သွက်ဂွံဒက်ပ္တန်ဒပ်ပံၚ်ကောံမန်တံဂှ် စပ္ညဳပ္ညပ်

မတ်မလီု၊ ဒဳဇြေမ်ဗာ ၆

ဂကောံဒပ်ရပ်လွဟ်မန်တံ ဂွံဒှ်မွဲဂကောံမွဲကလောံဂှ် အကြာညးတာလျိုၚ်ဂမၠိုၚ် ပ္ညဳပ္ညပ်သဳကၠဳဒၟံၚ် ပရေၚ်သ္ဂောံဒက်ပ္တန်ဒပ်ပံၚ်ကောံ မၞုံကဵုပရေၚ်က္ဍိုက်ပ်ပရေၚ်ဍုၚ်ကွာန်ဂှ် နွံဒၟံၚ်ရောၚ် ညးမၞုံအခေါၚ်ဟီုဂး ဂကောံပၠန်ဂတးမန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုနဝ်ဝေမ်ဗာကြပ်အိုတ်တေံ အကြာဒပ်ရပ်လွဟ်မန်ဂမၠိုၚ် က္ဍိုပ်သ္ကိုပ်ပရေၚ်ဍုၚ်ကွာန်၊ ပရေၚ်ပၞာန် ကဆံၚ်လ္တူတံ ဆဵုဂဗသဳကၠဳလဝ်ညးသ္ကအ်တုဲ သွက်ဂွံဒက်ပ္တန်ဒပ်ပံၚ်ကောံ ကေုာံ သွက်ဂွံပံၚ်တောဲရေၚ်တၠုၚ်အာ မစှ်ေကဵုဗျူဟာဂှ် ချပ်ဂၞန်ပ္တိတ်ဒၟံၚ်ဒြဟတ်ဖိုဟ်ဂှ် သ္ဂးရ။

ဒံက်တာသဳရိမန်ဆာန် သ္ကိုပ်ဒပ် ဒပ်စဵုဒၞါဍုၚ်မန် MSDF ဂှ် ပြဟ်ဟ်ဏံ ပ္ဍဲကဵုနဲဗျူဟာတံကဵု ပရေၚ်ပၞာန်တံဂှ် ပရေၚ်ပံၚ်တောဲချဳဒရာၚ်သၟဝ်ဏံ အသိၚ်ခိုဟ်ကၠုၚ်တုဲ ဂွံစိုပ်ကဆံၚ် ဒက်ပ္တန်ဒပ်ပံၚ်ကောံဂှ် တောတက်ကၠုၚ်ရောၚ် ဟီုရ။

“ပြဟ်ဟ်ဏံ ပ္ဍဲဗလးတိဂှ် ကဆံၚ်နဲဗျူဟာကဵု ကဆံၚ်ပရေၚ်ပၞာန်တံဂှ် ပရေၚ်ပံၚ်တောဲချဳဒရာၚ်တံ အသိၚ်ခိုဟ်ကၠုၚ်ရ။ ဆ္ဂးကီုလေဝ် ဂွံစိုပ်ကဆံၚ် ပရေၚ်ပံၚ်တောဲရေၚ်တၠုၚ် မစှ်ေကဵုမဟာဗျူဟာ ဇကုတံမဖျေံစၟတ်လဝ်ဂှ် ဒှ်သဘဴဒးကေတ်ဒၟံၚ်အခိၚ်ညိညဏီဏောၚ်။ သီုဖအိုတ်သရောပ်တုဲဒးဟီုမ္ဂး ဂွံစိုပ်ကဆံၚ်ပံၚ်တောဲရေၚ်တၠုၚ်မစှ်ေကဵုဗျူဟာ ဂွံစိုပ်ကဆံၚ်ဒက်ပ္တန်ဒပ်ပံၚ်ကောံဂှ် တောတက်တိုန်တၟာဂလိုၚ် ဒးဟီုဏောၚ်” သာ်ဝွံ သ္ဂးရ။

စပ်ကဵုပရေၚ်ပၞာန်သီအဝဵုတုဲ အကြာဗွိုၚ်ကောန်ဂကူမန်တံဂှ် လညာတ်ဟွံတုပ်သၟဟ် လညာတ်ထ္ကးပြးတံ နွံကၠုၚ်လဝ်ကီုလေဝ် ဒပ်ရပ်လွဟ်မန် မမံက်ဂတဝ်ကၠုၚ်တံ မွဲကုမွဲ သွက်ဂွံပံၚ်ကောံအာ သၟဝ်ပရေၚ်က္ဍိုက်ပ် ပရေၚ်ပၞာန်ပရေၚ်ဍုၚ်ကွာန်မွဲဓဝ်ဂှ် ညးဍုၚ်ကွာန်မန်တံ ဆန္ဒနွံဒၟံၚ်အိုတ်ရ။

နူကဵုပေါဲသဳကၠဳပရေၚ်ဍုၚ်ကွာန်သၟတ်မန် မကၠောန်ဗဒှ်လဝ် ပ္ဍဲဂိတုသေပ်တေမ်ဗာဂှ် နကဵုဂကောံဇြဟတ်ပၠန်ဂတးရပ်လွဟ် မၞုံအပ္ဍဲတွဵုရးဍုၚ်မန်တံ သွက်ဂွံပံၚ်တောဲအာ နဒဒှ်လွေဟ်ဒပ်ဗီုကောံတံဂှ် လလောၚ်ပ္တိတ်ဖ္တိုက်ဖ္အောဝ်လဝ် နဒဒှ်တၚ်တုပ်စိုတ်မွဲရ။

ကြဴနူဂှ်တုဲ အကြာဂကောံပၠန်ဂတးရပ်လွဟ်မန်တံဂှ် သၠုၚ်ပ္တိုန်အသိၚ် ပရေၚ်ပၞာန်မစှ်ေကဵုဗျူဟာတံတုဲ သွက်ဂွံကၠောန်ၜိုတ်အာမာန်ဂှ် ဒးနွံကဵုဒပ်ပံၚ်ကောံ မဗိုန်ဇၟအ်မွဲဏောၚ် လညာတ်သာ်ဏံတံ စဟီုပ္တိတ်ကၠုၚ်လဝ်ညးသ္ကအ်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် သွက်ဂွံဒက်ပ္တန်ဒပ်ပံၚ်ကောံ အကြာဒပ်မန်တံကဵု သွက်ဂွံပံၚ်တောဲကၠောန်အာပရေၚ်ပၞာန်တံဂှ် ညးတာလျိုၚ်မဆေၚ်စပ်တံ ပ္ညဳပ္ညပ်သဳကၠဳဒၟံၚ်ကီုလေဝ် ဒပ်သီုဖအိုတ် ဟွံပါလုပ်ကၠုၚ်ဏီပုဟ်ဂှ် ဟီုရ။

“သွက်ဂွံဒက်ဒပ်ပံၚ်ကောံ အကြာဒပ်ပၠန်ဂတးမန်တံ သွက်ဂွံကၠောန်အာ ပရေၚ်ပံၚ်တောဲရေၚ်တၠုၚ်ပရေၚ်ပၞာန်တံဂှ် ညးတာလျိုၚ်ဒပ် မဆေၚ်စပ်တံ ပ္ညဳပ္ညပ်သဳကၠဳဒၟံၚ်နွံ။ စိုပ်ၜိုတ်လဵုရရောဟီုဂှ် ပြဟ်ဒၟံၚ်ဏီတုဲ လလောၚ်ပ္တိတ်လဝ်တံဂှ် ဟွံမွဲဏီပုဟ်။ ဆ္ဂး ဒပ်ပၠန်ဂတးမန်တံသီုဖအိုတ်ဂှ်တှ်ေ ဟွံပါလုပ်ကၠုၚ်ဏီပုဟ်။ ဒပ်လ္ၚဵုတံဂှ်တှ်ေ ဒၟါနူဟိုတ်နာနာသာ်တုဲ ဂွံဒက်ဒပ်ပံၚ်ကောံဂှ် သ္ၚောဲအာဒၟံၚ်သိုက်က်ဂှ် ဂွံဆဵုကေတ်ရ။ အာပံၚ်ကောံ အာဒက်မဟာမိတ်ကဵု ဒပ်တၞဟ်ဟ်တံဂှ် ပိုယ်တံ ဂွံဆဵုကေတ်ရ” သာ်ဝွံ သ္ဂးရ။

ဟိုတ်နူပရေၚ်ပၞာန်သီအဝဵုတုဲ ပ္ဍဲတွဵုရးဍုၚ်မန်ဂှ် ဒပ်ပံၚ်ကောံရပ်လွဟ် ပၞောဝ်ကဵုမံက်ကၠုၚ် ဟွံအောန်နူကဵု ၃၀ ဂှ် ဒပ်ရပ်လွဟ်မန် ပန်ဒပ်ဝွံ အခိၚ်ညးကဵုညး ဗီုပြၚ်ညးကဵုညးဂှ် ဒက်ပ္တန်လဝ်အိုတ်ရ။

ပ္ဍဲကဵုဏံ ဒပ်စဵုဒၞါဍုၚ်မန် MSDF၊ ဒပ်ပၠန်ဂတးဍုၚ်မန် MSRF ကေုာံ ဒပ်ပၞာန်ဗၠးၜးဍုၚ်မန် MLA တံဝွံ အခိၚ်ပၞာန်သီအဝဵု ပြဟ်ဟ်တေံကဵု ပၞာန်သီအဝဵုတုဲ ကာလဗွဲကြဴဏံဂှ် ဒက်ပ္တန်လဝ်ညးသ္ကအ်အိုတ်ရ။ 

ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD မပါ်တိတ်ကၠုၚ် နူကဵုဗော်မိဂှ်တှ်ေ သၞာံ ၂၀၂၄ ဂိတုဖေဖဝ်ဝါရဳဂှ်မှဟေၚ် ပါလုပ်ကၠုၚ်လဝ်တုဲ ကလိဂွံလဝ်တၚ်တုပ်စိုတ် ကုကံၚ်ဇြဳဖေဝ်ဒရာဍုၚ်မန် MSFC သွက်ဂွံပံၚ်တောဲအာ ပရေၚ်ဍုၚ်ကွာန်၊ ပရေၚ်ပၞာန်တံရ။

လအာတုပ်သာ်ဂှ်ကီု ဒပ်စဵုဒၞါဍုၚ်မန် MSDF ဂှ်လေဝ် ပံၚ်တောဲလဝ်ကဵု ဒပ်စဵုဒၞါဍုၚ်မန် MSRF မနွံသၟဝ်ကံၚ်ဇြဳဖေဝ်ဒရာဍုၚ်မန် MSFC သွက်ဂွံလုပ်ပေါဲဗ္တိုက် စဵုကဵုဒက်ပ္တန်ဍုၚ်မန်မာန် မဒှ်ရ။

ဒံက်တာသဳရိမန်ဆာန်ဂှ်တှ်ေ ညံၚ်ဂွံစိုပ်ကဆံၚ်ပံၚ်တောဲရေၚ်တၠုၚ် မစှ်ေကဵုဗျူဟာ မသဳကၠဳလဝ်ညးသ္ကအ်ကၠာတေံ အကြာဗော်ဍုၚ်မန်တၟိ AD, MSDF, MSRF, MLA တံဂှ် ဆက်ပ္တိတ်ဒၟံၚ်ဇြဟတ်ရောၚ် သ္ဂးရ။

ဆ္ဂး ဒပ်ပၞာန်ဗၠးၜးဍုၚ်မန် MLA ဝွံ တော်ကဵုဂကောံပၠန်ဂတးမန်တၞဟ်ဟ်တံဂှ်မ္ဂး ပ္ဍဲကဵုပရေၚ်ပံၚ်တောဲရေၚ်တၠုၚ် ဗလးတိဏံဂှ် သ္ၚောဲဒၟံၚ်ညိဏီဂှ် ညးဆက်ဟီုရ။

“ဗော်ဍုၚ်မန်တၟိ AD ကီု MSDF ကေုာံ MSRF တံကီုဂှ် ပ္ဍဲပရေၚ်ပၞာန်၊ ပ္ဍဲပရေၚ်ဍုၚ်ကွာန်ဂှ် သာတုဲစုက်ကၠုၚ်ညးသ္ကအ်ရ။ ပ္ဍဲသၟဝ်တိဏံဂှ်လေဝ် ပရေၚ်ပံၚ်တောဲရေၚ်တၠုၚ် ကဆံၚ်ဗျူဟာ ကဆံၚ်နဲဗျူဟာ ကေုာံ ကဆံၚ်ပရေၚ်ပၞာန်တံဂှ် နွံဒၟံၚ်ရ။ ဆ္ဂး MLA ဂှ်တှ်ေ သ္ၚောဲဒၟံၚ်ညိဏီဏောၚ်” သာ်ဝွံ သ္ဂးရ။

ပ္ဍဲကဵုချဳဒရာၚ်ပရေၚ်ပၞာန် ဒပ်ပၠန်ဂတးရပ်လွဟ်မန်တံဂှ်တှ်ေ ပြဟ်ဟ်ဏံဂှ် ထ္ပက်ကၠုၚ်ပၞာန် ကုဗ္ဒိုပ်ဒပ်ကံၚ်ဇြဳပၞာန်တံဂှ် ဟွံမွဲကီုလေဝ် နူကဵုဒရုၚ်ဂှ် ထောံမခတိုဟ်ဗ္တိုက်ဒၟံၚ်တံ နွံလဝ်ရ။

အပ္ဍဲကာလသီအဝဵု ကြပ်ပွိုၚ်ပန်သၞာံဏံ ပ္ဍဲတွဵုရးဍုၚ်မန် ဟိုတ်နူတၚ်နွံပၟိက် ဇြဟတ်ကဵု မကမ်လွဟ်လက်နက်တံတုဲ ထ္ပက်ပၞာန် ကုဗ္ဒိုပ်ဒပ်ကံၚ်ဇြဳပၞာန်တုဲ ဝေၚ်ကၠုၚ်လဝ် ပေါဲဗ္တိုက်သီဗ္ဒိုပ်သီဍုၚ် ညံၚ်ဒေသကောန်ဍုၚ်အရၚ်တၞဟ်ဟ်တံဂှ် ဟွံမွဲရ။

ကုဗ္ဒိုပ်ဗၠာဲသၟိၚ်တိဍာ် ကေုာံ သၞေဟ်ကၚ်စၟဳတ် နူကဵုဒပ်ကံၚ်ဇြဳပၞာန်တံ မဖျေံလဝ်သ္ဇိုၚ်ဂှ် လုပ်စိုပ်ဗ္တိုက်သီဗ္တိုက်၊ ကြတ်ဗ္တိုက်လဝ်တံ နွံတုဲ ထ္ပက်ကၠုၚ်ကရောၚ်ပၞာန်မ္ဂး ၜိုတ်က္တဵုဒှ်တိုန် ပေါဲဗ္တိုက်ဆေၚ်မုက်တံရနွံလဝ်ရ။

နာဲဗညာလဴ ဒုက္ဍိုပ်သ္ကိုပ် (၁) ဗော်ဍုၚ်မန်တၟိ AD ဂှ်တှ်ေ သွက်ပရေၚ်ပၞာန်ဂှ် အကြာဒပ်မွဲကုမွဲ ဂွံပံၚ်တောဲလုပ်အာပေါဲဗ္တိုက်ဂှ် သဳကၠဳဒၟံၚ်တုဲ ဂွံဆက်သဳကၠဳအာဂှ် ပလေဝ်ပလေတ်လဝ်ယျဂှ် ဟီုပ္တိတ်လဝ်ရ။

ဗော်ဍုၚ်မန်တၟိ AD ၊ ဒပ်ပၞာန်ဗၠးၜးဍုၚ်မန် MLA ၊ ဒပ်စဵုဒၞါဍုၚ်မန် MSDF ကေုာံ ဒပ်ပၠန်ဂတးဍုၚ်မန် MSRF တံ ဂွံလုပ်ပေါဲဗ္တိုက်မွဲကရောံမွဲစွံ သၟဝ်မွဲအသံဂှ် ပလေဝ်ပလေတ်ဒၟံၚ်ရောၚ် ညးသ္ဂးရ။

မွဲလ္ပာ်ဂှ်ပၠန် ဒပ်ညးတံကဵု ကံၚ်ဇြဳဖေဝ်ဒရာဍုၚ်မန် MSFC တံ လ္ပာ်ပရေၚ်ဍုၚ်ကွာန် ဗီုလဵုဂွံဆက်ပံၚ်တောဲရေၚ်တၠုၚ်အာရောဟီုဂှ် သဳကၠဳဒၟံၚ်ဖိုဟ်ရောၚ်ဂှ် ဟီုလဝ် ပ္ဍဲကဵုသ္ဘၚ်စှ်ေဘာ တန်ဗ္တောန်ကွတ်ပၞာန်သ္ဇိုၚ် လၟေၚ် (၃) ဗော်ဍုၚ်မန်တၟိ AD မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၂၇ ဂှ်ရ။

ပရိုၚ်−သြၚ်လောန်တိုၚ်(မ်)

ဗီု−Twitter