မတ်မလီု၊ ဖေဖဝ်ဝါရဳ ၆
ပ္ဍဲဍုၚ်ဗၟာ အပ္ဍဲကာလသီအဝဵု ပွိုၚ်ပန်သၞာံဏံ ဟိုတ်နူဗ္တိုက်စွံကၠုၚ်ပွန် ကုညးဍုၚ်ကွာန်ကောန်အရာပ်တံတုဲ နူကဵုသွာၚ်ပရေၚ်ထတ်ယုက် ကေုာံ ပရေၚ်ပညာတံဂှ် မၞိဟ်ဗ္ဒါဲ ၄၀၀ ချိုတ်အာလဝ်ရောၚ် ဥူကျဝ်ဇြဝ် ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ ဟီုရ။
အပ္ဍဲကာလသီအဝဵု ပွိုၚ်ပန်သၞာံဏံ နူကဵုဒပ်ကံၚ်ဇြဳပၞာန် စွံပွန်ဗ္တိုက်ကၠုၚ် နကဵုတၚ်ရန်တၟံနွံနွံဂှ်တုဲ ဘာဗ္တောန်လိက် ၂၄၅ မ၊ ရုၚ်ဂဥုဲ ၃၄၀ မပြၚ် ဇီုကပိုက်လီုလာ်အာလဝ်ရောၚ် ဟီုစုတ်ဏာလဝ် ပ္ဍဲကဵုအစဳဇန် ဟီုဗ္ကန်ကုညးဍုၚ်ကွာန် ကေုာံ ဍုၚ်သ္အာၚ်ရ။
ဒၞါဲမဆက်စပ်ကဵုပရေၚ်ပညာတံဂှ် နူကဵုဒပ်ပၞာန် ဗ္တိုက်ကၠုၚ်ဒၟံၚ် နကဵုတၚ်ရန်တၟံနွံနွံဂှ်တုဲ အ္စာ၊ အ္စာၝောံ ကေုာံ ကွးဘာဂမၠိုၚ် အပံၚ်ဖအိုတ် ၂၅၀ တၠပြၚ် ဒးချိုတ်အာလဝ်တုဲ ပ္ဍဲကဵုဏံ ကောန်ၚာ်သၟတ် သၟဝ်အာယုက် ၁၈ တၠဂှ် ၈၈ တၠ ပါလုပ်ရောၚ် သ္ဂးရ။
သ္အာၚ်နူဂှ်ပၠန် ဒၟါနူကံၚ်ဇြဳပၞာန်တုဲ နူကဵုကဏ္ဍပရေၚ်ထတ်ယုက်ဂှ် သ္ဇိုၚ်ဝန်ပရေၚ်ထတ်ယုက် CDM ၁၃၃ တၠ ဒးချိုတ်အာလဝ်တုဲ သ္ဇိုၚ်ဝန်ပရေၚ်ထတ်ယုက် ဇီုကပိုက်ကလိဂွံဝပ်ဂှ် ၁၃၅ တၠ နွံလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၅ တေံ ပေါဲဗ္တိုက်က္တဵုဒှ်ဟွံမွဲမွဲသာ် ဒပ်ကံၚ်ဇြဳပၞာန် ထောံလဝ်မခတိုဟ်နကဵုက္ၜၚ်ကျာ ကုရုၚ်ဂဥုဲညးဍုၚ်ကွာန်(ကျောက်မဲ) နူရးသေံသ္ကုတ်သၟဝ်ကျာဂှ်တုဲ အ္စာၝောံလွဳဝတ်မၞိဟ်ယဲမွဲတၠ မသ္ပလဝ်ဇြဳဒဳအာမ်ဂှ်ကီု၊ သ္ဇိုၚ်ဝန်ပရေၚ်ထတ်ယုက်မွဲတၠ ကဵု ကောန်အရာပ်ညးဍုၚ်ကွာန်မွဲတၠ ချိုတ်အာလဝ်ရ။
နကဵုဌာနဝန်ဇၞော်ပရေၚ်ထတ်ယုက် NUG ဂှ် ပ္ဍဲအရာရေၚ်တၠုၚ် ကမၠောန်ဒုၚ်ကာပရေၚ်ထတ်ယုက်ညးဍုၚ်ကွာန်တံဂှ် ရုၚ်ဂဥုဲ ၁၀၆ ၊ ဗ္ဒမ်ဂဥုဲ ၈၀၈၊ ဗ္ဒမ်ဂဥုဲဆုဲပြံၚ် ဗၞတ် ၂၀၀ ပ္ဍဲကဵုပွိုၚ်ဍုၚ် ၁၉၀ ပြၚ်တံဂှ် ရေၚ်တၠုၚ်ကဵုဒၟံၚ် ကမၠောန်မၚ်မွဲပရေၚ်ထတ်ယုက်ဗလးတိတံရောၚ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ