သိမ်ဇရပ်၊ ဖေဖဝ်ဝါရဳ ၂
သၞေဟ်ကၚ်စၟဳတ် ဒပ်စဵုဒၞါညးဍုၚ်ကွာန် PDF ပ္ဍဲကဵုကွာန်တုၚ်ခွ ဍုၚ်(သိမ်ဇရပ်) တွဵုရးဍုၚ်မန်ဂှ် ဒးဒုၚ်ဗ္တိုက်ကဵုဒရုၚ်တုဲ ကောန်အရာပ်အာတရဴၜါတၠ မပါလုပ်ဂှ် မသုန်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ဂကောံဒပ်ပၠန်ဂတး ဖျေံသ္ဇိုၚ်ဒေသတံရ။
ပ္ဍဲဂိတုဖေဖဝ်ဝါရဳ ၁ အခိၚ်နူဂယး ၜိုတ် ၁၁ နာဍဳဂှ် တမ်ဒပ်ကံၚ်ဇြဳပၞာန် ခမရ စၟတ် ၂၀၇ ဖျေံသ္ဇိုၚ်(သိမ်ဇရပ်)ဂှ် ကၠုၚ်စိုပ်ထောံလဝ်မခတိုဟ် ဗ္တိုက်ဏာလဝ် သၞေဟ်ကၚ်စၟဳတ် PDF မၞုံပ္ဍဲကွာန်တုၚ်ခွဂှ် နကဵုဒရုၚ်ရ။
ဟိုတ်နူဒးဒုၚ်ထောံလဝ်မခတိုဟ် ကဵုဒရုၚ်ဂှ်တုဲ ညးအာတရဴၜါတၠ မပါဗက်ကၠုၚ်လ္တူကွဳစက်အာတရဴ မဒးဒုၚ်စၟဳတ်ဒၟံၚ် ပ္ဍဲသၞေဟ်ကၚ်စၟဳတ်ဂှ်ကဵု ကောန်သ္ဂံၚ် PDF ပိတၠ၊ အပံၚ်ဖအိုတ် မသုန်တၠ ဇီုကပိုက်ကလိဂွံလဝ်ဝပ်ရ။
ပရေၚ်ဗ္တိုက်ဏံဝွံ တုဲကၠုၚ်ပ္ဍဲဂိတုဂျာန္နဝါရဳ ၃၁ တေံ ဟိုတ်နူဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ်နကဵုလွဟ်ဇၞော်၊ သီုကဵုဒရုၚ် ကုတမ်ဒပ် ခမရ ၂၀၇ ဂှ်တုဲ ကလေၚ်ခၠေဝ်ပလန်ကၠုၚ် ဒှ်မာန်ဂှ် လျိုၚ်ဒပ်ပၠန်ဂတးမွဲတၠ ဟီုရ။
အတိုၚ်ဂလာန် ဂကောံဒပ်ပၠန်ဂတးတံဂှ်မ္ဂး ဒပ်ကံၚ်ဇြဳပၞာန်ဝွံ ကၠာဟွံဂွံဗ္တိုက်သၞေဟ်ကၚ်စၟဳတ် PDF ကွာန်တုၚ်ခွ နကဵုဒရုၚ်ဂှ် ပ္ဍဲကဵုကွာန်(စစ်ကွင်း၊ ခရွဲ၊ သုံးခွ) တံဂှ် ဗလးလဝ်ဒရုၚ် ပဝ်ဒၟံၚ် ကၠိုဟ်ဂယးရောၚ် သ္ဂးရ။
တုဲကၠုၚ် ပ္ဍဲဂိတုဂျာန္နဝါရဳ ၂၃ ဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ဗ္တိုက်လဝ် သၞေဟ်ကၚ်စၟဳတ် PDF ကွာန်တုၚ်ခွ နကဵုဒရုၚ်ဂှ်တုဲ ဂိုဝ်ဒံၚ်ကွဳစက်မွဲမကဵု ဇြပ်မွဲမ ဗ္ဒါဲသၞေဟ်ကၚ်စၟဳတ်ဂှ် လီုလာ်အာလဝ်ရ။
ပ္ဍဲတွဵုရးဍုၚ်မန်ဂှ်တှ်ေ စနူသၞာံဏံမံက်တုဲ ဒပ်ကံၚ်ဇြဳပၞာန် ဒဒှ်မဗ္တိုက်ကၠုၚ် ကုဗ္ဒိုပ်သၞေဟ်ကၚ် ဒပ်ပၠန်ဂတးတံကဵု ကောန်အရာပ်တံ နကဵုဒရုၚ်ဂှ် အသိၚ်သၠုၚ်တိုန်ကၠုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media