သဵု(လ်) ၊ ဖေဖဝ်ဝါရဳ ၇
ဂကောံမၚ်ရံၚ်တၚ်နၚ်မွဲဂကောံ ပ္ဍဲအရာသၟာန်စိုပ်ကၠုၚ် DeepSeek မဒှ်ညာန်ပတောံ ဒြပ်ဍုၚ်ကြုက်ပိုၚ် စပ်ကဵုဗီုပြၚ်ကောပ်ကာဲတၚ်နၚ် ညးမရပ်စပ်တံဂှ်တုဲ ဟိုတ်နူကလေၚ်ခၠေဝ်ကၠုၚ်ဟွံမွဲဂှ်ရ ဒဒှ်ရတာဒၞါလဝ် အခေါၚ်ရပ်စပ်နဲကွတ်ပညာဏံ ပ္ဍဲကဵုကောန်ပျူတာ ပ္ဍဲကမၠောန်တံဂှ် ဌာနဝန်ဇၞော်ကိုဝ်ရဳယျာသၠုၚ်ကျာ ကေုာံ ဒပ်ဗၠာဲသၟိၚ်တံ ဟီုကၠုၚ်လဝ် ပ္ဍဲဂိတုဖေဖဝ်ဝါရဳ ၆ တေံရ။
ပ္ဍဲဂိတုတုဲကၠုၚ်တေံ DeepSeek မဆက်လဝ်မိတ် ရုပ်စက်ဟီုအရေဝ် R1 chatbot ညးတံဂှ် ပတုပ်ဗက် ညာန်ပတောံ ဒြပ်အမေရိကာန်ဂးတုဲ ဒယှ်အာလဝ် အကြာညးဂမၠိုၚ်ရ။
ညံၚ်ရဴဍုၚ်ပြၚ်သေတ်၊ အဳတလဳတံကီု၊ ကိုဝ်ရဳယျာသၠုၚ်ကျာ ပ္တိတ်လဝ်သၟာန် စပ်ကဵုဗီုပြၚ် DeepSeek ရပ်စပ်အာတၚ်နၚ်တံဂှ်တုဲ ချူလိက် အာတ်မိက်ကၠုၚ်လဝ် သွက်ဂွံကဵုသမ္တီ ဗီုပြၚ်ထိၚ်ဒဝ်တၚ်နၚ် ညးမရပ်စပ်ညာန်ပတောံဏံဂှ်ရ။
ဆ္ဂး ဟိုတ်နူ DeepSeek ဟွံကလေၚ်သှ်ကဵုလဝ် တၚ်အာတ်မိက် နူဂကောံမၚ်ရံၚ်တၚ်နၚ် ကိုဝ်ရဳယျာသၠုၚ်ကျာဂှ်တုဲ နူပွမရပ်စပ်နဲကွတ်ပညာညာန်ပတောံဏံဂှ် တၚ်နၚ်ပၟိက်ဇၞော်ဂမၠိုၚ် မံက်ပြးအာမာန်ရောၚ် နကဵုဓဝိၚ်သာ်ဏံဂှ် ဌာနဝန်ဇၞော်ကိုဝ်ရဳယျာသၠုၚ်ကျာ ဒဒှ်ရတာဒၞါလဝ်ဂှ် လလောၚ်တြးလဝ်ရ။
ပံက်လဝ်လာၚ်အေန်တာနိတ်တုဲ ဗွဲတၟေၚ် ပ္ဍဲကဵုကောန်ပျူတာ အရပ်စပ်သွက်ပရေၚ်ပၞာန်တံဂှ် ဒဒှ်ရတာဒၞါထောံ အခေါၚ်ရပ်စပ်နဲကွတ်ပညာတံဂှ် သၞာဲဒဴ ဌာနဝန်ဇၞော်ကာစဵုဒၞါမွဲတၠ ဟီုလဝ်ရ။
ဌာနဝန်ဇၞော်ပရေၚ်သွံရာန်ဗၞိက်ဂှ်တှ်ေ လလောၚ်တြးလဝ် ဒဒှ်ရတာဒၞါ ပွမရပ်စပ်နဲကွတ်ပညာဏံ ဗွဲယာယဳတုဲ ဒပ်ဗၠာဲသၟိၚ်တံဂှ်တှ်ေ ကၟာတ်လဒဵုလဝ် အခေါၚ်ရပ်စပ် DeepSeek ပ္ဍဲကောန်ပျူတာ ပ္ဍဲရုၚ်တံဂှ် လလောၚ်တြးလဝ်ရ။
ဌာနဝန်ဇၞော်ပရေၚ်ဘဏ္ဍာဂှ်တှ်ေ ညံၚ်တၚ်နၚ်ပူဂဵု သၞာဲဒဴညးတံ၊ ညံၚ်တၚ်နၚ်ဓလုက်တံ ဟွံဂွံမံက်အာဂှ် ဖန်ဇန်ရေၚ်တၠုၚ်လဝ်ရောၚ် သ္ဂးရ။
အပ္ဍဲသတ္တာဟတုဲကၠုၚ်တေံ ပ္ဍဲအဳတလဳ ကၠောန်သ္ပဂၠိုက်ဂၠါဲစၟဳတ်လဝ် DeepSeek တုဲ ညံၚ်ရပ်စပ်ကၠုၚ်တၚ်နၚ် ညးမစကာ DeepSeek တံ ဟွံဂွံဂှ် တာဒၞါလဝ်ရ။
အဝ်သတြေလျဂှ်လေဝ် ပ္ဍဲကဵုကောန်ပျူတာအလဵုအသဳညးတံသီုဖအိုတ်ဂှ် ကၟာတ်လဝ် အခေါၚ်ရပ်စပ် DeepSeek ရ။
ကမ္ပဏဳကြုက်တံဝွံ ဟိုတ်နူဒးဒ္ဂေတ်ဗက် အတိုၚ်တၚ်အာတ်မိက် ဗော်ကောန်မျူနေတ်ကြုက်တံဂှ်တုဲ ယဝ်ရပ်စပ်နဲကွတ်ပညာဏံမ္ဂး တၚ်နၚ်ဂမၠိုၚ် စိုပ်အာဇရေၚ်အလဵုအသဳညးတံမာန် ပရေၚ်ဒှ်ဓဝိၚ်သာ်ဏံတံ မံက်တိတ်ကၠုၚ်ဒၟံၚ် ဟွံအောန်ရ။
Ref: AFP