မတ်မလီု၊ ဂျာန္နဝါရဳ ၁၇
ပ္ဍဲတွဵုရးဍုၚ်မန် ညံၚ်ကဏ္ဍအာတရဴ ဂွံဖောအ်ဗြေဝ် သွက်ဂွံကၠောန်အာဂှ် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန််လဝ်ဂှ် ကဵုကၠုၚ်စၞောန် အပ္ဍဲကောံဓရီု ကမ္မတဳကမၠောန်အာတရဴမဆေၚ်စပ် တွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး ပ္ဍဲဂိတုဂျာန္နဝါရဳ ၁၄ တေံရ။
ပ္ဍဲကဵုဒေသအာတရရဴတံဂှ် ကၟုဲအာတရဴတံ လုပ်စိုပ်ကၠုၚ်ဒၟံၚ်ဂှ်တုဲ ကျာ်ဣသိယဵုကီု၊ ကျာ်စေတဳဣဓိဇၞော်ဇၞော်တံကဵု စမြိုၚ်သာသနာဂမၠိုၚ် ညံၚ်ဂွံဗၠးဘဲဂီုကၠီုဂှ်ကဵု စၞစစၞသုၚ် တိတ်နူဒေသတံဂှ် ညံၚ်ဂွံကၠောန်ပ္တိတ်သွံတြး ညံၚ်ဂွံမၞုံကဵုဍာ်ဒကေဝ်တံဂှ် ဟီုလဝ်ရ။
သ္အာၚ်နူဂှ်ပၠန် ပ္ဍဲဒေသလၟေၚ်တရဴတံဂှ် သွက်ဂွံစွံလဝ် စၟတ်သမ္တီသ္ဂောံထ္ၜးဂၠံၚ်တံဂှ်ကီု၊ ကဏ္ဍအာတရဴတောတက်မှ အခေါၚ်အရာကမၠောန်တံကဵု ပရေၚ်ပိုန်ဒြပ်ပရေၚ်မၞိဟ် တောတက်တိုန်ဏောၚ်ဂှ်တုဲ သွက်ဂွံခၞံဗဒှ်ကဵုလၟေၚ်တရဴတံအိုတ်ဂှ် ကဵုလဝ်စၞောန်ရ။
ညးထ္ၜးဂၠံၚ်ကၟုဲမွဲတၠဂှ်တှ်ေ ပ္ဍဲတွဵုရးဍုၚ်မန် ကၠောန်အာ ညံၚ်ကဏ္ဍအာတရဴ ဂွံတောတက်ဏောၚ် ဟီုကီုလေဝ် အာကၠုၚ်ဗွဲမဗၠးၜးဟွံဂွံတုဲ ညးအာတရဴဍုၚ်သ္အာၚ်တံမ္ဂး ဒးအာတ်မိက်ဒၟံၚ်အခေါၚ် ပ္ဍဲဌာနဝန်ဇၞော်ကာစဵုဒၞါတံဂှ်ရ အခက်အခုဲနွံဒၟံၚ်တၟာဂလိုၚ်ဂှ် ဟီုရ။
“ ဒးဟီုသွက်ကောန်ဍုၚ်သ္အာၚ်တံဂှ်ဟီုမ္ဂး ဍေံတံ ဒးကၠုၚ်မံၚ်ဒၟံၚ် နကဵုအခေါၚ်ဏောၚ်။ အခေါၚ်ဂှ်တှ်ေ ဒစးဒုၚ်ၜါသတ္တာဟတုဲ ဒးအာတ်မိက်ဒၟံၚ်။ ဒးအာတ်ဒၟံၚ် ပ္ဍဲဌာနဝန်ဇၞော်ကာစဵုဒၞါရ။ အခက်အခုဲဂှ်နွံကၠုၚ်နာနာ မွဲကဆံၚ်တုဲမွဲကဆံၚ်ရ။ ဒးပ္တိုန်ထ္ၜး သီုဂၞန်ဖုၚ်ညးဒဳကွဳစက်၊ ဂၞန်ဖုၚ်ညးထ္ၜးဂၠံၚ်၊ တၞးကာဒ်ကောန်ဍုၚ်၊ လာၚ်ဇြေန် ညးထ္ၜးဂၠံၚ်တံ ဒှ်တမ် နူတမ်စိုပ်ကၞောတ် လဴထ္ၜးတုဲ ဒးပ္တိုန်ကဵုရ။ ပ္ဍဲကဵုတွဵုရး ကေုာံ ရးဒေသတၞဟ်ဟ်တံှဂ်တှ်ေ ဟွံဒးကေတ်ပုဟ် အခေါၚ်ဂှ်။ ဥပမာ ယဝ်အာ ဗကာံဏောၚ်၊ အာမာန္တလေဝ်ဏောၚ်ဟီုမ္ဂး သွက်ကောန်ဍုၚ်သ္အာၚ်တံဂှ် ဟွံဒးကေတ်အခေါၚ်ပုဟ်။ ကောန်ဍုၚ်သ္အာၚ်လ္ၚဵုတံဂှ်တှ်ေ နူလ္ဂုၚ်ဂှ် မိက်ဂွံအာ ၜိုတ်ကျာ်ဣသိယဵုရဏောၚ်။ ညအ်ဂှ် ဒးပ္တိုန်အာတ်မိက်အခေါၚ်ရ” သာ်ဝွံ သ္ဂးရ။
ကၠာတေံမ္ဂး အပ္ဍဲတွဵုရးဍုၚ်မန် ယဝ်ညးအာတရဴဍုၚ်သ္အာၚ်တံ လုပ်စိုပ်မ္ဂး ဒးပ္တိုန်ထ္ၜးဒၟံၚ် ဌာနဝန်ဇၞော်ဟိုဝ်တေဝ်ကဵု ပရေၚ်အာတရဴတံကီုလေဝ် လၟုဟ်ဂှ် ဒးပ္တိုန်ထ္ၜးဒၟံၚ် သီုဌာနဝန်ဇၞော်ကာစဵုဒၞါဂှ်တုဲ မ္ၚးနူကဵုအခိၚ်လအ်လဂှ် အာကၠုၚ်ဗွဲမဗၠးၜးဟွံဂွံတုဲ ၜိုတ်ဒၞါဲဍေံတံဖျေံကဵုဂှ်ရဟေၚ် ဂွံအာဒၟံၚ်ဂှ်ရ တရဴလဇုဲလဇ က္တဵုဒှ်ဂှ် ညးဆက်ဟီုရ။
ပ္ဍဲအရာအာကၠုၚ်တရဴဂှ်လေဝ် ကံၚ်ဇြဳပၞာန် ပတေၚ်ဂြတ်လဝ်ပရေၚ်စၟဳတ်ကီု၊ ပ္ဍဲကဵုသၞေဟ်ကၚ်တံဂှ် ကံက်ဒၟံၚ်သြန် ဂၠိုၚ်ကဵုဆကီု၊ ဂီုကၠီုဟွံမွဲကီု၊ မ္ၚးနူကဵုအမိၚ်တိတ်ဗ္တံဟွံဂွံဂှ် ဟိုတ်နူအခက်အခုဲ မ္ဒးတေၚ်စရၚ်ကၟုဲတံဂှ်တုဲလေဝ် သွက်ကဏ္ဍအာတရဴ ဂွံဖောအ်ဗြေဝ်တိုန်ဂှ် ဒှ်ဒၟံၚ်ပလာပ်ပထုဲရောၚ် သ္ဂးရ။
ကံၚ်ဇြဳပၞာန်ဂှ်တှ်ေ ၜိုန်ရဟီုဒၟံၚ် ကၠောန်အာညံၚ်ကဏ္ဍအာတရဴ ဂွံဖောအ်ဗြေဝ်ဏောၚ်ကီုလေဝ် ဌာနဝန်ဇၞော်ကာဍုၚ်သ္အာၚ်အမေရိကာန်ဂှ်တှ်ေ ပ္ဍဲဂိတုဂျာန္နဝါရဳ ၉ တေံ ကဵုလဝ်သတိ ဍုၚ်အာတရဴဟွံထေက် ၂၀ ဍုၚ် နဒဒှ်ဍုၚ်အရံၚ်သာ်ဗ္ကေတ် မၞုံကဆံၚ် ၄ ဂှ် ပါလုပ်သီုဍုၚ်ဗၟာရ။
ပရိုၚ်−သြၚ်လောန်တိုၚ်(မ်)
ဗီု−MOI