ဍာ်ဗု၊ နဝ်ဝေမ်ဗာ ၃၀
ရးတၞၚ်သဳ ပ္ဍဲပွိုၚ်ဍုၚ်ဍာ်ဗုဂှ် ဒုၚ်ယၟုကရောၚ်ပၞာန်ဒဝ်ဏတုဲ အာတ်ဒၟံၚ်လှုဲတံ နွံဒၟံၚ်ဂှ်ရ သွက်ဂွံတေၚ်စိုပ်အိုတ်ဂှ်ကီု၊ ယဝ်ရတီကေတ်မ္ဂး ကေတ်အာအရေဝ်ဗွဲမပိုတ်သ္ကုတ်ဏောၚ်ဂှ် ကရောၚ်ပၞာန်ဒဝ်ဏ လလောၚ်ပ္တိတ်လဝ်သမ္တီ နကဵုစၟတ်တ္ၚဲ ဂိတုနဝ်ဝေမ်ဗာ ၂၈ တေံရ။
ကရောၚ်ပၞာန်ဒဝ်ဏ ဒပ်ပၞာန်စဵုဒၞါညးဍုၚ်ကွာန် PDF ဂှ်ဝွံ ပတွဵုနူဒက်ပ္တန်ဂကောံတုဲ ဒဵုကဵုတ္ၚဲဏံ အာတ်လှုဲ၊ ကရေပ်ဓရတ်လှုဲ ဇရေၚ်ညးဍုၚ်ကွာန်တံကီု၊ ကဵုအခေါၚ်ဝိုၚ်ဝေၚ်တံကီု၊ ကံက်ကၠုၚ်အခေါန်ဖလှာတံကီုဂှ် ကၠောန်ကၠုၚ်လဝ်ဟွံမွဲပုဟ်ဂှ် သ္ဂးရ။
ဟိုတ်ဂှ်ရ ဒုၚ်ယၟုကရောၚ်ပၞာန်ဒဝ်ဏတုဲကဵုဒှ်၊ ကောန်သ္ဂံၚ်နူကရောၚ်ပၞာန်ဒဝ်ဏ မွဲမွဲတၠကဵုဒှ် ယဝ်ရအာတ်ကၠုၚ်လှုဲမ္ဂး ကၠုၚ်တေၚ်စိုပ် ပ္ဍဲမုက်လိက် Facebook Page ကရောၚ်ပၞာန်ဒဝ်ဏ ဟွံသေၚ်မ္ဂး ဂၞန်ဖုၚ် လလောၚ်ပ္တိတ်လဝ် သီုကဵုသက်သဳတံဂှ်မာန်ရောၚ် ကဵုလဝ်သမ္တီရ။
သ္ဂံၚ်ယုယ ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန်ဒဝ်ဏဂှ် ပ္ဍဲကဵုဒေသဍာ်ဗု၊ ဒေသ (ကံပေါက်) တံမပါလုပ် ပ္ဍဲကဵုဒၞါဲ သ္ကုတ်ဂၠံၚ်ပျဳထံၚ်သု စၟတ် ၈ တံဂှ် အာတ်မိက်ဒၟံၚ်သြန် ဇရေၚ်သၟာဖ္ဍိုက်ဗၞိက်တံ နွံဒၟံၚ်ဂှ်ရ မ္ဒးလလောၚ်ပ္တိတ်ကဵုကၠုၚ်သမ္တီ သာ်ဏံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵုကရောၚ်ပၞာန်ဒဝ်ဏ ဂၠိုက်ဂၠါဲသၟာန်သၟုက်ဒၟံၚ် ပရေၚ်အာတ်သြန် ဒုၚ်ယၟုကရောၚ်ပၞာန်တံဂှ်တုဲ ယဝ်တီကေတ်မ္ဂး ကေတ်အာအရေဝ် ဗွဲမပိုတ်သ္ကုတ်ဏောၚ်ဂှ် သ္ဂးရ။
ကရောၚ်ပၞာန်ဒဝ်ဏဝွံ ကြဴနူဒပ်ပၞာန်သီအဝဵုတုဲ ဖျေံသ္ဇိုၚ်အပ္ဍဲပွိုၚ်ဍုၚ်ရေဝ်ကဵု ပွိုၚ်ဍုၚ်ဍာ်ဗုတံဂှ်တုဲ ချဳဒရာၚ်ဒၟံၚ်ပရေၚ်ပၞာန်တုဲ သီုကဵုဒှ်ကရောၚ်ပၞာန် မဝေၚ်ကၠုၚ်လဝ် ပရေၚ်သီဗ္ဒိုပ်ကံၚ်ဇြဳပၞာန်တံမွဲရ။
သ္အာၚ်နူဂှ်ပၠန် ကရောၚ်ပၞာန်ဒဝ်ဏဝွံ ပံၚ်တောဲကဵုဂကောံဇြဟတ်ပၠန်ဂတးတံတုဲ ဒဵုကဵုပွိုၚ်မွဲသၞာံ ထိၚ်ဒက်ကၠုၚ်လဝ် သ္ကုတ်ဂၠံၚ်ရေဝ်−ထဝါဲ မဒှ်ဂၠံၚ်ပျဳထံၚ်သု စၟတ် ၈ ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ