ၜဳကလေၚ်၊ ဖေဖဝ်ဝါရဳ ၄
ဒပ်ကံၚ်ဇြဳပၞာန် ဟိုတ်နူပန်စုတ်လွဟ်ဇၞော် ပ္ဍဲကွာန်(ဒညင်းကုန်း) ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ ညးဍုၚ်ကွာန်ကောန်အရာပ်မွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ခရိုၚ်သဓီု ဗော်သွးကောန်ဂကူကရေၚ် KNU ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁ အခိၚ်နူဂယး ၜိုတ် ၁၀ နာဍဳဂှ် နူတမ်ဒပ်ကံၚ်ဇြဳပၞာန် ခမရ စၟတ် ၃ ဂှ် ပေါဲဗ္တိုက်ဟွံမွဲမွဲသာ် ပန်ပှော်ကၠုၚ်လွဟ်ဇၞော် ဟွံအောန်နူကဵု ၂၀ မ လ္ပာ်ဗ္ဒါဲကွာန်(ဒညင်းကုန်း)ဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ဒဝ်တာန်နု အာယုက် ၆၂ သၞာံ ဒၟံၚ်ကွာန်(ဒညင်းကုန်း)ဂှ်ဝွံ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ ညးဒေသၜါတၠပၠန် ထပ်ဇီုကပိုက်ကလိဂွံလဝ်ဝပ်ရ။
ဟိုတ်နူလွဟ်ဇၞော် ဒပ်ကံၚ်ဇြဳပၞာန်တုဲ သ္ၚိဒၟံၚ် ဟွံအောန်နူကဵုပိမ ဇီုကပိုက်လီုအာလဝ်တုဲ ဂၠဴၜါကဵု ကၠိက်မသုန် ချိုတ်အာလဝ်ရ။
ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ဂှ်တုဲ ညးဍုၚ်ကွာန်ဒေသလ္ၚဵု ဒးပါဲဒလေတ်လဝ်ယာယဳကီုလေဝ် အခိၚ်လၟုဟ် ကလေၚ်စဴမံၚ်ဒၟံၚ် ပ္ဍဲကွာန်တံအိုတ်ယျဂှ် ဂွံတီကေတ်ရ။
လအာတုပ်သာ်ဂှ်ကီု ပ္ဍဲဂိတုဖေဖဝ်ဝါရဳ ၁ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုဒရုၚ် ကေုာံ လွဟ်ဇၞော် ပ္ဍဲကဵုကွာန်တုၚ်ခွ ပွိုၚ်ဍုၚ်ကျာ်ထဝ်ဂှ်တုဲ ညးဍုၚ်ကွာန်ဒေသ ထပှ်တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ