နေဗျဳဒဝ်၊ ဖေဖဝ်ဝါရဳ ၂
ဂကောံရပ်လွဟ်ကောန်ဍုၚ်အရၚ်တံ ပံၚ်တောဲကဵု ဒပ်စဵုဒၞါညးဍုၚ်ကွာန် PDF တံတုဲ ဗ္တိုက်ဒၟံၚ် ပ္ဍဲကဵုရးဒေသဇၞော် ကေုာံ တွဵုရး ၇ တံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုပ္တိတ်ကၠုၚ်ရ။
ပ္ဍဲကဵုကောံဓရီု ကံၚ်ဇြဳစဵုဒၞါဂီုကၠီု မကော်ကေတ်လဝ် ပ္ဍဲဂိတုဂျာန္နဝါရဳ ၃၁ ဂှ် က္ဍိုပ်သ္ကိုပ်ပၞာန် ပ္တိုန်ထ္ၜးလဝ် အကာဲအရာမက္တဵုဒှ်ဒၟံၚ်လၟုဟ် သ္ဂောံထပ်ပပဵုပ္တိုန် အာယုက်ကာလကာတၟေၚ် ၆ ဂိတုဂှ်ရ။
ဒပ်ပၞာန်ဗၠးၜးကချေၚ် KIA ဂှ် ပ္ဍဲတွဵုရးကချေၚ်ဂှ် ပံၚ်တောဲကဵု PDF တံတုဲ မ္ၚးနူကဵုပယျဵုကြုက်−ဗၟာ၊ ဗာန်မဝ်ဂှ် ပ္ဍဲကဵုရးသက်ကိုၚ်သ္ကုတ်လ္တူ ပ္ဍဲဒေသအေန်ဒဝ်ဂှ် ပံၚ်တောဲကဵု PDF တုဲ ဗ္တိုက်ဒၟံၚ်ကံၚ်ဇြဳပၞာန်ရောၚ် ဟီုရ။
လအာတုပ်သာ်ဂှ်ကီု ဗော်သွးကောန်ဂကူကရေၚ် KNU ဂှ် ပ္ဍဲတွဵုရးကရေၚ် ဒေသကတိုၚ်တိ၊ မေဝ်ပလဳ၊ အနာန်ကွေန်၊ ကအ်ကြိက်တံဂှ်ကီု၊ ဒပ်ပၠတရဴကောန်ဂကူချေၚ် CNF ဂှ်လေဝ် ပ္ဍဲတွဵုရးချေၚ် ဍုၚ်မေန်တိတ်၊ ကာန်ပက်လက် ကေုာံ ဍုၚ်ဖလာန်တံဂှ် ပံၚ်တောဲကဵု PDF တုဲ ဗ္တိုက်ဒၟံၚ်ရောၚ် ဟီုရ။
ဒပ်ပၞာန်ရခေၚ် AA ဂှ်တှ်ေ ပံၚ်တောဲကဵု PDF တုဲ ပ္ဍဲတွဵုရးရခေၚ်၊ ပ္ဍဲပယျဵု မဂွဵု−ရခေၚ်၊ ပယျဵုဗဂေါ−ရခေၚ် ကေုာံ ပ္ဍဲဒေသဨရာဝတဳ−ရခေၚ်တံဂှ် ကၠောန်သ္ပဒၟံၚ် ပရေၚ်ဗ္တိုက်တံရောၚ် က္ဍိုပ်သ္ကိုပ်ပၞာန် ဒုၚ်ဏာလဝ်ဝန် ပ္ဍဲကောံဓရီုရ။
အပ္ဍဲပွိုၚ်တြဴဂိတုတုဲကၠုၚ်တေံဂှ် ဟိုတ်နူပရေၚ်ဗ္တိုက်နာနာတုဲ သ္ဇိုၚ်ဝန်ကၟိန်ဍုၚ် ၃၈၃ တၠ ဒးချိုတ်အာလဝ်တုဲ ပရေၚ်ပညာ၊ ပရေၚ်ထတ်ယုက် ကေုာံ စမြိုၚ်မၞိဟ်ဒၟံၚ်တံ မပါလုပ် စမြိုၚ်ပရေၚ်ဖောအ်ဗြေဝ်ကၟိန်ဍုၚ် ၅၁၆ မ ဒးဒုၚ်ပလီုလဝ်ရောၚ် သ္ဂးရ။
ဆ္ဂး ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်၊ ထောံမခတိုဟ်နကဵုပၞာန်ကျာတံဂှ်တုဲ ညးဍုၚ်ကွာန်ကောန်အရာပ် မဒးပြဟ်လလုဲအာလဝ် ကဵုဂအုံဗွဝ်တံ၊ ဒးဒုၚ်ရပ်ပြိုက်ဂစိုတ်တံဂှ် က္ဍိုပ်သ္ကိုပ်ပၞာန် မံၚ်ကၠုၚ်လဝ်သ္ၚိတ်တ်ရ။
အတိုၚ်စရၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲပၞာန်သီအဝဵု ပွိုၚ်ပန်သၞာံပြၚ်ဏံ ဟိုတ်နူဂကောံပၞာန်ကဵု ကောန်ရဲတဝ်ခွါဂမၠိုၚ်တုဲ ညးဍုၚ်ကွာန် ၆၂၀၀ ပြၚ် ဒးချိုတ်အာလဝ်တုဲ ၂၁၇၀၀ ပြၚ်ဝွံ ဒးဒုၚ်ရပ်ချုက်လဝ်ဖိုဟ်ရ။
နကဵုကံၚ်ဇြဳပၞာန် အပ္ဍဲပရေၚ်သီအဝဵုပွိုၚ်ပန်သၞာံပြၚ်ဏံ ပ္ဍဲကဵုရးသေံသၟဝ်ကျာ ကေုာံ ပ္ဍဲရခေၚ်တံဂှ် ဌာန်ဂအုပ်ပၞာန်ရး ၂ မပါလုပ်၊ ဗ္ဒိုပ်ဖျေံသ္ဇိုၚ် နွံအလုံဍုၚ်မွဲဂှ် ဒးဗလးလဝ်တဲ ဟွံအောန်နူကဵု ၁၇၄ ဗ္ဒိုပ်ဂှ် တၚ်နၚ် ISP-Myanmar ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/AA