ဒိုဝ်ဟာ၊ ဝါယှေန်တာန်၊ ဂျာန္နဝါရဳ ၁၇
ကြဴနူက္တဵုဒှ်ပေါဲပၞာန် ပွိုၚ် ၁၅ ဂိတုတုဲဂှ် ပ္ဍဲဒေသဂါဇြာဂှ် သွက်ဂွံဒေါအ်ပန်ပှော် ကေုာံသွက်ဂွံကလေၚ်ဗလးကဵု ညးဒဒုၚ်ရပ်လဝ်တံဂှ် အကြာအေဿရေ ကေုာံ ဟာမာသ်တံ ကလိဂွံတၚ်တုပ်စိုတ်တုဲယျဂှ် ကာတာ ကေုာံ အမေရိကာန် မလုပ်ပ္ညဳပ္ညပ်လဝ်အကြာတံ ဟီုလဝ်ရ။
အတိုၚ်ဂကောံဝန်ဇၞော်အလဵုအသဳအေဿရေ မသ္ပဒတန်ကဵုလဝ်ဂှ်မ္ဂး ပရေၚ်ဒေါအ်ပန်ပှော်ဂှ်ဝွံ လမျီုစလုပ်အာ ပ္ဍဲဂိတုဂျာန္နဝါရဳ ၁၉ ဏောၚ်ဂှ် သ္ကိုပ်ဝန်ဇၞော်ကာတာ အဗဒူရာမာန် အေဝ်သာနဳ ဟီုရ။
ညံၚ်ညးဒးဒုၚ်ရပ်လဝ်ဂမၠိုၚ် ဂွံကလေၚ်ဆဵုဂဗကဵု ဂြောဝ်ဂတာညးတံ၊ ညံၚ်ဂွံထံက်ပၚ် ကဵုအရီုဗၚ်ပရေၚ်ဗ္စာရဏာမၞိဟ် သွက်ကောန်ဍုၚ်ပါလက်သတိုၚ်တံဂှ် နွံပၟိက်ဒၟံၚ်ဗွဲမဂၠိုၚ်ဂှ်ရ ဒဒှ်ရဒုၚ်တၠုၚ် ပရေၚ်ဒေါအ်ပန်ပှော်ဂါဇြာဂှ် သမ္မတအမေရိကာန် ဂျဵုဗိုၚ်ဒေန် ဟီုလဝ်ရ။
သွက်တၚ်နၚ်တၚ်တုပ်စိုတ် လက္ကရဴအိုတ်တံဂှ် ဆက်ရေၚ်တၠုၚ်ဒၟံၚ်ဖိုဟ်ရောၚ် သ္ကိုပ်ဝန်ဇၞော်အေဿရေ နေတာန်ညာဟု ဟီုလဝ်တုဲ သ္ပဟိုတ်ကဵုစွံဗွဲမဇြိုဟ်နက် ရေၚ်တၠုၚ်ကဵုလဝ်တုဲ ဒဒှ်ရတၚ်တဴဂုဏ် ကုသမ္မတအမေရိကာန် ဂျဵုဗိုၚ်ဒေန်ဂှ် ဟီုလဝ်ရ။
တၚ်တုပ်စိုတ်ဏံဝွံ ဒှ်သွဟ်ကောန်ဍုၚ်ပါလက်သတိုၚ်တံ မဒုၚ်လဝ်အဍေဝ်အဍာတံဂှ်ရောၚ် က္ဍိုပ်သ္ကိုပ်ဟာမာသ် ခါလေတ် အေဝ် ဟေယျာ သ္ဂးရ။
ဟိုတ်နူပရိုၚ်ဏံတုဲ ဂြောဝ်ဂတာညးဒးဒုၚ်ရပ်လဝ် ပ္ဍဲအေဿရေကဵု ပါလက်သတိုၚ်တံ ဗွဲမဂၠိုၚ် ဒုၚ်ကေတ်ပေါဲအံၚ်ဇၞးအိုတ်ကီုလေဝ် အသိၚ်ပေါဲပၞာန်ဗလးတိဂှ်တှ်ေ ဟွံယအ်အာဏီပုဟ်ဂှ် ဂွံတီကေတ်ရ။
ဒဒှ်ရဒေါအ်ပန်ပှော်ဂှ် ကာတာ လလောၚ်တြးတုဲဂှ် ဟိုတ်နူပရေၚ်ဗ္တိုက်ပၞာန်ကျာ အေဿရေတုဲ မၞိဟ် ၂၀ ပြၚ် ချိုတ်အာလဝ်ရောၚ် ဂကောံဟာမာသ် ဟီုလဝ်ရ။
စပ်ကဵုပရေၚ်ဗ္တိုက်ဏံတုဲ ဒပ်ပၞာန်အေဿရေ မုမွဲမှ ဟွံဂွံဟီုဏီရ။
ပ္ဍဲသၞာံ ၂၀၂၃ ဂိတုအံက်တဝ်ဗာ ၇ ဂှ် ဂကောံဟာမာသ် လုပ်စိုပ်ဗ္တိုက် သ္ကုတ်သၠုၚ်ကျာဍုၚ်ဂှ်တုဲ ရပ်ဒက်ကော်ဏာလဝ် ညးဒးဒုၚ်ရပ်ဂမၠိုၚ်တုဲ အေဿရဂှ်ေတှ်ေ ဂွံပါ်ထ္ကးဂကောံဟာမာသ်ဂှ် ဗ္တိုက်ဒၟံၚ်ရ။
ဂကောံဟာမာသ် အုပ်ဓုပ်ဒၟံၚ် ပ္ဍဲဂါဇြာဂှ် အေဿရေ၊ အမေရိကာန် ကေုာံ ဍုၚ်လ္ၚဵုတံဂှ်တှ်ေ စၟတ်သမ္တီလဝ် နဒဒှ်ဂကောံပကီုပရာပ်ရ။
ဟိုတ်နူပရေၚ်ဗ္တိုက် နူကဵုအေဿရေ ပ္ဍဲဂါဇြာဂှ်တုဲ မၞိဟ် ၄၆၇၀၀ ချိုတ်အာလဝ်တုဲ မၞိဟ်ဒးထောံလသာသ္ၚိဌာန် ဒးဂြိပ်ဒဴဒၟံၚ် နွံဗွဲမဂၠိုၚ်ဂၠေၚ်ရောၚ် ဌာနဝန်ဇၞော်ပရေၚ်ထတ်ယုက်ဂါဇြာ ဂကောံဟာမာသ်ပိုၚ်ဂှ် ဟီုလဝ်ရ။
ညးဒးဒုၚ်ရပ်လဝ်ကဵုဟာမာသ် နွံဒၟံၚ် ၉၄ တၠဏီဂှ် စှ်ေစိုတ်တုဲ ပ္ဍဲကဵုဏံ ၃၄ တၠ ချိုတ်အာယျ ဒဒှ်ရချိၚ်ခယျကေတ်ဂှ် အေဿရေ ဟီုလဝ်ရ။
Ref: BBC