မတ်မလီု၊ ဂျာန္နဝါရဳ (၁၁)
ၚုဟ်ထဝ်ပ္ဍဲဍုၚ် ညိၚ်ဒၟံၚ် နကဵုၚုဟ်ထဝ်ဒကောၚ်မဳလေန် မွဲဒ္ကေဝ် ပွဳူ (၆၀)ကိုဋ်ဂှ် ပ္ဍဲသၞာံဏံစဂှ်ရ ၚုဟ်ကလေၚ်သၠုၚ်တိုန်ကၠုၚ်လဝ်ရဂှ် တၠကမၠောန်ထဝ်တံ ဟီုကဵုသြၚ်လောန်တိုၚ်မ်ရ။
ပ္ဍဲဂိတုဂျာန္နဝါရဳ သတ္တာဟပထမဂှ် ၚုဟ်ထဝ်ပ္ဍဲဍုၚ် မွဲဒ္ကေဝ် မၞုံဒၟံၚ် (၆၁)ကိုဋ်ဓဝ်ကီုလေဝ် ပ္ဍဲဂိတုဂျာန္နဝါရဳ စၟတ်တ္ၚဲ(၁၀)ဂှ် ၚုဟ်သၠာ်တိုန်လဝ် စဵုကဵု (၆၄)ကိုဋ်ရ။
ဟိုတ်နူၚုဟ်ထဝ်ကလေၚ်သၠုၚ်တိုန်ကၠုၚ်လဝ်ဂှ်ရ ပ္ဍဲဗွဝ်ဖျာဂှ် ဒေါံဒေၚ်ထောံလဝ် ပရေၚ်သွံရာန်လ္ၚဵုတံတုဲ ပွမၚ်ကျောဝ်လ္ပာ်ကံၚ်ဇြဳပၞာန်တံလေဝ် နွံဒၟံၚ်ရ။
ၚုဟ်ထဝ်သ္ဂောံသၠုၚ်တိုန်ကၠုၚ်ဂှ် ဟိုတ်နူတၠကမၠောန်ပရေၚ်ပိုန်ဒြပ်တံ ဝေၚ်ၚုဟ်တံကဵု ဟိုတ်နူပွစလာပ်ဗ္ဇဴကံၚ်ဇြဳပၞာန်တံရဂှ် တၠကမၠောန်ထဝ်မွဲတၠဂှ် ဟီုရ။
“ဟိုတ်နူဒဝ်ဠာအောန်တုဲ ၚုဟ်ဒဝ်ဠာတံတိုန်ကၠုၚ်လေဝ်ဟွံသေၚ်ပုဟ်။ ထဝ်တံအောန်တုဲ ၚုဟ်ထဝ်တံ တိုန်ကၠုၚ်လေဝ်ဟွံသေၚ်ပုဟ်။ တုဲတဴကဵုအကာဲအရာပရေၚ်ဍုၚ်ကွာန်ဏံတုဲ သမာပရေၚ်ပိုန်ဒြပ်တံ ဝေၚ်ကၠုၚ်ၚုဟ်မဒှ်ရ။ ဣဂှ်တှ်ေ မွဲလ္ပာ်ပၠန် ရဲကေတ်လဝ်တာလျိုၚ်တံဂှ်လေဝ် ပွကေတ်အရေဝ်ချိုတ်တ်ပၠိုတ်တ်တံဟွံမွဲပုဟ်။ အကြာဂှ်ပၠန် ပွကဵုကေတ်လာပ်ဗ္ဇဴတံ နွံမံၚ်ရ” သာ်ဝွံ သ္ဂးရ။
ဟိုတ်နူပွဝေၚ်ၚုဟ် သမာပရေၚ်ပိုန်ဒြပ်တံတုဲ ၚုဟ်ထဝ်ကလေၚ်သၠုၚ်တိုန်ကၠုၚ်ဂှ်ရ နကဵုညးဍုၚ်ကွာန်တံ ညံၚ်ဟွံဂွံသွံရာန်ဗၠေတ်မှာဂှ် ဒှ်အခိၚ် ဒးစွံသတိရောၚ်ဂှ် ညးဆက်ဟီုရ။
ကံၚ်ဇြဳပၞာန်ဂှ် ညံၚ်ၚုဟ်ထဝ် သ္ဂောံညိၚ်ဝတ်သ္ဂးတုဲ သၞာံတုဲကၠုၚ် ပ္ဍဲဂိတုနဝ်ဝေန်ဗာ စၟတ်တ္ၚဲ(၂၄)ဂှ် ဒက်ပ္တန်လဝ် ကဝ်မတဳစၞောန်ၚုဟ်ထဝ်တံတုဲ လၟေၚ်တ္ၚဲ စၟတ်ကဵုဒၟံၚ်ၚုဟ်စၞောန်ထဝ်တံရ။
ၚုဟ်ထဝ်ပ္ဍဲဍုၚ် ကံၚ်ဇြဳပၞာန်စၟတ်လဝ်တံဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၁၀)ဂှ် ဟိုတ်နူစၟတ်လဝ် ၚုဟ်ထဝ်ဒကောၚ်မွဲဒ္ကေဝ် (၅၃)ဒ္ကေဝ်ပြၚ်ဂှ်ရ ၜတ်ပ္တဝ်အာကဵု ၚုဟ်ဗွဝ်ဖျာဍုၚ်သ္အာၚ်တံမ္ဂး ကွာဒၟံၚ် ဗ္ဒါဲ(၁၁)ကိုဋ်ရ။
ပ္ဍဲဍုၚ်ဗၟာ ပ္ဍဲကာလသီအဝဵုဏံဂှ် ၚုဟ်ထဝ်တံလေပ်သၠုၚ်တိုန်ဒၟံၚ် ၜက်သၞောတ်ဗ္ၜတ်တုဲ လၟေၚ်ဒဒှ်တ္ၚဲ ၚုဟ်မးဟွံညိၚ်ဝတ်တံ က္တဵုဒှ်ဒၟံၚ်ရ။