ရေဝ်၊ ဖေဖဝ်ဝါရဳ ၆
အပ္ဍဲပရေၚ်ပန်ပှော် ဗ္ဒိုပ်ဗၠာဲသၟိၚ်ၝောံဍုၚ်ရေဝ် လ္တူဍုၚ်ရေဝ် တွဵုရးဍုၚ်မန်ဂှ် ကောန်ဒုဟ်ကလေၚ်ရပ်ဂွံ ထပှ်တၠ ဒးဒုၚ်ပန်ဂစိုတ်လဝ်ရောၚ် ညးမစုက်လုက်ကဵုဗ္ဒိုပ်ဗၠာဲသၟိၚ်ဂမၠိုၚ် ပါလုပ်သီုကဵုဂြောဝ်ဂတာညးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဖေဖဝ်ဝါရဳ ၁ တေံ ဂကောံဒုဂအုပ်ဗၠာဲသၟိၚ် ဗ္ဒိုပ်ဗၠာဲသၟိၚ်ၝောံဍုၚ်ရေဝ် နာၚ်လွေန်ဥူ က္ဍိုက်ပ်တုဲ အခိၚ်ကၠုၚ်ပလံၚ်ပုၚ် ပ္ဍဲဗ္ဒမ်အချုက်ဂှ် ကောန်ဒုဟ်ဂမၠိုၚ် ပၠံၚ်လွဟ်တုဲ ပန်ပှော်ဂြိပ်တိတ်အာလဝ်တံ က္တဵုဒှ်လဝ်ရ။
အပ္ဍဲပရေၚ်ပန်ပှော်ဏံဂှ် ဒုဂအုပ်ဗၠာဲသၟိၚ် နာၚ်လွေန်ဥူ၊ အကြာပ်ဒပ်ဗၠာဲသၟိၚ် မျေတ်ထောန်၊ ကောန်ဒပ်ဗၠာဲသၟိၚ် ကျဝ်ဇြဲထက် ကေုာံ ကောန်ဒုဟ်မွဲတၠတံဝွံ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ပ္ဍဲပရေၚ်ပန်ပှော်ဏံဂှ် ညးဂြိပ်ဗၠးအာလ္ၚဵုတံကဵု ညးမပါလုပ် ပ္ဍဲပရေၚ်ပန်ပှော် ထပှ်တၠ ကလေင်ရပ်ဂွံလဝ်တုဲ လ္ပာ်ကံၚ်ဇြဳပၞာန် ပန်ဂစိုတ်လဝ် နကဵုသေနာတ်ရောၚ် ညးမစုက်လုက်ကဵုဗ္ဒိုပ်ဗၠာဲသၟိၚ်မွဲတၠ ဟီုရ။
ပ္ဍဲကဵုညးဒးဒုၚ်ပန်ဂစိုတ်ထပှ်တၠဂှ် ညးသၟတ်ဒးဒုၚ်ရပ်လဝ် နကဵုဂဗုတ်ဂဥုဲၜူမာဲ ဒၟံၚ်အရာပ်အဏ္ဏဝါ ဍုၚ်ရေဝ် မဂြိပ်ဗၠးကၠုၚ် ပ္ဍဲကဵုတ္ၚဲဒှ်ပန်ပှော်ဂှ် သ္ကိုပ်အုပ်ဓုပ်ကဵု မိမညးတေံ ကလေၚ်ပအပ် ဇရေၚ်ဗ္ဒိုပ်ဗၠာဲသၟိၚ်တုဲဂှ် ဒးဒုၚ်ဂစိုတ်လဝ်ရ။
အတိုၚ်ဂလာန် ညးမစုက်လုက်ကဵု ဗၠာဲသၟိၚ်တံဂှ်မ္ဂး ကောန်ဒုဟ်ဂမၠိုၚ်ဝွံ ဒှ်ညးဒးဒုၚ်ရပ်လဝ် နကဵုၝောံပိုဒ်ပရေၚ်ဍုၚ်ကွာန်၊ သီုနကဵုဂဗုတ်ဂဥုဲၜူမာဲတုဲ ဒှ်နူကဵုရေဝ်၊ လၟိုၚ် ကေုာံ ဍုၚ်လ္ဂုၚ်တံဂှ် ဂွံတီကေတ်ရ။
ပ္ဍဲကဵုပရေၚ်ပန်ပှော် ဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ်တှ်ေ ကောန်ထံၚ်ပရေၚ်ဍုၚ်ကွာန် ဂြိပ်ဗၠးတိတ်ကၠုၚ်ပိတၠဂှ် ဂကောံပၠန်ဂတးဖျေံသ္ဇိုၚ်ဒေသ ဂကောံလကိုဟ်ဍုၚ်ရေဝ် ဟံၚ်ပြာ်ကဵုလဝ်ရ။
ဒုသ္ကိုပ်ဗၠာဲသၟိၚ် မျေတ်ဥူ သ္ကိုပ်ဗၠာဲသၟိၚ်ၝောံဍုၚ်ရေဝ် မကလိဂွံလဝ်ဝပ်သ္ကာတ်မြဟ် အပ္ဍဲပရေၚ်ပန်ပှော်ဂှ်တှ်ေ နကဵုဝပ်ဒးအာ ပ္ဍဲကဵုသြိုဟ်လ္ပာ်ပုၚ်ဂှ် ဒးတိုန်စိုပ်လွဳဒၟံၚ် ရုၚ်ဂဥုဲညးဍုၚ်ကွာန်မတ်မလီု ပ္ဍဲကဵုဒၞါဲဗ္ဒမ်ကာတၟေၚ်ရ။
အပ္ဍဲအချုက်ဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ် ကောန်ဒုဟ်ဗ္ဒါဲ ၁၀၀ ဒးဒုၚ်ရပ်လဝ် နကဵုၝောံပိုဒ်ပရေၚ်ဍုၚ်ကွာန်၊ ၝောံပိုဒ်ပကီုပရာပ်တံ သီုကဵုဂဗုတ်တၞဟ်ဟ်တံ နွံဂှ် ဂွံတီကေတ် ဇရေၚ်ညးမစုက်လုက်ကဵု ဗ္ဒိုပ်ဗၠာဲသၟိၚ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ