ဝါယှေန်တာန်၊ ဂျာန္နဝါရဳ (၁၁)
စဳဇန်လဝ် သွက်ဇကုတံကဵု သမ္မတရုယှာ ပလာဒဳမာပူတေန်တံ သ္ဂောံဆဵုဂဗညးသ္ကအ်ရဂှ် ဒဝ်နယ်ထရာန် ညးဂွံဇၞးလဝ်မာဲသမ္မတ အမေရိကာန်ဂှ် ဟီုဂးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၉)ဂှ်ရ။
ဆ္ဂး အခိၚ်လဵု က္ဍိုပ်သ္ကိုပ် ဒုၚ်ရုဲသမ္မတရဳပါပလေတ်ကာန် ၜါတၠတံ ဆဵုဂဗညးသ္ကအ်ရောၚ်ဂှ် ထ္မံက်ထ္ၜးလဝ် ဟွံမဲဏီရ။
ပ္ဍဲဂိတုဂျာန္နဝါရဳ စၟတ်တ္ၚဲ (၂၀)ဏံ အခိၚ်ထရာန်ကၠုၚ်စိုပ် သ္ၚိဗုမ္ဂး သွက်ပရေၚ်ရုယှာၜက်ၜေတ်ယူကရုၚ် စလဝ် ပ္ဍဲသၞာံ ၂၀၂၂ ဂိတုဖေဖဝ်ဝါရဳဂှ် ဂွံဒေါံဒေၚ်အာဂှ် တၚ်စၟဳသွက်ဂွံပသောၚ်အာ နကဵုနဲကဲ ကလုတ်တမာန်တံ မံက်တိတ်ဒၟံၚ်ရ။
ယဝ်ရကေတ်ကၠုၚ်ပရေၚ်ၜိုဟ်လလမ် ဟရေက်ဟရေက်မ္ဂး သွက်ယူကရုၚ်ဂှ် သ္ဇက်ဂွံဒးဒုၚ်ဂိတံ ဂၠိုၚ်မာန်ရောၚ် ပရေၚ်ဂွိၚ်ဂွါဲ ပ္ဍဲဍုၚ်ကိပ်တံ မံက်တိတ်ဒၟံၚ်ရ။
ဂလာန် ပရေၚ်ဒေါံဒေၚ်ပေါဲပၞာန် ယူကရုၚ်ဒးကဵုသ္ကုတ်ဍုၚ်ယူကရုၚ် ကုရုယှာ ဗွဲမဂၠိုၚ်ဂၠေၚ်မာန်ဂှ် ညးကဵုကသပ်ထရာန်တံ ပ္တိုန်ထ္ၜးလဝ်ရ။
ဟိုတ်နူသမ္မတပူတေန် မိက်သ္ဂောံဆဵုတုဲ စဳဇန်လဝ်သွက်ဂွံဆဵုဂဗတံရဂှ် ကိုပ်ကၠာနူဟွံဂွံဆဵုဂဗကဵု သ္ကိုပ်အုပ်ဓုပ်ရဳပါပလေတ်ကာန် ပ္ဍဲသ္ၚိဒၟံၚ် တွဵုရးဖလဝ်ရဳဒါဂှ် ထရာန်ဟီုဂးလဝ်ရ။
သမ္မတပူတေန် မိက်သ္ဂောံဆဵုရောၚ်ဂှ် ဟီုလဝ်ဂတမၞိဟ်ဂမၠိုၚ်တုဲ နအလဵုဇကုတံဂှ် ဒးပသောၚ်ထောံ အယှုက်ယှုဲ ဆီခန်ဒၟံၚ်ရောၚ်ဂှ် စၞောန်လဝ် ပေါဲဗ္တိုက် ယူကရုၚ်-ရုယှာတံတုဲ ဟီုဂးလဝ်ရ။
ကြဴနူပွၜက်ၜေတ်ရုယှာတုဲဂှ် ပ္ဍဲလက်ထက် သမ္မတဒဳမိုဝ်ကရက်အမေရိကာန် ဂျဵုဗိုၚ်ဒေန်ဂှ် သွက်အရီုဗၚ်ပရေၚ်ဂီုကၠီုယူကရုၚ်ဂှ် ဒဝ်ဠာအမေရိကာန် (၆၀)ဗဳလျာန်မပါလုပ် ကဵုလဝ် အရီုဗၚ်ၚုဟ်မးမၞုံ ဒဝ်ဠာအမေရိကာန် (၁၇၅)ဗဳလျာန်တံရ။
ဆ္ဂးထရာန်ဂှ် သွက်ပေါဲပၞာန်သ္ဂောံဒေါံဒေၚ်ဂှ် မိက်ဂွံကၠောန်သ္ပဗွဲမပြဟ်ရဂှ် ဟီုလဝ်တုဲ ပ္ဍဲလက်ထက်ညး ပွကဵုအရီုဗၚ်အမေရိကာန်တံဂှ် ဆက်နွံဒၟံၚ် အတိုၚ်သၞောတ်တြေံဏီဟာဂှ် ဟွံချိုတ်ပၠိုတ်ရ။
ပွထရာန်မိက်သ္ဂောံဆဵုဂဗသဳကၠဳဂှ် ၜိုန်ရပူတေန် ဒုၚ်မံၚ်တၠုၚ်ကီုလေဝ် စဵုကဵုအခိၚ်လၟုဟ် ပွအာတ်မိက်လဝ်ဗွဲမလုပ်သၞောဝ်တံ ဟွံမွဲဏီရဂှ် ညးမၞုံအခေါၚ်ဟီုဂး နန်ထဝ်ကရေန်မလေန် ဒဳမိထရဳပက်သကအ်ဗ်ဂှ် ဟီုဂးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၉) အခိၚ်နူဂယးဂှ်ရ။
နကဵုထရာန်ဂှ် သွက်ဂွံမၚ်အခိၚ် ကေတ်ကဆံၚ်သမ္မတဂှ် သာတုဲထေက်ကြိုက်ရဂှ် ညးမၞုံအခေါၚ်ဟီုဂး ပက်သကအ်ဗ် ဟီုဂးလဝ်ရ။
ပ္ဍဲအကြာတံဏံဂှ် အခိၚ်အမေရိကာန်တံ လလောၚ်တြးလဝ် ဒဒှ်ရ ပလံၚ်အာကဵုအရီုဗၚ် သွက်ယူကရုၚ်တံဂှ် သမ္မတယူကရုၚ် ဗိုဝ်လိုဒဳမာ ဇြဳလာန်သကဳဂှ် သွက်ဂွံဗလးကဵုကောန်ပၞာန် သွက်ဍုၚ်ညးတံဂှ် အာတ်မိက်လဝ်ရ။
ယဝ်ရကောန်ပၞာန်ဍုၚ်ပလိုတ်တံ စိုပ်ကၠုၚ်ဗလးတိယူကရုၚ်တံမ္ဂး ဗဒေါံထောံပွဗ္တိုက်ရုယှာတံ ဗွဲမပြဟ်မာန်ရောၚ်ဂှ် သမ္မတ ဇြဳလာန်သကဳဂှ် ဟီုသ္ဂးလဝ်ရ။
Ref:BangKokpost