တၞၚ်သဳ၊ ဒဳဇြေမ်ဗာ ၆
ပ္ဍဲကဵုဍုၚ်မဝ်ဒံၚ် ပွိုၚ်ဍုၚ်တၞၚ်သဳ မဒှ်ပယျဵုသေံဗၟာဂှ် ဒပ်ကံၚ်ဇြဳပၞာန် ကၠောန်သ္ပပလေဝ်ပလေတ်ကၠုၚ် ပရေၚ်ပၞာန်တံဂှ်တုဲ စနူဂိတုဒဳဇြေမ်ဗာ ၆ တုဲ ဟွံကဵုအခေါၚ်တတ်ကၠောံအာကၠုၚ် ဂၠံၚ်သွံရာန်ဗၞိက်ပယျဵု ထုၚ်ခါ−မဝ်ဒံၚ် တံဂှ်ရပုဟ်ဂှ် ဒပ်ပၞာန်ကဝ်တူလေဝ် KTLA ဖျေံသ္ဇိုၚ်ဒေသဂှ် လလောၚ်ပ္တိတ်လဝ်ရ။
ပ္ဍဲဍုၚ်မဝ်ဒံၚ်ဂှ် ကောန်ဒပ်ကံၚ်ဇြဳပၞာန်တံ ပလေဝ်ပလေတ်ကၠုၚ်ပရေၚ်ပၞာန်တံဂှ်သၟးဟွံက ပကောံကောန်ဒပ် ဗွဲအဓမ္မတုဲ ကဵုဒၟံၚ်တန်ဗ္တောန် ပျူသဝ်ထဳတံဂှ်တုဲ မ္ၚးဍုၚ် ကုန်ဒဵုကျာ်ဂှ်လေဝ် ဖျေံလွဟ်ဇၞော်တုဲ ကၠုၚ်စိုပ်ဖျေံဒၟံၚ်ဒပ်ရ။
ဟိုတ်ဂှ်ရ နကဵုဂကောံဒပ်ပၠန်ဂတးဂမၠိုၚ် ဒပ်ကံၚ်ဇြဳပၞာန် ညံၚ်ဆက်အာဂတဟွံဂွံဂှ် မ္ဒးကၠောန်သ္ပလဝ် ပရေၚ်ပလေဝ်ပလေတ်စပ်ကဵုပရေၚ်ပၞာန် အရာမနွံပၟိက်တံ ဗ္ဒါဲဍုၚ်မဝ်ဒံၚ်ဂှ်ရောၚ် သ္ဂးရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ စနူဂိတုဒဳဇြေမ်ဗာ ၃ တုဲ အပ္ဍဲပွိုၚ်ပိတ္ၚဲ သွက်ဂွံဆုတ်ကလေၚ်ကဵု နူကဵုဒၞါဲညးတံဂှ်ကီု၊ ယဝ်ရဟွံဆုတ်ကလေၚ်ကဵုမ္ဂး ကေတ်အာအရေဝ် နကဵုပရေၚ်ပၞာန်ဏောၚ်ဂှ် ဘပဠကဵုကၠုၚ်ပရိုၚ်ဂှ် ဒပ်ပၞာန်ကဝ်တူလေဝ် သ္ဂးရ။
စပ်ကဵုကံၚ်ဇြဳပၞာန် ဘပဠကၠုၚ်သာ်ဏံဂှ်တုဲ နကဵုဒပ်ပၠန်ဂတးဂမၠိုၚ် ဆုတ်ကလေၚ်ကဵုအာဟွံသေၚ်တုဲ တန်တဴကဵုအကာဲအရာ ကောန်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲဒဵုကုန်ကျာ်မ္ၚးဍုၚ်ဂှ်ကဵု အကာဲအရာကံၚ်ဇြဳပၞာန်တံ မကဵုဒၟံၚ်တန်ဗ္တောန်ပျူသဝ်ထဳတံဂှ်တုဲ မၚ်ရံၚ်တုဲခၠေဝ်ပလန်အာဏောၚ်ဂှ် ကဵုလဝ်သမ္တီရ။
အခိၚ်လၟုဟ်ဂှ်လေဝ် ပ္ဍဲကဵုပွဳပွူဗ္ဒါဲဍုၚ်မဝ်ဒံၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံဂှ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ အခိၚ်ဟွံရုဲ ပေါဲဗ္တိုက်က္တဵုဒှ်ကၠုၚ်မာန်ရောၚ် ဒပ်ပၞာန်ကဝ်တူလေဝ် လလောၚ်ပ္တိတ်လဝ်ရ။
အခိၚ်ပေါဲဗ္တိုက်ၜါလ္ပာ် က္တဵုဒှ်ဒၟံၚ်ဂှ် နကဵုညးဍုၚ်ကွာန်ဂမၠိုၚ် ဟိုတ်နူဘဲဒဏ်ပၞာန်တုဲ ညံၚ်ဟွံဂွံဇီုကပိုက်ဒးဂှ် စနူကဵုဂိတုဒဳဇြေမ်ဗာ ၆ တုဲ ဟွံကဵုအခေါၚ်တတ်ကၠောံလဝ် ဂၠံၚ်သွံရာန်ဗၞိက်ပယျဵု ထုၚ်ခါ−မဝ်ဒံၚ်ဂှ်တုဲ အခိၚ်ကဵုအခေါၚ်တတ်ကၠောံဂှ် ထပ်ကဵုသမ္တီ လလောၚ်ပ္တိတ်အာဏောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ