မတ်မလီု၊ ဖေဖဝ်ဝါရဳ ၄
နဲသၞောဝ်ဥပဒေ ကံၚ်ဇြဳပၞာန် မစၞောန်ပျးလဝ်ဂှ်ဝွံ ရပ်စပ်ဒၟံၚ်တမ်ရိုဟ်မၞိဟ် ဟွံဒးကဵုဒၞါဲဏောၚ်တုဲ သွက်ဂွံကလေၚ်ဒက်ပ္တန်ကၟိန်ဍုၚ်ဂှ် ဒးဂဗကဵု တၚ်ကော်ဆဴဇၞော်ဇၞော်ဂမၠိုၚ်မာန်ရောၚ် ညးခါတ်အကာဲဂမၠိုၚ် ပါ်ပါဲလဝ်ရ။
ဟိုတ်နူပေါဲပၞာန်ပၠန်ဂတး အလုံဍုၚ်မွဲတုဲ ကံၚ်ဇြဳပၞာန် မ္ဒးဆေၚ်ဒၟံၚ်မုက်ကဵု ဇြဟတ်ဒပ်လေၚ်ဒိုက်တံဂှ်ဝွံ ပ္ဍဲဂိတုဂျာန္နဝါရဳတေံ စၞောန်ပျးကၠုၚ်လဝ် နဲသၞောဝ်ဥပဒေသ္ဂောံလုပ်ပၞာန် မကၟာတ်လဒဵုအာသၟတ်အာယုက်ပေၚ်တုဲတံ နူကဵုအခေါၚ်တိတ်ဍုၚ်မ္ၚးတုဲ မတံၚ်ပၠောပ်ဏာညးတံ ပ္ဍဲပၞာန်တံဂှ်ရ။
ကြဴနူစၞောန်ပျး နဲသၞောဝ်ဥပဒေဏံတုဲဂှ် ကၟာတ်လဒဵုလဝ် မၞိဟ်တြုံအကြာအာယုက် ၁၈ စဵုစိုပ် ၃၅ တံ နူကဵုအခေါၚ်တိတ်ဍုၚ်မ္ၚးဂှ်တုဲ ပ္ဍဲဒေသလ္ၚဵုတံဂှ်တှ်ေ ကံက်ဒၟံၚ်သီုကဵုစရၚ် ညးဗြဴ အာယုက်မပါလုပ် သွက်ဂွံယိုက်လျိုၚ်ပၞာန်တံဂှ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ရပ်ဒက်သၟတ်အလုံဍုၚ်မွဲတံ ဗွဲအဓမ္မတုဲ ပကောံဒၟံၚ်ကောန်ပၞာန်ကီု၊ ပလံၚ်ဗစိုပ်ဒၟံၚ် လိက်ကော်ဘိက်တံကီု၊ ကုညးတိတ်အာဍုၚ်သ္အာၚ်တံဂှ် ဂ္စါန်ကၠုၚ်ညံၚ်ဂြောဝ်ဂတာဂမၠိုၚ် ဂွံကော်ဖျဴ ဗွဲအဓမ္မတံဂှ်ရ။
ဒံက်တာ သာၚ်ကျဳဇြေန်သဵု ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ်တှ်ေ သွက်ဂွံစဵုဒၞါဒတုဲမြမောဝ်ကံၚ်ဇြဳပၞာန်တုဲ ကဵုသၟတ်အာယုက်စိုပ်တုဲတံ လုပ်ယိုက်လျိုၚ်ပၞာန်ဂှ်ဝွံ ကၠောန်သ္ပဒၟံၚ် တမ်ရိုဟ်မၞိဟ်တံ ဆဆဵုဏောၚ်ဂှ် ဟီုရ။
“ပိုယ်ချပ်ရံၚ်တှ်ေ ညအ်ဂှ် သွက်ဂွံဒက်ပ္တန်ကၟိန်ဍုၚ်ကီု သွက်ပရေၚ်ဍုၚ်ကွာန် ဂွံတောတက်ကၠုၚ်ကီုဂှ် ဒှ်အယုက်အပိုၚ်အခြာ ပၟိက်ဇၞော်မွဲဂှ် ဍုၚ်သ္အာၚ်တံလေဝ် သ္ပလဝ်စၟတ်သမ္တီ။ အလုံဂၠးမွဲလေဝ် အဝဲတံဏံ ဒဒှ်ရၚုဟ်မးမၞုံဟီုဂှ် သ္ပလဝ်စၟတ်သမ္တီရ။ ဟိုတ်နူမိက်ဂွံဂွံဇၞး ပ္ဍဲပရေၚ်ဍုၚ်ကွာန်တုဲ ရပ်စပ်ဒၟံၚ်အဝဲတံဏံဂှ်ကီု တုဲတှ်ေ ဒုၚ်သ္ဇိုၚ်ကဵုဒတုဲမြမောဝ်ပူဂဵုတုဲ ရပ်စပ်ဒၟံၚ်ဟီုဂှ် ညအ်ဂှ် ကၠောန်ဒၟံၚ်တမ်ရိုဟ်မၞိဟ်တံ ဆဆဵုဏောၚ်” သာ်ဝွံ သ္ဂးရ။
သၞောဝ်ယိုက်လျိုၚ်ပၞာန် မချူခၞံလဝ် ပ္ဍဲလက်ထက်ဥူတာန်ယှိုဲ တၠအဝဵုပၞာန်တြေံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဂယိုၚ်ပ္တိုန်လဝ်တုဲ ဂွံမွဲသၞာံတုဲဂှ် သ္ပဒတန်ကၠုၚ်လဝ် နဲသၞောဝ်ဥပဒေရ။
မၞိဟ်အဝဲစိုပ် သ္ဂောံလုပ်ပၞာန် ဇၟာပ်ပ်မၞိဟ် အခိၚ်ကော်ဘိက်သ္ဂောံစုတ်စရၚ်ဂှ် ယဝ်ကၠုၚ်ဟွံစိုပ်မ္ဂး ဂၠိုက်ဂၠါဲစၟဳတ်အာ ဇရေၚ်ဂြောဝ်ဂတာဏောၚ်တုဲ ညးကၠုၚ်ဟွံစိုပ်ဂှ်ဝွံ ဒးဒုၚ်ဖျေံစၟတ် စဵုကဵုဒဏ်ထံၚ်ပိသၞာံမာန်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဝှ်ကြံၚ်ဂှ်တှ်ေ စၞောန်ပျးထောံ နဲသၞောဝ်ဥပဒေယိုက်လျိုၚ်ပၞာန်ဂှ်ဝွံ တုပ်တဴညံၚ်ရဴစုတ်ထောံထံၚ်ပၞာန် အလုံဍုၚ်မွဲဂှ်တုဲ ဇၟာပ်မၞိဟ်အဝဲစိုပ်တုဲတံ ဒးချိုတ်အပ္ဍဲပေါဲပၞာန် အကာဲအရာဏံ စိုပ်ကၠုၚ်မာန်ဂှ် ဟီုရ။
“စုတ်ထောံထံၚ်ပၞာန် သီုအလုံဍုၚ်မွဲရ။ ဇၟာပ်ညးအဝဲစိုပ်တုဲ နွံပ္ဍဲဍုၚ်တံဂှ် ဒးချိုတ်အာ အပ္ဍဲပေါဲပၞာန် ဒှ်မာန်ဏောၚ်။ ဟီုဗွဲယျေဘုယျမ္ဂး ပ္ဍဲကဵုလၟိဟ်မၞိဟ် နွံ ၅၀ ပြကောဋိကိုဋ်ဂှ် လၟုဟ် ၜိုတ် ၄၀ ပြကောဋိကိုဋ်ဂှ်တှ်ေ ဟိုတ်နူတံၚ်ဂြဲပၠောပ် ပ္ဍဲပေါဲပၞာန်တုဲ ဒးဒှ်အာဒဒိုက်နာနာမာန်ဏောၚ်“ သာ်ဝွံ သ္ဂးရ။
အတိုၚ်သၞောဝ်ယိုက်လျိုၚ်ပၞာန် မစၞောန်ပျးလဝ် ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ ဂှ်မ္ဂး ဇၟာပ်ကောန်ဍုၚ် အကြာအာယုက် ၁၈ စဵုစိုပ် ၃၅ ဂှ် ဒးယိုက်အာလျိုၚ်ပၞာန် နူၜါသၞာံ စဵုကဵု ၅ သၞာံ မဒှ်ရ။
သၞောဝ်ဏံဝွံ ကၠာဟွံဂွံစၞောန်ပျး နဲသၞောဝ်ဥပဒေဏီဂှ်ရ ကောန်ဂကောံကော်ဘိက်သ္ဂောံလုပ်ပၞာန်တံဝွံ ရပ်စပ်နဲကဲနာနာတုဲ ပကောံဒၟံၚ်ကောန်ဒပ် ပံက်ကၠုၚ်ဒၟံၚ် တန်ဗ္တောန်ကွတ်ပၞာန် စဵုကဵု လၟေၚ် ၉ ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး ဟိုတ်နူသၞောဝ်ယိုက်လျိုၚ်ပၞာန်တုဲ ညးဒးဒုၚ်ရပ် ဗ္ဒါဲ ၂၃၀၀၀ နွံဂှ် လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၁ တေံရ။
ပရိုၚ်−သြၚ်လောန်တိုၚ်(မ်)
ဗီု−MOI