တၞၚ်သဳ၊ ဂျာန္နဝါရဳ ၁၇
ပ္ဍဲရးတၞၚ်သဳ အပ္ဍဲပွိုၚ်မွဲဂိတုတုဲကၠုၚ်တေံ ပါဲနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်ပၞာန်ကျာတံတုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံလဝ် စဵုကဵုတြဴဠက်ဘာ်ပြၚ်ဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ရ။
တုဲကၠုၚ်ပ္ဍဲဂိတုဒဳဇြေမ်ဗာ ရာသဳဗြဲကျာတၟးဂှ် ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန်တ္ၚဲဇမၠိၚ် အပ္ဍဲကွာန်ဂမၠိုၚ်တုဲ
နူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်ပၞာန်ကျာ၊ ပၞာန်ဍာ်တံတုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်တံ သာဂၠိုၚ်ကၠုၚ်လဝ်ရ။
ပ္ဍဲကဵုပွိုၚ်ဍုၚ် အပ္ဍဲခရိုၚ်ထဝါဲတံဂှ် ညးဍုၚ်ကွာန်ကောန်အရာပ် ထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံ ၂၅၉၀၀ ပြၚ်တုဲ ပ္ဍဲပွိုၚ်ဍုၚ်လံၚ်လုၚ်မွဲဓဝ်ဂှ် ဟိုတ်နူပၞာန်ထ္ပက်ကံၚ်ဇြဳပၞာန် တ္ၚဲဇမၠိၚ်ဂှ်တုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံလဝ် ဗ္ဒါဲ ၁၀၀၀၀ ဂှ် သ္ဂးရ။
ပ္ဍဲကဵုပွိုၚ်ဍုၚ် နွံအပ္ဍဲခရိုၚ်ဗိက်တံဂှ်လေဝ် ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တ္ၚဲဇမၠိၚ်ဂှ်တုဲ က္တဵုဒှ်ပေါဲဗ္တိုက်ဟွံမွဲမွဲသာ် နူကဵုပၞာန်ကျာ၊ ပၞာန်ဍာ်တံဂှ် ပန်ပှော်ဗ္တိုက်ကၠုၚ်ဒၟံၚ် သီုကဵုအပ္ဍဲကွာန်တံဂှ်တုဲ ညးဒးထောံလသာဌာန်ဒၟံၚ် နွံကၠုၚ် ၃၉၄၀၀ ပြၚ်ရ။
ပ္ဍဲကဵုဏံ ပ္ဍဲကဵုဗ္ဒိုပ်ပါဲဒဴဘဲပၞာန်ပဠဝ်ဂှ် ညးမံၚ်တန်တဴဒၟံၚ် နွံဒၟံၚ်ပွဳပွူ ၃၀၀၀ ရတုဲ ညးပါဲဒဴဘဲပၞာန်သှ်ေဒၟံၚ်တံဂှ်ဝွံ ပ္ဍဲကဵုဒဵုဂြိုပ်မကြပ်တံကဵု ပ္ဍဲကၠအ်ဂူဝါတံဂှ် ဗီုပြေပြံၚ် ဒးပါဲဒလေတ်ဒၟံၚ်အိုတ်ဂှ် ညးမရီုဗၚ်ကဵုဒၟံၚ် ပရေၚ်ညးပါဲဒဴဘဲပၞာန်တံ ဟီုရ။
အပ္ဍဲဂိတုတုဲကၠုၚ်တေံ တိဍာ်လ္ၚဵု နူကဵုဍုၚ်ထဝါဲကဵု ပွိုၚ်ဍုၚ်ပဠဝ်တံဂှ် ကံၚ်ဇြဳပၞာန် ကလေၚ်ထ္ပက်ကၠုၚ်ကရောၚ်ပၞာန်တုဲ ရဲကလေၚ်စဴမံၚ်လဝ်ကၠာတေံဂှ်လေဝ် ထပ်ဒးပါဲလဝ်ဘဲပၞာန်ရောၚ် သ္ဂးရ။
ပ္ဍဲခရိုၚ်ကအ်သံၚ်ဂှ်လေဝ် ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ဟိုတ်နူပရေၚ်ရပ်ဒက်ညးဍုၚ်ကွာန်ကောန်အရာပ်တံဂှ်တုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံလဝ် ပွဳပွူ ၅၀၀ ရ။
ဒပ်ကံၚ်ဇြဳပၞာန်ဝွံ ယဝ်ဒးဒုၚ်ဗ္တိုက်ကဵုဗ္ဒိုပ်မွဲမွဲမ္ဂး ပန်ပှော်စုတ်လွဟ်ဇၞော် အပ္ဍဲကွာန်ဗ္ဒါဲဗ္ဒါဲတံဂှ်ကီု၊ ရပ်ဒက်ညးဒေသတံကီု၊ ဂစိုတ်ဂယိုၚ်ကီု ကေုာံ ထ္ပက်ကရောၚ်ပၞာန်တံ ကၠောန်လဝ်တုဲ လၟိဟ်ညးပါဲဒဴဘဲပၞာန်ဝွံ ဟွံအောန်စှ်ေကၠုၚ်မွဲသာ် ဂၠိုၚ်ကၠုၚ်ဒၟံၚ်နူကဵုကၠာတေံရ။
လၟိဟ်ညးပါဲဒဴဘဲပၞာန် နွံပ္ဍဲရးတၞၚ်သဳဂှ်ဝွံ ကိုန်ဂစိုတ်ဟွံမွဲ တန်တဴကဵုအကာဲအရာပေါဲဗ္တိုက်က္တဵုဒှ်တံကဵု ကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ်ဂှ်တုဲ အပြံၚ်အလှာဲနွံဒၟံၚ်လၟိုန်ရ။
တုဲကၠုၚ်ပ္ဍဲဂိတုနဝ်ဝေမ်ဗာတေံဂှ်လေဝ် ပ္ဍဲရးတၞၚ်သဳဂှ် ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်တ္ၚဲဇမၠိၚ်တုဲ ရပ်ဒက်ဂစိုတ်ညးဍုၚ်ကွာန်ကောန်အရာပ်တံကဵု စံၚ်ပလီုပလာ်လဝ်သ္ၚိဒၟံၚ်တံဂှ်တုဲ ညးဒးထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံလဝ် ၆၀၀၀၀ ပြၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−တၞၚ်သဳဒဝ်ဏ