ဖာဗေါန်၊ ဂျာန္နဝါရဳ (၁၁)
ဗ္ဒိုပ်ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲကွာန် (လှဂွန်းပျို)၊ ခရိုၚ်ဖာဗေါန်၊ တွဵုရးကရေၚ်ဂှ် ဒပ်ပံၚ်ကောံပၠန်ဂတး KNLA က္ဍိုက်က္ဍိုပ်တံ ဗ္တိုက်သီလဝ်ရဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဒပ်မဟာ(၅) သ္ကိုပ်ဗိုလ်ဇၞော်သဝ်ကလာဒိုဝ် သ္ပဒတန်လဝ်ကဵု သြၚ်လောန်တိုၚ်မ်ရ။
ဗ္ဒိုပ်(လှဂွန်းပျို) ဒပ်ကံၚ်ဇြဳပၞာန် မၞုံပ္ဍဲတိဍာ် KNU ဒပ်မဟာ(၅)ဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၇) တုဲကၠုၚ်တေံဂှ် ဂကောံဒပ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA က္ဍိုက်က္ဍိုပ်တံ ဗ္တိုက်သီလဝ် အလုံဗ္ဒိုပ်မွဲတံ မာန်ကၠုၚ်လဝ်ရ။
ပ္ဍဲပေါဲဗ္တိုက် သီဗ္ဒိုပ်(လှဂွန်းပျို)ဂှ် ဟွံဂွံတီကေတ်အကာဲအရာဇီုကပိုက်ချိုတ်ဂျိုၚ် ကောန်ဒပ်ကံၚ်ဇြဳပၞာန်တံကီုလေဝ် ပွကောန်ဒပ်ကံၚ်ဇြဳပၞာန်လ္ၚဵုတံ ဂြိပ်တိတ်တံကဵု ပွဖျေံလွဟ်ဒုၚ်ကျတံ နွံဒၟံၚ်ရဂှ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ဗ္ဒိုပ်ဒပ်(လှဂွန်းပျို) ကံၚ်ဇြဳပၞာန်ဂှ် ဒှ်ဗ္ဒိုပ်ဖျေံလဝ်ဒပ် ဒၞါဲဗ္စိုပ် တွဵုရးဍုၚ်မန်၊ ပွိုၚ်ဍုၚ်ၜဳကလေၚ်တံကဵု တွဵုရးကရေၚ် ပွိုၚ်ဍုၚ်ဖာပေါန် ဗ္ဒါဲဂၠံၚ်ကာ ၜဳကလေၚ်-ဖာဗေါန် လ္တူသၟန်က္ၜဳၜဳကလေၚ်ဂှ် မွဲဗ္ဒိုပ်လေဝ်ဒှ်ရ။
ဟိုတ်နူဗ္တိုက်သီကေတ်လဝ် ဗ္ဒိုပ်(လှဂွန်းပျို)မာန်လဝ်ဂှ်ရ လ္တူဂၠံၚ် ဖာဗေါန်-ၜဳကလေၚ် တိဍာ် KNU ဒပ်မဟာ(၅)ဂှ် ဗ္ဒိုပ်ဒပ်ကံၚ်ဇြဳပၞာန်တံ အိုတ်အးအာယျတုဲ ပ္ဍဲဂၠံၚ် ဖာဗေါန်-ၜဳကလေၚ် ပ္ဍဲတိဍာ်ဒပ်မဟာ(၁)ဂှ်ရ ဒပ်ကံၚ်ဇြဳပၞာန်လ္ၚဵုတံ သှ်ေဒၟံၚ်ဏီရ။
ပ္ဍဲပေါဲဗ္တိုက်သီဗ္ဒိုပ်(လှဂွန်းပျို)ဂှ် ကုကောန်ဒပ် ဟွံဖျေံလွဟ်မွဲသာ် ဂြိပ်တိတ်ဗၠးဒၟံၚ်တံဂှ် KNLA ဒပ်မဟာ(၅)တံ ဗက်ဗ္တိုက်ပသောၚ်ဒၟံၚ်တုဲ ပ္ဍဲကောန်ဒပ်ကံၚ်ဇြဳပၞာန် ဖျေံကၠုၚ်လွဟ်တံဂှ် ကဆံၚ်သၞာဲဒဴမပါလုပ် ကောန်ဒပ် (၁၀)တၠပြၚ် ပါလုပ်ရဂှ် ဂွံတီကေတ် နူကဵုပရိုၚ်တမ်ရိုဟ် ပရေၚ်ပၞာန်ဗလးတိတံရ။
ဗ္ဒိုပ်ကံၚ်ဇြဳပၞာန် မၞုံပ္ဍဲတိဍာ် KNU ဒပ်မဟာ(၅) ခရိုၚ်ဖာဗေါန်တံဂှ် သ္ပတံနူသၞာံတုဲကၠုၚ်တေံ လ္ပာ်အိုတ်ဂှ် ဒးဒုၚ်သီဒၟံၚ် အဆက်က်တုဲ ဗျူဟာပၞာန်ဖာဗေါန် သှ်ေဒၟံၚ်တံဂှ်လေဝ် ဒးဒုၚ်ဗိုၚ်ကၟာတ်ဆိုအ်ဒၟံၚ်ရ။
ပ္ဍဲပေါဲဗ္တိုက်က္တဵုဒှ်လဝ် ပ္ဍဲခရိုၚ်ဖာဗောန်တံဂှ် ဒပ်ကံၚ်ဇြဳပၞာန်တံ ကၠုၚ်စိုပ်ပန်ပှော်ဒၟံၚ် နကဵုအရီုဗၚ်တရဴကျာ လ္တူကွာန်တံတုဲ ဟိုတ်နူပေါဲဗ္တိုက်ၜါလ္ပာ်ကြံၚ်မ္ၚုဟ်ဒၟံၚ်ဂှ်ရ ညးဍုၚ်ကွာန်ဒေသတံဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဍုၚ်ကမမံၚ် ကေုာံ ကွာန်မၞုံပ္ဍဲပွိုၚ်ဍုၚ်ၜဳကလေၚ်တံကဵု ပ္ဍဲဒေသမျာၚ်ကျဳၚူတံရ။
ပရိုၚ်-သြၚ်လောန်တိုၚ်မ်