မတ်မလီု၊ ဂျာန္နဝါရဳ ၁၇
ပ္ဍဲအရာဒက်ပ္တန် ပရေၚ်ဆက်ဆောံမဟာမိတ် ကုဂကောံမဟာမိတ်ကောန်ဍုၚ်အရၚ်တံ ညံၚ်ဂွံခိုၚ်ဗိုန်ဂှ် ဒးဒှ်ဒပ်ပံၚ်ကောံ မစှ်ေကဵုနတဲရောၚ် သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလ ဟီုရ။
ပ္ဍဲကဵုကောံဓရီုအလဵုအသဳ အလဵုအသဳညဳသၟဟ်ဂကူ မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၁၄ ဂှ် သမ္မတယာယဳဂှ် ဟီုလဝ်ရ။
မၞိဟ်ပူဂဵု မသ္ကေက်သ္ကာ အာက္ဍိုပ်မာန် ပ္ဍဲကဵုဂကောံဇြဟတ်မဟာမိတ်တံဂှ် ထပ်ဗပေၚ်စုတ်ဇြဟတ် အပ္ဍဲဂကောံအလဵုအသဳတုဲ ဆက်တုဲထ္မံက်အာရုပ်ရဴ လၟေၚ်ကမၠောန်ပၠန်ဂတး သာတုဲလှဲလးနူအကာဲအရာလၟုဟ်ဏံဂှ်မာန်ဏောၚ်ဂှ် သ္ဂးရ။
ပ္ဍဲကဵုမဟာမိတ် NUG ဂကောံရပ်လွဟ်ကောန်ဍုၚ်အရၚ်ဂမၠိုၚ်ဂှ် ဗော်သွးကောန်ဂကူကရေၚ် KNU ၊ ဗော်တောတက်ကောန်ဂကူကရေၚ်ဍာဲ KNPP ၊ ဒပ်ပၠတရဴကောန်ဂကူချေၚ် CNF ကေုာံ ဂကောံပၠန်ဂတးကောန်ဍုၚ်အရၚ်တၞဟ်ဟ်တံ ပါလုပ်ရ။
သ္အာၚ်နူဂှ်ပၠန် ဒပ်ပၞာန်ဗၠးၜးကချေၚ် KIA ကေုာံ ဒပ်ပၞာန်ရခေၚ် AA တံဂှ်လေဝ် ဂွံပံၚ်တောဲအာ သီုပရေၚ်ဍုၚ်ကွာန်၊ ပရေၚ်ပၞာန် ပေၚ်ၚ်မာန်ဂှ် ပ္တိတ်ဒၟံၚ်ဇြဟတ် ညံၚ်ပရေၚ်ဆက်ဆောံမဟာမိတ် ဂွံတောတက်ခိုဟ်မိုဟ်တိုန် မဒှ်ရ။
တမ်ဒပ်ဒပ်ပၞာန်စဵုဒၞါညးဍုၚ်ကွာန် PDF သၟဝ်ဌာနဝန်ဇၞော်ကာစဵုဒၞါ NUG ကဵု ပကဖတံဝွံ ညံၚ်ပရေၚ်ဗၠးၜးတိဍာ် ဂကောံပၠန်ဂတးကောန်ဍုၚ်အရၚ်မဟာမိတ်တံဂှ် ပ္ဍဲတွဵုရးသီုဖအိုတ်ဂှ် ပံၚ်တောဲလုပ်မံၚ်ပေါဲဗ္တိုက်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် မလလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၄ တေံရ။
ပ္ဍဲကဵုဂလာန်သြဝါဒတ္ၚဲကၠောံသၞာံဂှ်လေဝ် သၞာံ ၂၀၂၅ ဏံ ဂွံဖာဲပ္တိတ်ကံၚ်ဇြဳပၞာန်ဒတုဲမာန်ဂှ် နကုဂကောံရပ်လွဟ်ကောန်ဍုၚ်အရၚ် ပၠန်ဂတးကောန်ဍုၚ်အရၚ်တံကဵု ဂကောံဇြဟတ်ပရေၚ်ဍုၚ်ကွာန်တံ စိုပ်အခိၚ်ဒးထ္ၜးပျး ပရေၚ်ပံၚ်တောဲ လ္ဂောံကဵုပရေၚ်ဍုၚ်ကွာန်၊ ပရေၚ်ပၞာန်တံဂှ်ယျဂှ် သမ္မတယာယဳ ဟီုလဝ်ရ။
ဟိုတ်ဂှ်ရ ဂိုတ်ဂ္စါန်အာ ပ္ဍဲကဵုကဏ္ဍကေၚ်ကာမဟာမိတ်တံ နူကဵုဏံဏောၚ်ဂှ် ကဵုလဝ်သမ္တီတုဲ တိုၚ်ပ္ကဴပၠန်ဂတးက္ညၚ် အဓိကဂှ်ဝွံ သွက်ဂွံပလီုကၠေံသၞောတ်တၠအဝဵုပၞာန်ကဵု သွက်ဂွံဒက်ပ္တန်ကၟိန်ဍုၚ်ဖေဝ်ဒရာဒဳမဝ်ကရေဇြဳရောၚ် ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− NUG