ဝါယှေန်တာန်၊ ဖေဖဝ်ဝါရဳ ၅
သမ္မတအမေရိကာန် ဒဝ်နေဝ်ထြာမ် သွက်ဂွံကၠောန်သြန်ဗွဝ် ပိုန်ဒြပ်ကၟိန်ဍုၚ် သွက်အမေရိကာန်ဂှ် ဂါံကၠုၚ်လဂါံဇိုၚ် ပထမကိုပ်ကၠာအိုတ်တုဲ နကဵုသြန်ဗွဝ်ဏံဂှ် ရာန်ကေတ် Tik Tok မာန်ရောၚ် ဟီုလဝ်ရ။
သြန်ဗွဝ်ဏံဝွံ ခြာဟွံလအ် ပ္ဍဲကဵုသြန်ဗွဝ်ဇၞော်အိုတ်ဂမၠိုၚ်ဂှ် ဒှ်ကၠုၚ်မွဲကီုဏောၚ် သမ္မတထြာမ် ဟီုလဝ်တုဲ အမိၚ်တၟေၚ် မစအာလၟေၚ်ကမၠောန်ချိုန်ခဏဂွံတံဂှ် ထ္ပက်လဝ်စၟတ်တဲ ပ္ဍဲဂိတုဖေဖဝ်ဝါရဳ ၃ တေံရ။
ပ္ဍဲကဵုကၟိန်ဍုၚ် ၉၀ ပြၚ်တံဂှ် သြန်ဗွဝ်ပိုန်ဒြပ်ကၟိန်ဍုၚ် နွံဒၟံၚ်အိုတ်တုဲ ရန်ကဵုတၞောဝ်ဒတောဝ်အနာဂတ်တုဲ ပကောံပကေဝ်လဝ် သြန်ပရဲနူကဵုပရေၚ်ဓလိုက်တမ်ရိုဟ်တံ မဒှ်ရ။ ဆ္ဂး ပြဟ်ဟ်ဏံ အမေရိကာန်ဝွံ ပ္ဍဲကဵုသြန်ဗာတ်ဂျက်ဂှ် သြန်တိတ် ဂၠိုၚ်နူကဵုသြန်လုပ် ဒှ်ဒၟံၚ်ရ။
သမ္မတထြာမ် ၜိုန်ရဟီုဏာလဝ် ကုအ္စာပရိုၚ်ဂမၠိုၚ် ကၠောန်အာသြန်ဗွဝ် ဗွဲမဂၠိုၚ်ဂၠေၚ်ဏောၚ်ကီုလေဝ် သြန်တံဏံ ဂွံနူလဵုရောဟီုဂှ် ဟီုဏာလဝ် သောဲသောဲဗြောဲဗြောဲဂှ် ဟွံမွဲရ။
အပ္ဍဲအခိၚ်စန်ဒက်မာဲတေံ အခိၚ်အစဳဇန် သ္ဂောံကၠောန်သြန်ဗွဝ်ပိုန်ဒြပ်ကၟိန်ဍုၚ် ပထမကိုပ်ကၠာအိုတ် ဒှ်ကၠုၚ်ဂှ် ထြာမ်ဂှ်တှ်ေ သြန်ဗွဝ်ဏံဂှ် ကေတ်အာ နူကဵုအကံက်အခေါန် ကေုာံ နူကဵုပရေၚ်စပ်ကဵု ညာန်ပညာတံဏောၚ်ဂှ် ကေၚ်ဟီုလဝ်ရ။
ညးဝွံ ဒဒှ်ရကံက်ဂလိုၚ်ပ္တိုန်အာအခေါန်ဖလှာ လ္တူဍုၚ်မသွံရာန်ဒၟံၚ်ဗၞိက်ဇၞော်အိုတ် ကုအမေရိကာန် မပ္တံကဵု ကနေဒါ၊ မက္ကသဳကိုဝ် ကေုာံ ကြုက်တံဂှ်ဏောၚ်ဂှ် လလောၚ်တြးလဝ်တုဲ မဒှ်ရ။
ဆ္ဂး အစဳဇန်မကံက်ဂလိုၚ်ပ္တိုန်အာအခေါန်ဖလှာ လ္တူဍုၚ်ကနေဒါ ကေုာံ ဍုၚ်မက္ကသဳကိုဝ်တံဂှ် ပြဟ်ဟ်ဏံ ဒေါအ်လဝ် ပွိုၚ် ၃၀ တ္ၚဲရ။
ဝန်ဇၞော်ပရေၚ်ဘဏ္ဍာအမေရိကာန် သကတ် ဗာတ်သက်ဂှ်တှ်ေ အပ္ဍဲပွိုၚ် ၁၂ ဂိတုဏံ ကၠောန်အာ သြန်ဗွဝ်ဏံဂှ်ဏောၚ်တုဲ သွက်ကောန်ဍုၚ်အမေရိကာန်တံဂှ် ပြဟ်ဟ်ဏံ ကၠောန်အာဂြပ်ကသပ်အလဵုအသဳ မပိုၚ်ပြဳလဝ်တံ ညံၚ်ဂွံဒှ်ကၠုၚ်မသြန်တံဂှ်ဏောၚ်ဂှ် ဟီုလဝ်ရ။
ဍုၚ်သဝ်ဒဳအာရေဗဳယျာ ကေုာံ ဍုၚ်နဝ်ဝေတံလေဝ် သြန်ဗွဝ်သာ်ဏံ နွံဂၠိုၚ်အိုတ်တုဲ သွံတြးသယံဇာတတံတုဲ ကၠောန်ကၠုၚ်လဝ်ရ။
ၜါဍုၚ်ဏံဝွံ ဓလိုက်လဝ်တမ်ရိုဟ် ပ္ဍဲကဵုကိုန်စဳမာန် ကေုာံ ပ္ဍဲကဵုကမ္ပဏဳ ပ္ဍဲကဵုဍုၚ်နာနာ အလုံဂၠးမွဲရ။
နကဵုသြန်ဗွဝ်ပိုန်ဒြပ်ကၟိန်ဍုၚ် အမေရိကာန်ဂှ် ရပ်စပ်အာ ပ္ဍဲအရာသ္ဂောံသိုၚ်ခၞံ စမြိုၚ်သ္ဇိုၚ် မပ္တံကဵုသၞေဟ်က္ၜၚ်ကျာ၊ ဂၠံၚ်တံဏောၚ်ဂှ် ထြာမ် ကၠာတေံ ဟီုလဝ်ကီုလေဝ် ကြဴနူလလောၚ်တြးအမိၚ်တုဲဂှ် သွက်ဂွံရာန် Tik Tok ဂှ်လေဝ် ရပ်စပ်အာမာန်ရောၚ် ထပ်ဟီုကၠုၚ်ရ။
ဟိုတ်နူဒှ်ဓဝိၚ်ကဵုပရေၚ်ဂီုကၠီုတုဲ Tik Tok ကြုက်မပိုၚ်လဝ်ဂှ် ယဝ်ဟွံသွံကဵု ဇရေၚ်ကမ္ပဏဳအမေရိကာန်မွဲမွဲမ္ဂး ဒးဒုၚ်ကၟာတ်ဏောၚ် အလဵုအသဳတုဲကၠုၚ်တေံ ဖျေံစၟတ်လဝ်တုဲဂှ် ပ္ဍဲဂိတုတုဲကၠုၚ်တေံ ပ္ဍဲအမေရိကာန် ကၟာတ်လဝ် ဗွဲယာယဳရ။
ဒဒှ်မကၟာတ်လဒဵုထောံသာ်ဏံဂှ် ရဲညးမရပ်စပ်စကာ Tik Tok တံ ထ္ၜးဆန္ဒ ဒစဵုဒစးတုဲ ဗွဲကြဴဏံ သမ္မတထြာမ် ဂၠါဲသွဟ်ဏောၚ် ဟီုလဝ်တုဲ ကလေၚ်ရုပ်သီထောံလဝ် ပရေၚ်ကၟာတ်လဒဵုဂှ်ရ။
Ref: BBC