚ်ဂကောံဒပ်စဵုဒၞါညးဍုၚ်ကွာန် PDF တံဂှ်ရောၚ် ဂွံတီကေတ် ဇရေၚ်ညးမစုက်လုက်ကဵု ဂြောဝ်ဂတာညးရ။
ကုဥူမျအံၚ် ကောန်ဂကောံရီုဗၚ်မှာဇန် (ကော့စနိုင်) မဒးဒုင်ရပ်လဝ်ဂှ် ပ္ဍဲဂိတုနဝ်ဝေမ်ဗာ ၂၇ တေံ နူရုင်သၞောဝ်ဓဝ်ပွိုၚ်ဍုၚ်ကျာ်ထဝ် ကံၚ်ဇြဳပၞာန် ဖျေံလဝ်အမိၚ် ဒဏ်ထံၚ်ကဵုကမၠောန် ၁၀ သၞာံရ။
ကံၚ်ဇြဳပၞာန်ဂှ်တှ်ေ ဥူမျအံၚ် ကောန်ဂကောံရီုဗၚ်မှာဇန် (ကော့စံနိုင်) မဒးဒုၚ်ရပ်လဝ်ဂှ်ဝွံ ထံက်ပၚ်ကဵုဒၟံၚ်သြန် ဇရေၚ် PDF တံဂှ်ဂးတုဲ နကဵုတၚ်စောဲစပ်ဏံဂှ် ဖျေံစၟတ်လဝ်ဒဏ်ထံၚ် ၁၀ သၞာံ နကဵုသၞောဝ်ဗ္တိုက်သ္အးပွပကီုပရာပ် ၝောံပိုဒ် ၅၀ ညရ။
ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဂျောန် ၁၃ ကဵု ၁၄ တေံဂှ် နကဵုတၚ်စောဲစပ်ထံက်ပၚ် PDF တံဂှ် ရပ်ဏာလဝ် ကောန်ဂကောံရီုဗၚ်မှာဇန် (ကော့စနိုင်) ဥူမျအံၚ်၊ ကောန်ဝုတ်ညး မချေတ်သုရတနာ၊ ကိုဝ်ဆာန်တာအံၚ်၊ ဥူသဵုလှာၚ်တံ ပ္ဍဲကဵုသ္ၚိ၊ ပ္ဍဲကဵုဂၠံၚ်တံဂှ်ရ။
ကြဴနူဂှ်တုဲ ပံက်ဂဗုတ်ကေတ်ကၠုၚ်အရေဝ် ကုညးတံပန်တၠ နကဵုသၞောဝ်ဗ္တိုက်သ္အးပွပကီုပရာပ်တံဂှ်တုဲ နဒဒှ်အလန်ကိုပ်ကၠာအိုတ်ဂှ် ဖျေံစၟတ်လဝ်ဒဏ်ထံၚ် ကုဥူမျအံၚ် ကောန်ဂကောံရီုဗၚ်မှာဇန်ဂှ်ရ။
ဥူမျအံၚ် မဒးဒုၚ်ဖျေံလဝ်အမိၚ်ဂှ် ကံၚ်ဇြဳပၞာန် ပြံၚ်ပဆုဲဏာလဝ် ပ္ဍဲထံၚ်စာတ်သဓီုတုဲ ကောန်ဂကောံသှ်ေဒၟံၚ်ပိတၠဂှ် ရပ်ချုက်လဝ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ကျာ်ထဝ်တုဲ ဆက်တုဲဒးဆေၚ်ဒၟံၚ်မုက်ကဵုဂဗုတ်ရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၂၈ ဂှ်မ္ဂး အပ္ဍဲကာလသီအဝဵုဏံ အလုံဍုၚ်မွဲ မၞိဟ်ဒးဒုၚ်ရပ်လဝ် ၂၇၀၀၀ ပြၚ်တုဲ ပ္ဍဲကဵုဏံ ၂၁၀၀၀ ပြၚ် ဆက်ဒးဒုၚ်ရပ်ထိၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ