ပရေၚ်ပြုပြေၚ်ပၞာန် ကရောၚ်ပၞာန်ရာမည ဒဵုဗၞတ်ၜိုတ်လဵု စိုပ်တရဴမာန်ရော

မတ်မလီု၊ ဖေဖဝ်ဝါရဳ ၆

ကရောၚ်ပၞာန်ရာမည မပံၚ်ကောံဒက်ပ္တန်လဝ် နူဒပ်မန်ပန်ဂှ်ဝွံ သၞာံဏံ အပ္ဍဲပွိုၚ်ပန်ဂိတုကိုပ်ကၠာဏံဂှ် ဂွံကၠောန်ပြုပြေၚ်ပၞာန် ဗီုပြၚ်ပၞာန်ထ္ပက်တံဂှ် ဟွံဒှ်ဒတုဲဏီပုဟ်ဂှ် ထ္မံက်ထ္ၜးလဝ် ပ္ဍဲလိက်စံၚ် ဇြဟတ်ရာမညဖေဝ်ဒရာခေတ်တၟိ NRFF မလလောၚ်ပ္တိတ်လဝ်ဂှ်ရ။

ပ္ဍဲဂိတုဖေဖဝ်ဝါရဳ ၄ တေံ NRFF ဆက်မိတ်ကၠုၚ်လိက်စံၚ်မွဲ ပရူဒပ်ပံၚ်ကောံမန် မဂ္စါန်ဒၟံၚ်သွက်အခေါန်စၞောန်ပျးအပိုၚ် ပ္ဍဲလိက်စံၚ်ဏံ လၟေၚ်ဒဒှ်တၟေၚ်တၟဟ် စပ်ကဵုပရေၚ်ပံၚ်တောဲ၊ တၚ်သ္ၚဳဂၠိပ်ပါ်ပါဲ ကေုာံ တၚ်ကဵုကသပ်တံ မပါလုပ်ဂှ် ကေတ်နၚ် ဇရေၚ်ညးဍုၚ်ကွာန်တံရ။

နကဵုကရောၚ်ပၞာန်ရာမည သၞာံဏံ အပ္ဍဲပွိုၚ်ပန်ဂိတုကိုပ်ကၠာဏံဂှ် ပရေၚ်ပ္ကတ်ပ္ကေၚ်ပရေၚ်ပၞာန်ပံၚ်တောဲတံ နွံမာန်ကီုလေဝ် နကရောၚ်ပၞာန်ပံၚ်တောဲကဵုဒှ် နကဵုမွဲမွဲဒပ်ကဵုဒှ် ဂွံဝေၚ်ကၠုၚ်ပၞာန်ထ္ပက်ဂှ် ဟွံဒှ်ဒတုဲဏီပုဟ်ဂှ် လိက်စံၚ်ဝွံ သ္ဂးရ။

ဆ္ဂး အပ္ဍဲအခိၚ်အပိုၚ်အခြာဏံ ပရေၚ်ပၞာန်ဒမၠုက်ကဵု ပရေၚ်ပြုပြေၚ်ပၞာန်ဒရုၚ်တံ လှဲတြးကၠုၚ် အလုံတွဵုရးဍုၚ်မန်မာန်တုဲ လ္ပာ်ကံၚ်ဇြဳပၞာန်ဂှ်လေဝ် ပကောံကၠုၚ်မၞိဟ် နကဵုသၞောဝ်ယိုက်လျိုၚ်ပၞာန်ဂှ်တုဲ ဝေၚ်ကၠုၚ်ပၞာန် ကုဒပ်ပၠန်ဂတးတံမာန်ရောၚ် သ္ၚဳဂၠိပ်လဝ်ရ။

ဒံက်တာသဳရိမန်ဆာန် ညးမၞုံအခေါၚ်ဟီုဂး ကရောၚ်ပၞာန်ရာမညဂှ်တှ်ေ နကဵုကရောၚ်ပၞာန် ဂွံဝေၚ်ပၞာန်မာန်ဂှ် ဒးဆေၚ်ဒၟံၚ်မုက်ကဵု မကမ်လွဟ်လက်နက် မစှ်ေကဵုဗျူဟာတံ ဗွဲအဓိကရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဟိုတ်နူနဲကွတ်ပညာပရေၚ်ပၞာန် မတောတက်ကၠုၚ်ဂှ်တုဲ ပ္ဍဲအရာဝေၚ်ပရေၚ်ပၞာန် စှ်ေကဵုဗျူဟာဇၞော်ဇၞော်တံဂှ် မကမ်လွဟ်လက်နက် အရပ်စပ်ပၞာန် စှ်ေကဵုဗျူဟာတံဂှ် ဒးကေတ်တွဵုဏောၚ်။ ၚုဟ်ဍေံတံဂှ်လေဝ် က္ဍၚ်ကၠုၚ်ကွေံကွေံဏောၚ်။ ဟိုတ်ဂှ်ရ ဂွံပကောံပ္ကေဝ် လွဟ်ပၞာန်စှ်ေကဵုဗျူဟာတံကဵု မကမ်တံဂှ်တှ်ေ ဒှ်အခက်အခုဲ အဓိကမွဲဂှ် ဟီုဂွံရ” သာ်ဝွံ သ္ဂးရ။

ဖဵုညးမလုပ်စိုပ်ကၠုၚ် လက္ကရဴဏံဂှ်တှ်ေ ပ္ဍဲအရာထ္မံက်ပရေၚ်ပၞာန်၊ ပရေၚ်ဂၠါဲသြန်ဗွဝ် ကေုာံ ပ္ဍဲကဵုဗပေၚ်မကမ်လွဟ်လက်နက်တံဂှ် သွက်ဂွံကၠောန် နကဵုသတိဝဳရိယ နွံနွံဂှ် ကဵုလဝ်ကသပ် ပ္ဍဲလိက်စံၚ်ဂှ် ဂွံဆဵုကေတ်ရ။

ညံၚ်ဒပ်မန်မွဲ ဂွံမံက်ဂတဝ်ကၠုၚ် ကဆံၚ်ပထမဂှ်တှ်ေ သွက်ဂွံထ္မံက်ပရေၚ်ပၞာန်ပံၚ်တောဲတုဲ ဒပ်ရပ်လွဟ်မန်ပန်ဒပ် ဒက်ပ္တန်လဝ် ကရောၚ်ပၞာန်ပံၚ်တောဲရာမညရောၚ် ပ္ဍဲဂိတုဂျာန္နဝါရဳ ၁၉ တ္ၚဲသီအဝဵုကြပ်ပေၚ်ပန်သၞာံဂှ် ပံၚ်တောဲလလောၚ်တြးလဝ်ရ။

ပ္ဍဲကရောၚ်ပၞာန်ပံၚ်တောဲဂှ် ဒပ်ပၞာန်ဗၠးၜးဍုၚ်မန် MLA ၊ ဒပ်ပၞာန်ဗၠးၜးကောန်ဂကူမန် MNLA-AD ၊ ဒပ်စဵုဒၞါဍုၚ်မန် MSDF ကေုာံ ဒပ်ပၠန်ဂတးဍုၚ်မန် MSRF တံ ပါလုပ်ရ။

ကောပ်ကာဲအာကရောၚ်ပၞာန် နကဵုဗီုပြၚ်ကောပ်ကာဲပြုပြေၚ်ပၞာန် အတိုၚ်ဗီုပြၚ်ဒက်ပ္တန်ဂှ်ဏောၚ်တုဲ ဂကောံကောပ်ကာဲကရောၚ်ပၞာန် ကောန်ဂကောံ ၈ တၠ မပါလုပ်ဂှ် က္ဍိုက်အာက္ဍိုပ်ဏောၚ်တုဲ သၟဝ်ဏံဂှ် သ္ကိုပ်ပြုပြေၚ်ပၞာန်တံကဵု သ္ကိုပ်ကရောၚ်ပၞာန်တံ ထ္မံက်အာပရေၚ်ပၞာန်တံဏောၚ် မဒှ်ရ။

ပ္ဍဲကဵုဒပ်မန်ပန်ဒပ်တံ မပလံၚ်ဗစိုပ်နၚ်လၟုဟ်ဂှ် သ္ကိုပ်ဒပ်မၞုံကဵုလမိၚ်လညာတ် ပရေၚ်ပၞာန်၊ မဍိုဟ်ကေက် ပ္ဍဲတိဍာ်တံဂှ် ခါန်ပ္တိုန်အာ နဒဒှ်သ္ကိုပ်ကရောၚ်ပၞာန်ဏောၚ်တုဲ ကုသ္ကိုပ်ပြုပြေၚ်ပၞာန်တံဂှ်လေဝ် ရုဲစှ်ကဵုတာလျိုၚ်တုဲယျဂှ် ဒံက်တာသဳရိမန်ဆာန် သောၚ်ထ္ၜးလဝ်ရ။

NRFF ဂှ်တှ်ေ အကြာဒပ်မန်ပန်ဒပ်တံဂှ် ဂွံပံၚ်တောဲ နကဵုပရေၚ်ဍုၚ်ကွာန်ဂှ် ဟွံဒှ်ဒတုဲဏီပုဟ်ကီုလေဝ် နူကဵုကဆံၚ်ပံၚ်တောဲပရေၚ်ပၞာန်ဗလးတိဂှ် သွက်ဂွံဒက်အာဓဝ်ပတှ်ေမာန်ဂှ် တန်တဴဒၟံၚ်ကဵု အစောံစရာဲဂကောံကောပ်ကာဲကရောၚ်ပၞာန်တံဏောၚ် ထံက်ထ္ၜးလဝ်ရ။

မွဲလ္ပာ်ဂှ်ပၠန် ဂကောံပၠန်ဂတးရပ်လွဟ်တၞဟ်သ္အာၚ် မဖျေံသ္ဇိုၚ်အပ္ဍဲဒေသတံလေဝ် ပါလုပ်ကၠုၚ် ပ္ဍဲကဵုကရောၚ်ပၞာန်ရာမညမာန်ဟာဟီုဂှ် ဒးမၚ်ရံၚ်ထေက်ရောၚ် ထ္မံက်ထ္ၜးလဝ် ပ္ဍဲလိက်စံၚ်ဂှ် ဂွံဆဵုကေတ်ရ။

ဒံက်တာသဳရိမန်ဆာန်ဂှ်တှ်ေ ကရောၚ်ပၞာန်ဂှ် ဟိုတ်နူဒက်လဝ် နကဵုဂကောံရပ်လွဟ်မန်တံ အဓိကတုဲ ဂကောံပၠန်ဂတးတၞဟ်ဟ်တံ ဂွံထပ်ပါလုပ်ကၠုၚ် ပြဟ်ဟ်ဏံဂှ် ဟွံမွဲဏီပုဟ်ဂှ် ဟီုရ။

“ ဒပ်ပၠန်ဂတးဖျေံသ္ဇိုၚ်အပ္ဍဲဒေသ ဒပ်ပၠန်ဂတးမန်ဟွံသေၚ်တံဂှ် ပြဟ်ဟ်ဏံ ဂွံထပ်ပါလုပ်ကၠုၚ်ဂှ် ဟွံမွဲပုဟ်။ ဆ္ဂး တန်တဴကဵုပရေၚ်ပၞာန် မဝေၚ်အာဂှ်တုဲ ကရောံကရောၚ်ပၞာန်ပံၚ်တောဲရာမညပိုယ်တံဂှ် သွက်ဂွံပံၚ်တောဲထ္မံက်အာပရေၚ်ပၞာန် ကုဒပ်မဟာမိတ်တၞဟ်ဟ်တံ ကုဒပ် PDF တံဂှ် စဳဇန်လဝ်ရ” သာ်ဝွံ သ္ဂးရ။

ပရေၚ်ချဳဒရာၚ်ပံၚ်တောဲ ကရောၚ်ပၞာန်ရာမည မွဲကဆံၚ်ပၠန်ဂှ်တှ်ေ ကၠာရာသဳမုဟ်သုန်ဟွံဂွံစိုပ်ဏီ ဒဒှ်ရထ္ပက်အာပၞာန် ကုဗ္ဒိုပ်ဖျေံသ္ဇိုၚ်ကံၚ်ဇြဳပၞာန် ပၟိက်ဇၞော်သွက်ဗျူဟာတံ၊ ကုဒပ်လွဟ်ဇၞော် ကေုာံ ဗ္ဒိုပ်ပ္ကတ်ပ္ကေၚ်ယိုက်ဝန်ပၞာန်တံမာန်ဂှ် NRFF သ္ၚဳဂၠိပ်လဝ်ရ။

မွဲအခိၚ်ဓဝ် ပံၚ်တောဲကဵု မဟာမိတ် ပ္ဍဲဒေသမဆက်စပ် ဒေသကရေၚ်၊ တၞၚ်သဳတံဂှ်တုဲ သၠဲပ္တိုန်တိဍာ်ချဳဒရာၚ်ပရေၚ်ပၞာန် မန်၊ ကရေၚ်၊ တၞၚ်သဳတံတုဲ ဖအောန်ဖျေံကၠုၚ် တိဍာ်ကံၚ်ဇြဳပၞာန် ထိၚ်ဒက်လဝ်တံမာန်ဂှ် သ္ဂးရ။

ဟိုတ်ဂှ်ရ ၜိုတ်ကၞောတ်သၞာံ ၂၀၂၅ ဏံ အပ္ဍဲဒေသမန်ကဵု ဒေသမဆက်စပ်တံဂှ် ချဳဒရာၚ်ပရေၚ်ပၞာန်တံ ဂၠိုၚ်ကၠုၚ်မာန်ရောၚ် ထ္မံက်ထ္ၜးလဝ် ပ္ဍဲလိက်စံၚ်ဂှ်ရ။

ဆ္ဂး အပ္ဍဲသၞာံဏံ ဗၟံက်ရေၚ်ဒဵုဗဂေါကဵု ပွဳဗွိုၚ်တိဍာ်ၜဳသက်တိုၚ်တံဂှ် ယဝ်ထ္မံက်ကၠုၚ်ပေါဲဗ္တိုက်သီဍုၚ်ဇၞော်ဇၞော်တံ ဟွံမာန်ဏီမ္ဂး ပ္ဍဲတွဵုရးဍုၚ်မန် ပေါဲဗ္တိုက်သီဍုၚ် ဂွံဒှ်ကၠုၚ်ဂှ်ကီု၊ ဂွံထိၚ်ဒက်ကၠုၚ်တိဍာ်မာန်ကီုဂှ် တၟံကၠံအောန်ဒၟံၚ်ဏီဏောၚ်ဂှ် သ္ၚဳဂၠိပ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ