ပံၚ်၊ ဖေဖဝ်ဝါရဳ ၇
တွဵုရးဍုၚ်မန် ပွိုၚ်ဍုၚ်ပံၚ် အကြာကွာန် (ဥတ္တံတား) ကဵု ကွာန် (မိုးနိုင်း) လ္တူဂၠံၚ်ကွဳစက်လ္ဂုၚ်−မတ်မလီု သၟဝ်ဒဒန်မွဲဂှ် ဂွံဆဵုကေတ်မာၚ်တၟာဂလိုၚ်တုဲ ညးဒေသ ဟွံအောန်နူ ၂၀ တၠ ဒးဒုၚ်ရပ်လဝ်ရောၚ် ဂၠိုက်ဂၠါဲဂွံတီကေတ် ဇရေၚ်ညးမစုက်လုက်ကဵု ဒပ်ဗၠာဲသၟိၚ်တံရ။
ဒပ်ပံၚ်ကောံကံၚ်ဇြဳပၞာန်ဝွံ စနူဂိတုဖေဖဝ်ဝါရဳ ၃ တေံတုဲဂှ် လုပ်စိုပ်စၟဳတ်လဝ် လ္တူဍုၚ်ပံၚ်၊ ဍုင်ဇိုၚ်ကျာ် ကေုာံ ကွာန်(ဥတ္တံတား) တံဂှ်တုဲ ရပ်ကၠုၚ်လဝ် ညးသၟတ်ဒေသတံ အဆက်က်ရ။
အတိုၚ်ဂလာန် ညးမစုက်လုက်ကဵုဒပ်ဗၠာဲသၟိၚ်တံဂှ်မ္ဂး ပ္ဍဲကဵုညးဒးဒုၚ်ရပ်ဂမၠိုၚ် သၟတ်နူကွာန်( ဥတ္တံတား) ပါလုပ်ဂၠိုၚ်အိုတ်တုဲ ညးဒးဒုၚ်ရပ် ဗွဲမဂၠိုၚ်ဝွံ ဒှ်အာယုက် ၂၀ တံကဵု ဗ္ဒါဲ ၄၀ တံဂှ် ဂွံတီကေတ်ရ။
ရပ်ဒက်စၟဳတ်ဒၟံၚ် ညးဒးဒုၚ်ရပ်ဂမၠိုၚ် ပ္ဍဲကဵုဒၞါဲစၟဳတ် ဒပ်ကံၚ်ဇြဳပၞာန်တံကဵု ဗ္ဒိုပ်ဗၠာဲသၟိၚ်ၝောံဍုၚ်တံဂှ်တုဲ ကဵုဂြောဝ်ဂတာဂှ်လေဝ် ဟွံဂွံအဆက်ပုဟ်ဂှ် သ္ဂးရ။
တုဲကၠုၚ် ဂိတုဖေဖဝ်ဝါရဳ ၃ ပယျာံဂယးဂှ် ပ္ဍဲပွိုၚ်ဍုၚ်ပံၚ် အကြာကွာန် (ဥတ္တံတား) ကဵု ကွာန်(မိုးနိုင်း) သၟဝ်ဒဒန်မွဲဂှ် ဒပ်ကံၚ်ဇြဳပၞာန် ဂၠိုက်ဂၠါဲဂွံဆဵုကေတ် မာၚ်တဲ ၁၂ မ ဇြဟတ်ပလီုသ္ကာတ်ဂှ်တုဲဂှ် သီဏာလဝ်ရ။
ကြဴနူဂိတုဆဵုကေတ်မာၚ် သၟဝ်ဒဒန်တုဲဂှ် ပ္ဍဲဗ္ဒိုပ်ဗၠာဲသၟိၚ်တိဍာ်ဇိုၚ်ကျာ်၊ ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ပံၚ် ဂတမုက်ဗ္ဒိုပ်ဗၠာဲသၟိၚ်တံဏံဂှ် လ္ပာ်ကံၚ်ဇြဳပၞာန် စၟဳတ်ဒၟံၚ် ကြပ်အရိုဟ်ဗ္တံတုဲ ပ္ဍဲအရာပ်လ္ၚဵုတံဂှ်လေဝ် ဟွံကဵုပရိုၚ်မွဲသာ် လုပ်စိုပ်စၟဳတ်ဒၟံၚ်တံ နွံဒၟံၚ်ရ။
အတိုၚ်လိက်ဒုၚ်စဳရေၚ် လၟေၚ်လိက်လ္ဂန်အိန်ဂှ်မ္ဂး ပ္ဍဲတွဵုရးဍုၚ်မန် အပ္ဍဲဂိတုဂျာန္နဝါရဳ ပွိုၚ်မွဲဂိတုဏံ ညးဍုၚ်ကွာန်ကောန်အရာပ် ဟွံအောန်နူ ၈၆ တၠ ဒးဒုၚ်ရပ်လဝ်ရောၚ် လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ ၆ တေံရ။
ပရိုၚ်−သြၚ်လောန်တိုၚ်(မ်)
ဗီု−CJ