နေဗျဳဒဝ်၊ ဖေဖဝ်ဝါရဳ ၂
ထပ်ပပဵုပ္တိုန်အာယုက်ကာလကာတၟေၚ် ၆ ဂိတုပၠန်တုဲဂှ် ကလေၚ်ဒက်ပ္တန်ပလေဝ်လဝ် ကောန်ဂကောံကံၚ်ဇြဳပၞာန်တံဂှ်တုဲ ဒၞါဲကဆံၚ်ဝန်ဇၞော်လ္ၚဵုတံဂှ်လေဝ် သ္ပကၠုၚ်အပြံၚ်အလှာဲရ။
ပ္ဍဲကဵုကောန်ဂကောံကံၚ်ဇြဳပၞာန် ပလေဝ်လဝ်ဂှ် ၁၆ တၠဓဝ်ပါလုပ်တုဲ ပ္တိတ်ထောံ ဥူယှိုဲကျုၚ်ကဵု ဥူယာန်ကျဝ်တံ နူကဵုကောန်ဂကောံတုဲ ခါန်ကၞက်ပ္တိုန်လဝ် နဒဒှ်ကောန်ဂကောံကဵုကသပ်ဗဟဵုရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒုသ္ကိုပ်ဗိုလ်ဇၞော် ယျာပျေအ် ဝန်ဇၞော်ကာအပ္ဍဲဍုၚ်ဂှ် ပြံၚ်လှာဲထောံ နဒဒှ်ဝန်ဇၞော်ကေၚ်ကာပယျဵုတုဲ ဒုသ္ကိုပ်ဗိုလ်ဇၞော် ထောန်န်နံၚ် ဝန်ဇၞော်ကေၚ်ကာပယျဵုဂှ်တှ်ေ ခါန်ကၞက်ပ္တိုန်လဝ် နဒဒှ်ဝန်ဇၞော်ကာအပ္ဍဲဍုၚ်ရ။
ဒုသ္ကိုပ်ဗိုလ်ဇၞော် ထောန်န်နံၚ်ဝွံ ဒှ်ညးကေတ်လဝ်လျိုၚ် ဥက္ကဌ ကမ္မတဳပ္ညဳပ္ညပ်ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ NSPNC မဒက်ပ္တန်လဝ် သွက်လၟေၚ်ကမၠောန်ပရေၚ်ဆဵုဂဗသဳကၠဳ ကံၚ်ဇြဳပၞာန်ဂှ်ရ။
ဒံက်တာ တိတ်တ်ခိုၚ် ဝန်ဇၞော်ပရေၚ်အာကၠုၚ်တရဴ ကေုာံ ဟဝ်တေဝ်ဂှ်ကီု၊ ဝန်ဇၞော်သၟာကမၠောန် ဥူမျေတ်နံၚ်၊ ဝန်ဇော်ကေၚ်ကာသၟတ် ကေုာံ ဝေၚ်ဒြဟတ် ဥူမေန်တုၚ်ဇြာန် ကေုာံ ဒုဝန်ဇၞော် ပရေၚ်ပညာ ဒံက်တာ မိုဝ်ဇြဝ်ထောန်တံဂှ် ပ္တိတ်လဝ်နူကဵုတာလျိုၚ်ရ။
အကြာပ်ဒပ်ဇြေယျ မသ္ပလဝ်ဇြဳဒဳအာမ် နူကဵုဒပ်စဵုဒၞါဲဘဲကျာဂှ် အခိၚ်အကာဲအရာပရေံကၠုၚ်ဒၟံၚ်ဏံ ဓဝ်ပတှ်ေအောန်စှ်ေကၠုၚ်ဒၟံၚ်လ္တူပူဂဵု အလဵုက္ဍိုပ်သ္ကိုပ်ပၞာန် မခါန်ကၞက်ပ္တိုန်လဝ်တံဂှ်ရောၚ် ဟီုရ။
“စှ်ေစိုတ်ဂှ်တှ်ေ အခိၚ်အကာဲအရာပရေံစှ်ေကၠုၚ်ဒၟံၚ်သာ်ဏံဂှ် ဟွံပတှ်ေကၠုၚ် လ္တူမၞိဟ်ညးတံရ။ တုဲပၠန် စပ်ကဵုကျဗြံကၠုၚ်ဂှ်တုဲ ပဒုဟ်ညးတေံ ပဒုဟ်ညးဏံတုဲ ဇကုသုၚ်စောဲဟွံဂွံဂှ် ဟွံညာတ်မွဲသာ် ဒှ်ကၠုၚ်ဒၟံၚ်ဗီုပြၚ် ဗက်ပဒုဟ်ဒၟံၚ်ညးတၞဟ်ရ” သာ်ဝွံ သ္ဂးရ။
အတိုၚ်တၚ်နၚ် ဂကောံသုတေသန ISP-Myanmar ဂှ်မ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဝွံ အပ္ဍဲပွိုၚ်ပန်သၞာံဏံ ကဆံၚ်ဌာနန္တရပ္ဍဲဒပ်ပၞာန် ဘုံလ္တူတံဂှ် ပြံၚ်လှာဲကၠုၚ်လဝ် ဟွံအောန်နူကဵု ၂၆ ဝါရ။
သ္ကိုပ်ဂကောံပရေၚ်ပြုပြေၚ်ပၞာန်တၟေၚ်ဂှ် ပြံၚ်လှာဲလဝ် ဟွံအောန်နူကဵု ၁၃ ဝါတုဲ ပ္ဍဲကဵုဏံ သ္ကိုပ်ဂကောံပြုပြေၚ်ပၞာန်တၟေၚ် မဒးကောပ်ကာဲ ရးပၞာန်နေဗျဳဒဝ် ကစထ−၆ ဂှ် လှာဲလဝ်မသုန်ဝါရ။
ဒၞါဲညးမဒးဒုၚ်ပ္တိတ်တံဂှ် ဥူကျဝ်သဵုဝေန်ဂှ် ခါန်ကၞက်ပ္တိုန်လဝ် နဒဒှ်ဝန်ဇၞော်ပရေၚ်အာကၠုၚ်တရဴ ကေုာံ ဟဝ်တေဝ်တုဲ ဥူချေတ်သိုဲဂှ် နဒဒှ်ဝန်ဇၞော်သၟာကမၠောန်၊ ဥူနေမျဵုလှာၚ်ဂှ် နဒဒှ်ဒုဝန်ဇၞော်ပရေၚ်ပညာ သာ်ဝွံ ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် ဂွံဆဵုကေတ်ရ။
သ္အာၚ်နူဂှ်ပၠန် ဝန်ဇၞော်ကေၚ်ကာကောန်ဍုၚ်အရၚ် Jeng Peng (နော်တောၚ်) ဂှ် ခါန်ကၞက်ပ္တိုန်လဝ် နဒဒှ်ဝန်ဇၞော်ကေၚ်ကာသၟတ် ကေုာံ ဝေၚ်ဒြဟတ်တုဲ ဒုဝန်ဇၞော် ဝန်ဇၞော်ကေၚ်ကာပယျဵု သ္ကိုပ်ဗိုလ်ဇၞော်ဃောန်တဇြေန်ထူဂှ်တှ်ေ ပြံၚ်လှာဲသ္ပလဝ် နဒဒှ်ဝန်ဇၞော်ကေၚ်ကာကောန်ဍုၚ်အရၚ်ရ။
အပ္ဍဲပွိုၚ်ပန်သၞာံဏံ နကဵုကံၚ်ဇြဳပၞာန် အခိၚ်ပပဵုပ္တိုန်အာယုက်တုဲမ္ဂး ကလေၚ်ဒက်ပ္တန် ကောန်ဂကောံကံၚ်ဇြဳပၞာန်တံဂှ်တုဲ ပွမပ္တိတ်ကၠေံနူဒၞါဲ ကေုာံ ပြံၚ်လှာဲခါန်ကၞက် ကုဝန်ဇၞော်ဂကောံအလဵုအသဳတံဂှ် ကၠောန်ကၠုၚ်လဝ်အဆက်က်ရ။
ပ္ဍဲကဵုဂကောံအလဵုအသဳ ကေုာံ ဂကောံကံၚ်ဇြဳပၞာန် မကလေၚ်ဒက်ပ္တန်လဝ်လၟုဟ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ကဵု ဒုသ္ကိုပ်ဗိုလ်ဇၞော် သဵုဝေန်တံဂှ်တှ်ေ အတိုၚ်ကဆံၚ်ဒၞါဲတြေံ မကေတ်လဝ်ကၠာတေံဂှ်ရ အပြံၚ်အလှာဲဟွံမွဲရ။
ပရိုၚ်−သြၚ်လောန်တိုၚ်(မ်)
ဗီု−SAC