မတ်မလီု၊ ဖေဖဝ်ဝါရဳ ၄
သၞာံဏံ အပ္ဍဲဂိတုဖေဖဝ်ဝါရဳဏံ သ္ကိုပ်ဗိုလ်ကံၚ်ဇြဳပၞာန်မွဲတၠ မပါလုပ် ကောန်ဒပ် ကေုာံ ဗၠာဲသၟိၚ် ၁၃၆ တၠ ပါလုပ်ကၠုၚ် ပ္ဍဲချဳဒရာၚ်ဒစဵုဒစးအဝဵု ဟွံပကီုပရာပ် CDM တံဂှ်တုဲ လုပ်စိုပ်ကၠုၚ် လ္ပာ်ညးဍုၚ်ကွာန်တံရောၚ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ ၂ တေံရ။
အပ္ဍဲဂိတုဂျာန္နဝါရဳတေံဂှ် ကေတ်အဆက် ဇရေၚ်တမ်ဒပ် PDF ၊ ပကဖ နွံသၟဝ်ကောပ်ကာဲ ဌာနဝန်ဇၞော်ကာစဵုဒၞါ ကေုာံ ကမ္မတဳထ္မံက်ရုပ်ရဴပျဳတုယေန်ခွေန်− ဗဟဵု အလဵုအသဳညဳသၟဟ်ဂကူ NUG ဂှ်တုဲ လုပ်စိုပ်ဖျေံကၠုၚ်လဝ်လွဟ်ရ။
ပ္ဍဲကဵုညးလုပ်စိုပ်ဖျေံကၠုၚ်လဝ်လွဟ်ဂမၠိုၚ် သ္ကိုပ်ဗိုလ်ကံၚ်ဇြဳပၞာန် မၞုံကဵုကဆံၚ်သၞာဲဒဴမွဲတၠ မပါလုပ်ဂှ် ကောန်ဒပ် ကေုာံ ဗၠာဲသၟိၚ် ၁၃၆ တၠ နွံတုဲ ပ္ဍဲကဵုဏံ ညးလုပ်စိုပ်ကၠုၚ် သီုလွဟ်လက်နက်တံဂှ် ၈၃ တၠ နွံရောၚ် သ္ဂးရ။
ကောန်ဒပ်ကံၚ်ဇြဳပၞာန်ကဵု ဗၠာဲသၟိၚ် လုပ်စိုပ်ကၠုၚ်သီုလွဟ်လက်နက်တံဂှ် ဌာနဝန်ဇၞော်ကာစဵုဒၞါ NUG ကဵုလဝ်လာပ်သြန်ပ္တိုန်စရာဲ အတိုၚ်ၚုဟ်မးလွဟ် မခုတ်လဝ်ဂှ်ရောၚ် ထ္မံက်ထ္ၜးလဝ်ရ။
အပ္ဍဲဂိတုဂျာန္နဝါရဳဂှ် ကလိဂွံလဝ် လွဟ်လက်နက်နာနာ ၈၃ ဇကိုအ်၊ သီုကဵုမကမ် ညးမလုပ်စိုပ်ကၠုၚ်လ္ပာ်ညးဍုၚ်ကွာန်တံ ကေတ်နၚ်တံဂှ်ရောၚ် သ္ဂးရ။
ဟိုတ်နူကံၚ်ဇြဳပၞာန်သီအဝဵု လလောၚ်တြးကၠုၚ် အမိၚ်လုပ်ယိုက်လျိုၚ်ပၞာန်ဂှ်တုဲ ညးမဒးဒုၚ်ပကောံလဝ်မၞိဟ်တၟိ ဗွဲအဓမ္မတံကီု၊ ကောန်ဒပ် ကေုာံ ဗၠာဲသၟိၚ် မိက်ဂွံဒတူလိုၚ်လ္ပာ်ညးဍုၚ်ကွာန်တံဂှ် လုပ်စိုပ်စ္ၜုဲစ္ၜော်ကၠုၚ် ပ္ဍဲဂကောံပၠန်ဂတးကောန်ဍုၚ်အရၚ်တံကဵု ဂကောံဒပ် တမ်ဒပ် မကြပ်တံဂှ် ဖ္တိုက်ဖ္အောဝ်လဝ်ရ။
သၞာံတုဲကၠုၚ် ပ္ဍဲဂိတုသေပ်တေမ်ဗာကဵု ဂိတုနဝ်ဝေမ်ဗာဂှ်လေဝ် ဗိုလ်ဇၞော်ကံၚ်ဇြဳပၞာန်ပန်တၠ မပါလုပ် ဂအုပ်ဗၠာဲသၟိၚ်ၜါတၠကဵု ကောန်ဒပ် ကေုာံ ဗၠာဲသၟိၚ် ၄၆ တၠဝွံ လုပ်စိုပ်ဖျေံကၠုၚ်လွဟ် ဇရေၚ်ဂကောံဒပ် တမ်ဒပ် နွံသၟဝ်တဲဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူတံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−NUG