ရေဝ်၊ ဖေဖဝ်ဝါရဳ ၂
တွဵုရးဍုၚ်မန် ပ္ဍဲဍုၚ်ရေဝ် ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ်ရေဝ် အပ္ဍဲပရေၚ်ပန်ပှော် မက္တဵုဒှ်လဝ် ပွိုၚ်ၜါနာဍဳပြၚ်ဂှ် ကောန်ဒပ်ဗၠာဲသၟိၚ်ပိတၠ ချိုတ်အာတုဲ ညးမဒှ်သ္ကိုပ်ဗ္ဒိုပ် ကလိဂွံအာဝပ်သ္ကာတ်မြဟ်ဂှ် ဂွံတီကေတ် ဇရေၚ်ညးဒေသတံကဵု ညးမစုက်လုက်ကဵု ဒပ်ဗၠာဲသၟိၚ်တံရ။
ပရေၚ်ပန်ပှော် မက္တဵုဒှ်လဝ် ပ္ဍဲဂိတုဖေဖဝ်ဝါရဳ ၁ အခိၚ်နူဂယး ၜိုတ် ၉ နာဍဳဏံဂှ် နူကဵုဂကောံဒုဂအုပ်ဗၠာဲသၟိၚ် နာၚ်လွေန်ဥူ နူဗ္ဒိုပ်ဗၠာဲသၟိၚ်ၝောံဍုၚ်ရေဝ် က္ဍိုက်ပ်တုဲ အခိၚ်အာစိုပ်ပလံၚ်ပုၚ်ဂွဳ ကုကောန်ဒုဟ်တံဂှ် ပရေၚ်ပၠံၚ်လွဟ်ပန်ပှော်တံ က္တဵုဒှ်လဝ်ရ။
အပ္ဍဲပရေၚ်ပန်ပှော်ဏံဂှ် ကောန်ဒပ်ဗၠာဲသၟိၚ်ပိတၠ ပါလုပ်သီုကဵုဒုဂအုပ်ဗၠာဲသၟိၚ် နာဲလွေန်ဥူ ချိုတ်အာလဝ် အပ္ဍဲဗ္ဒမ်အချုက်တံဂှ်တုဲ ညးမဒှ်သ္ကိုပ်ဗ္ဒိုပ် ဒုသ္ကိုပ်ဗၠာဲသၟိၚ် မျေတ်ဥူဝွံ ကလိဂွံအာဝပ် မဒးဂွိၚ်တုဲ ပလံၚ်ဏာလဝ် ရုၚ်ဂဥုဲညးဍုၚ်ကွာန်မတ်မလီုဂှ် ညးမစုက်လုက်ကဵု ကောန်ဒပ်ဗၠာဲသၟိၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကဵုလၟေၚ်ဒဒှ် ပရေၚ်ပၠံၚ်လွဟ်ပန်ပှော်ဏံဂှ် ကောန်ဒုဟ်ပန်တၠ ဂြိပ်ဗၠးတိတ်အာတုဲ ကောန်ဒုဟ်ဟွံအောန်နူကဵုပိတၠ ကလိဂွံလဝ်ဝပ်ကီုလေဝ် လ္ပာ်ဒပ်ဗၠာဲသၟိၚ်တံ ပလံၚ်ဏာကဵုလဝ် ရုၚ်ဂဥုဲဟွံမွဲဂှ် သ္ဂးရ။
ပ္ဍဲကဵုချာန်နေဝ်တြးဝါဒ ဒပ်ကံၚ်ဇြဳပၞာန်တံဂှ် အပ္ဍဲပရေၚ်ပၠံၚ်လွဟ်ပန်ပှော်ဏံ ကောန်ဒုဟ်ပၠံၚ်လဝ်လွဟ် ကလေၚ်တဝ်စၞေဟ်လဝ်တံဝွံ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ဖျေံလွဟ်ဒုၚ်ကျလဝ်ရောၚ် ချူထ္မံက်ထ္ၜးဒၟံၚ်တံ နွံဒၟံၚ်ရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ မ္ၚးနူကဵုဒၞါဲလုပ်တိတ်ဍုၚ်တံဂှ် လ္တူဍုၚ်ဒၞါဲဇဳဒိုဟ်ဂှ် ဗက်ဂၠိုက်ဂၠါဲဒၟံၚ် ကောန်ဒုဟ်ပန်တၠ မဂြိပ်တိတ်အာဂှ်ရောၚ် ဂွံတီကေတ် ဇရေၚ်ညးဒေသတံရ။
စပ်ကဵုလၟေၚ်ဒဒှ်ကောန်ဒုဟ် နူဗ္ဒိုပ်ဗၠာဲသၟိၚ်ဍုၚ်ရေဝ် ပၠံၚ်လွဟ်ဂြိပ်တိတ်အာဂှ်တုဲ လ္ပာ်ကံၚ်ဇြဳပၞာန် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ