မတ်မလီု၊ မေ (၁)
နကဵု လၟေၚ်တရဴယာန်ကွဳစက် ဓရိပ်တရဴဇမ္ၚောဲဂမၠိုၚ် အပ္ဍဲတွဵုရးဍုၚ်မန်ဂှ် ယဝ်ရသွံဒးစၟတ်တဲ ကုရဲအာတရဴ တၞးကာဒ်ကောန်ဍုၚ် ဟွံပါတံဂှ်မ္ဂး ကၟာတ်သီအာ လၟေၚ်တရဴယာန်ကွဳစက်တံရောၚ်ဂှ် ကံၚ်ဇြဳပၞာန်သီအဝဵု ဘပဠလဝ်ရ။
ဌာနဝန်ဇၞော် ကောပ်ကာဲပရေၚ်မၞိဟ်လုပ် (လဝက) သၟဝ်တဲကံၚ်ဇြဳပၞာန်တံဂှ် ပပ္တံနူ ဂိတုဨပရဴ (၁) တုဲ စၞးတၞးကာဒ်ကောန်ဍုၚ်ဂှ် ထ္ၜးလိက်ထံက်ဂလာန်တုဲ ပွမအာကၠုၚ်တရဴ ကေုာံ ဒုၚ်စၟဳစၟတ်တံဂှ် ကဵုအာအခေါၚ်ဟွံသေၚ်ရဂှ် လလောၚ်ပ္တိတ်လဝ်ရ။
ပ္ဍဲဌာန်သွံတြး စၟတ်တဲ လၟေၚ်တရဴယာန်ကွဳစက်ဓရိပ်တရဴဇမ္ၚောဲတံဂှ်လေဝ် တၞးကာဒ်ကောန်ဍုၚ်ဟွံပါမ္ဂး လ္ပကၠောန်သွံတြးကဵု စၟတ်တဲတုဲ တၞးကာဒ်ကောန်ဍုၚ်ပါမှ သွက်ဂွံကဵုအခေါၚ်ဍိုက်ဗက်ဂှ် ကံၚ်ဇြဳပၞာန် ထပ်စၞောန်ပ္ညုၚ်လဝ်ရ။
တုဲပၠန် ယဝ်ရသွံလဝ်စၟတ်တဲ ကုရဲအာတရဴ တၞးကာဒ်ကောန်ဍုၚ်ဟွံပါတံဂှ်မ္ဂး ဒဒှ်ရ ကၟာတ်အာ လၟေၚ်တရဴယာန်ကွဳစက်တံရောၚ်ဂှ် ကံၚ်ဇြဳပၞာန် ဘပဠလဝ်ဂှ် တၠပိုၚ်ပြဳ လၟေၚ်တရဴယာန်ကွဳစက် ဓရိပ်တရဴဇမ္ၚောဲ မွဲတၠ ဟီုလဝ်သာ်ဏံရ။
“လၟုဟ် လ္ပသွံဟီုဂှ် ပိုယ်တံ ဟွံသွံဟွံဂွံပုဟ်လေဝ်၊ ညးကၟာတ်သီအာ လၟေၚ်တရဴကွဳစက်ဟီုဂှ် ကမ္မတဳကောပ်ကာဲထိၚ်ဒက်ကမၠောန် ယာန်ကွဳစက်ဇဳ (မထသ) ဟီုလဝ်ရ၊ ကၟာတ်လာၚ်ကွဳစက်ဏောၚ် ဟီုလဝ်ရ၊ ဟွံဂွံသွံမ္ဂး ညးအာတရဴ အာကၠုၚ်အောန်အာရ၊ အောန်အာတှ်ေ ပိုယ်တံလေဝ် ပရေၚ်ပိုန်ဒြပ်ဏံရ နွံတုဲ ပရေၚ်ပိုန်ဒြပ်ဏံရ ဆက်တုဲ ဒးကၠောန်ဒၟံၚ်” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လၟေၚ်တရဴယာန်ကွဳစက်ဓရိပ်တရဴဇမ္ၚောဲတံဝွံ ဗွဲကြဴဒပ်ပၞာန်သီအဝဵုတုဲ ဟိုတ်နူဂွံညးအာတရဴ အောန်ကြဳစှ်ေကၠုၚ် ကေုာံ ၚုဟ်နှေန်ကၠေၚ်စက် သၠုၚ်တိုန်ဒၟံၚ် အဆက်က်တုဲ အခိၚ်ဒးဆေၚ်ဒၟံၚ်မုက်ကဵု ပွမကျဟောံဗြံဂှ် လ္ပာ်ကံၚ်ဇြဳပၞာန်တံ ဟိုတ်နူစၞောန်ပ္ညုၚ်ကၠုၚ် ယဝ်ရတၞးကာဒ်ကောန်ဍုၚ် ဟွံပါမ္ဂး သွက်ဟွံဂွံသွံကဵု စၟတ်တဲဂှ်ရ သာတုဲ ဒးဂဗကၠုၚ် အခက်အခုဲရ။
ကုညးအာတရဴ တၞးကာဒ်ကောန်ဍုၚ်ဟွံပါတံဂှ် သွက်ဟွံဂွံသွံကဵု စၟတ်တဲကွဳစက်ဂှ် ကံၚ်ဇြဳပၞာန် ကၟာတ်လဒဵုလဝ်တုဲ ဂွံညးအာတရဴ အောန်စှ်ေကၠုၚ်ရဂှ် ညးဒုၚ်တာလျိုၚ် လၟေၚ်တရဴယာန်ကွဳစက်ဓရိပ်တရဴဇမ္ၚောဲ မွဲတၠ ဟီုရ။
“ညးမပါကၠုၚ် နကဵုလိက်ထံက်ဂလာန်တံဂှ် သွံကဵုစၟတ်တဲ ဟွံဂွံရ၊ ဇြဟတ်သွံပိုယ်တံလေဝ် စှ်ေရ၊ လၟုဟ်မ္ဂး ကုညးအာတရဴ တၞးကာဒ်ကောန်ဍုၚ် ဟွံပါတံဂှ် ပိုယ်တံ သွံကဵု ဟွံဂွံရ၊ ပရေၚ်သွံရာန် ကြဳစှ်ေအာအိုတ်ရ” သာ်ဝွံ သ္ဂးရ။
ပ္ဍဲတွဵုရးဍုၚ်မန်ဂှ် ပ္ဍဲညးမလုပ်စိုပ်ကၠုၚ် အပ္ဍဲတွဵုရးတံဂှ် ယဝ်ရတၞးကာဒ်စၟဳစၟတ်ကောန်ဍုၚ် ဟွံပါမ္ဂး လ္ပကဵုအခေါၚ်လုပ်ဂှ် ကံၚ်ဇြဳပၞာန်တွဵုရး စၞောန်ပ္ညုၚ်လဝ်ရ။
ဟိုတ်နူတၚ်စၞောန် ကံၚ်ဇြဳပၞာန်တံတုဲ ကောန်ကမၠောန်ဆုဲပြံၚ် တၞးကာဒ်ကောန်ဍုၚ် ဟွံမွဲဏီတံ၊ ဘာသာတၞဟ်ခြာတံ ကေုာံ ညးတၞးကာဒ်ကောန်ဍုၚ် လီုလာ်ကၠေံကၠက်တံဂှ်ဝွံ သွက်ပရေၚ်အာကၠုၚ်တရဴဂှ် သာတုဲ ဒးဂဗဒၟံၚ် အခက်အခုဲရ။
တုဲပၠန် ပ္ဍဲပါၚ်တြၚ်စၟဳစၟတ် ကံၚ်ဇြဳပၞာန်တံဂှ် ဟိုတ်နူစၟဳစၟတ်ဒၟံၚ် ညးအာတရဴတံ မွဲဏှမွဲဏှဂှ်ရ ဒးဆေၚ်ဒၟံၚ်မုက်ကဵု တရဴလအ်လလဇုဲလဇတံရ။
ပ္ဍဲတွဵုရးဍုၚ်မန်ဂှ် လၟေၚ်တရဴယာန်ကွဳစက်ဓဇက်ဂြိပ်ဒၟံၚ် နူ မတ်မလီု စဵုကဵု ရး ကေုာံ တွဵုရး တၞဟ်ဟ်တံ အပံၚ်ဖအိုတ် (၇၃) လာၚ်နွံရ။
ပရိုၚ်−သြၚ်လောန်တိုၚ်(မ်)