ၜၚ်ကံက်၊ ဒဳဇြေမ်ဗာ ၃
ဒပ်ဍာ်ဗၟာ ဟိုတ်နူရပ်ဒက်ပန်ပှော်လဝ် ဂၠုၚ်တမ္ၚာသေံတံဂှ်တုဲ သၟာတမ္ၚာ လ္တူဂၠုၚ်ဂှ်မွဲတၠ ဗၠိုက်ဍာ်ချိုတ်၊ ၜါတၠ ကလိဂွံဝပ်တုဲ ကဵုဒါဇြိန် ဒးဒုၚ်ရပ်တုဲဂှ် နူကဵုသ္ကိုပ်ဝန်ဇၞော်သေံ ဗဴဓောန်ဓာန် ယှေန်နာဝါတ် ဒဒှ်ရဒစဵုဒစးပြဝဏံဂှ် ပ္ဍဲဂိတုဒဳဇြေမ်ဗာ ၁ တေံ ဟီုလဝ်ရ။
ပ္ဍဲဂိတုနဝ်ဝေမ်ဗာ ၃၀ တေံ စပ်ကဵုဒပ်ဍာ် ပန်ပှော်ကၠုၚ် ဂၠုၚ်တမ္ၚာသေံ မလုပ်စိုပ်ကၠုၚ် ပ္ဍဲတွဵုဒၞက်ဍာ်ဍုၚ်ဗၟာဂှ်တုဲ သ္ကိုပ်ဝန်ဇၞော် ဗဴဓောန်ဓာန် ပ္တိတ်လဝ်သၟာန်ရ။
ဂၠုၚ်တမ္ၚာသေံ ၁၅ ဖ္ဍိုက် မလုပ်စိုပ်ကၠုၚ် ပ္ဍဲတွဵုဒၞက်ဍာ်ဍုၚ်ဗၟာ ဗ္ဒါဲဍုၚ်ရနံၚ် သ္ကုတ်သၠုၚ်ကျာဍုၚ်သေံ နူမိုၚ်ဍာ် ၄ ဒဿမ ၅ စဵုစိုပ် ၇ မိုၚ်ဂှ် ၂ ဖ္ဍိုက် ဒးဒုၚ်ပန်ပှော်လဝ်ရောၚ် ဌာနဝန်ဇၞော်ကာစဵုဒၞါဍုၚ်သေံ ဟီုလဝ်ရ။
ဂၠုၚ်တမ္ၚာသေံတံ လုပ်စိုပ်လဝ် ပ္ဍဲတွဵုဒၞက်ဍာ်ဍုၚ်ဗၟာဟာဟီုဂှ် ဟီုချိုတ်တ်ပၠိုတ်တ်ဟွံဂွံပုဟ်ဂှ် သ္ကိုပ်ဝန်ဇၞော်သေံ ဟီုလဝ်ရ။
အကာဲအရာသာ်လဵုဒှ်ဒှ် နကဵုညးတံ ဟွံမွဲပၟိက်ကဵုပရေၚ်ပကီုပရာပ်တံဂှ်တုဲ ပ္ဍဲကဵုသၟာတမ္ၚာ ဒးဒုၚ်ရပ်လဝ် ၃၁ တၠဂှ် ကောန်ဍုၚ်သေံပန်တၠဂှ် သွက်ဂွံဗလးကဵု ဗွဲမပြဟ်ဂှ် သ္ကိုပ်ဝန်ဇၞော် အာတ်မိက်လဝ်ရ။
စပ်ကဵုပရိုၚ်ဏံတုဲ သွက်ဂွံခၠေဝ်ပလန်ကဵုမမိက်ကဵုမွဲမွဲဂှ် ဌာန်ပရိုၚ်ရိုက်တာ ဆက်လဝ်ဖုၚ် ကုကံၚ်ဇြဳပၞာန်ကီုလေဝ် ဟွံဂွံလဝ်အဆက်ပုဟ်ဂှ် သ္ဂးရ။
စပ်ကဵုပရေၚ်ရပ်စပ်ဇြဟတ် နူကဵုဂၠံၚ်တရဴပရေၚ်ဆက်စၠောံပယျဵုတံဂှ်တုဲ ပလံၚ်ဗစိုပ်လဝ် လိက်ဒစဵုဒစး ဇရေၚ်ကံၚ်ဇြဳပၞာန်တုဲ အကာဲအရာမက္တဵုဒှ်လဝ်တံ ညံၚ်ဂွံဒှ်အာသောၚ်ၚ်ကၠးကၠး သွက်ဂွံသ္ပကဵုဂှ်ကီု၊ သွက်ဂွံဗလးကဵု ကောန်ဍုၚ်သေံပန်တၠ ဗွဲမပြဟ်ဂှ်ကီု ဝန်ဇၞော်ကာစဵုဒၞါဍုၚ်သေံ အာတ်မိက်လဝ်ရ။
Ref: Reuters