ဝါယှေန်တာန်၊ ဖေဖဝ်ဝါရဳ ၆
ဌာနပရေၚ်ဒုၚ်ကာတိုက်လိက် အမေရိကာန် USPS ဒေါအ်ဇူထောံ ပွမဒုၚ်တဲ ကပေါတ်ပါသေဝ် မပလံၚ်နၚ် နူကဵုဍုၚ်ကြုက်ကဵု ဟံၚ်ကံၚ်တံ ဗွဲယာယဳရ။
ပ္ဍဲကဵုပရေၚ်ဒေါအ်ဇူဏံဂှ် လိက် ဟွံပါလုပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဝပ်သာ် USPS ရ။
ကၠာဟွံဂွံထပ်လလောၚ်တြးကၠုၚ် ပရေၚ်ဏံ မွဲဝါပၠန်ဂှ်တှ်ေ ဒဒှ်ရဒေါအ်ဇူအာဂှ် USPS ဟီုလဝ်ကီုလေဝ် ဟိုတ်ဂွံသ္ဂုတ်သွာတ်သာ်ဏံဂှ် ဟွံထ္မံက်ထ္ၜးလဝ်ရ။
ကြဴနူသမ္မတဒဝ်နေဝ်ထြာမ် လလောၚ်တြးကၠုၚ် ထပ်ကံက်ဂလိုၚ်ပ္တိုန်အာ အခေါန်ဖလှာ ၁၀ တၟံကၠံ လ္တူကပေါတ်ဗၞိက်ကြုက် မပလံၚ်ပ္တိုန်ဒၟံၚ် ဇရေၚ်အမေရိကာန်ဂှ်တုဲဂှ် တၚ်သ္ဂုတ်သွာတ်ဏံ မံက်တိတ်ကၠုၚ်ရ။
ကြဴနူအမိၚ်ထြာမ်တိတ်ကၠုၚ်တုဲဂှ် ဗၞိက်လုပ်စိုပ်ကၠုၚ်ဒၟံၚ်ဍုၚ်အမေရိကာန် ၚုဟ်မးမၞုံ ၈၀၀ ဒဝ်ဠာ ဟွံသေၚ်မ္ဂး အောန်နူကဵုဏံ ဂွံမံၚ်အခေါၚ်ဗၠးၜးနူကဵုအကံက်အခေါန်တံဂှ် ကလေၚ်ရုပ်သီလဝ်ရ။
ပၞော်မဟာဒၟံၚ် စပ်ကဵုအကံက်အခေါန်တံဂှ် ညံၚ်ဂွံဒှ်အောန်အိုတ် သွက်ဂွံကၠောန်အာဂှ်လေဝ် ထြာမ် စၞောန်ကၠုၚ်လဝ်ရ။
ကြုက်ဂှ်တှ်ေ ကလေၚ်ပၠန်တဲတုဲ ကံက်အာအခေါန်ဖလှာ လ္တူကပေါတ်ဗၞိက်အမေရိကာန် ၁၅ တၟံကၠံဏောၚ်ဂှ် လလောၚ်တြးလဝ်ရ။
စနူဂိတုဖေဖဝ်ဝါရဳ ၁၀ တုဲ ချးတၟအ် ကေုာံ ဍာ်သၟုဟ်ဓာတ် အမေရိကာန် မပလံၚ်ပတိုန်ဒၟံၚ်တံဂှ် ကြုက်ကံက်အာအခေါန် ၁၅ တၟံကၠံဏောၚ် မဒှ်ရ။
သွက်ကပေါတ်စက် မရပ်စပ်ပ္ဍဲပရေၚ်တဵုလွဳတံကဵု ကၠေၚ်တိတံ၊ သွက်ကွဳစက်အေန်ဂျေန်ဇၞော်ဇၞော်တံဂှ် ကံက်ကပှ်အာအခေါန်ဖလှာ ၁၀ တၟံကၠံဏောၚ်ဂှ် ကြုက် လလောၚ်တြးလဝ်ရ။
အကြာဏံ သမ္မတကြုက် ယှဳကျေန်ဖျေန်ကဵု ထြာမ် ဆဵုဂဗသဳကၠဳအာညးသ္ကအ်ဏောၚ်ဂှ် စၟဳစဂွံရ။
ပ္ဍဲကဵုပါသေဝ် မလုပ်စိုပ်ကၠုၚ် အမေရိကာန်ဂမၠိုၚ် ၜိုတ်ကဝက်ဂှ်တှ်ေ ဒှ်ပါသေဝ် ပလံၚ်နၚ် နူကဵုဍုၚ်ကြုက်ဏောၚ်ဂှ် ထ္မံက်ထ္ၜးလဝ် ပ္ဍဲလိက်စံၚ်မွဲ သၞာံ ၂၀၂၃ တေံရ။
ဟိုတ်နူပါသေဝ် လုပ်စိုပ်ကၠုၚ် နူဍုၚ်သ္အာၚ်တံ ဂၠိုၚ်ဒၟံၚ်ဂှ်တုဲ ဂွံဂၠိုက်ဂၠါဲစၟဳတ် ကပေါတ်ဟွံလုပ်သၞောဝ်တံ ပါ၊ ဟွံပါဂှ် ဝါတ်ဂါတ်ဂှ် သၞာဲဒဴအမေရိကာန်ဂမၠိုၚ် ဟီုလဝ်ရ။
Ref: BBC