ဝါယှေန်တာန်၊ ဖေဖဝ်ဝါရဳ ၈
သမ္မတဒဝ်နေဝ်ထြာမ် စောဲစပ်လဝ် ရုၚ်သၞောဝ်ဓဝ်ရာဇဝတ်ဍုၚ်သ္အာၚ် ICC ဒဒှ်ရသက်သဳခိုၚ်ၚ်ကၠိုက်က်ဟွံမွဲမွဲသာ် ကၠောန်သ္ပကေတ်ဒၟံၚ်အရေဝ် ကုအမေရိကာန် ကေုာံ မဟာမိတ်ညးတံဍုက်ကေဝ်အိုတ် အေဿရဲဂှ်တုဲ ထ္ပက်လဝ်စၟတ်တဲ တၚ်စၞောန်ပၟိၚ်သ္ဂောံကၟာတ်လဒဵုကေတ်အရေဝ်ရ။
ပ္ဍဲအရာ ICC စၟဳတ်ကၠုၚ် ကောန်ဍုၚ်အမေရိကာန် ဟွံသေၚ်မ္ဂး မဟာမိတ်ညးတံဂှ် ညးဒးဒုၚ်ကဵုလျိုၚ်ဂမၠိုၚ် ကေုာံ ဂြောဝ်ဂတာညးတံဂှ် အမေရိကာန် သွက်ဂွံကၟာတ်လဒဵုတာဒၞါ ပရေၚ်ဘဏ္ဍာ ကေုာံ ပရေၚ်ဆေၚ်စပ်ကဵုဝဳဇြာတံဂှ် သမ္မတထြာမ် စၞောန်ပ္ညုၚ်လဝ်ရ။
သ္ကိုပ်ဝန်ဇၞော်အေဿရေ နေတာန်ညာဟု အခိၚ်စိုပ်ဒၟံၚ်ဍုၚ်ဇၞော်ဝါယှေန်တာန်ဂှ် သမ္မတထြာမ် ထ္ပက်လဝ်စၟတ်တဲ တၚ်စၞောန်သာ်ဏံရ။
စပ်ကဵုတၚ်စောဲစပ် ကလိလောန်ဒၟံၚ်ဒုဟ်ရာဇဝတ်ပၞာန် ပ္ဍဲဂါဇြာဂှ်တုဲ သၞာံတုဲကၠုၚ်တေံ ပ္ဍဲဂိတုနဝ်ဝေမ်ဗာဂှ် ICC ပ္တိတ်လဝ်လိက်ဝါရာန်ရပ် ကုသ္ကိုပ်ဝန်ဇၞော် နေတာန်ညာဟုရ။
တၚ်စောဲစပ်တံဏံဂှ် အေဿရေ ကယျာန်ပါဲလဝ်တုဲ ပ္ဍဲကဵုပရေၚ် ICC ပ္တိတ်လဝ်လိက်ဝါရာန်ရပ်ဂှ် သ္ကိုပ်ဒပ် ဂကောံဟာမာသ်မွဲတၠလေဝ် ပါလုပ်ဒၟံၚ်ရ။
နေဝ်တာလာန် မဒှ်ဍုၚ်တၠသ္ၚိ ရုၚ်သၞောဝ်ဓဝ်ဂှ်တှ်ေ ဟိုတ်နူတၚ်စၞောန် သမ္မတထြာမ်သာ်ဏံတုဲ ဒဒှ်ရစိုတ်ဒးလီုဂှ် ဟီုလဝ်ရ။
ပ္ဍဲအရာရုၚ်သၞောဝ်ဓဝ် ပ္တိတ်ကၠုၚ်ဇြဟတ် သ္ဂောံဗ္တိုက်သရိုဟ်တာဒၞါ ပွမကလိဂွံဒၟံၚ်အခေါၚ်ဗၠးနူဒုဟ်ဒဏ်ဂှ်ဝွံ ဒဒှ်ရနွံပၟိက်ဂှ် ဝန်ဇၞော်ကာဍုၚ်သ္အာၚ် နေဝ်တာလာန် ကာဿပါ ချူပ္တိုန်လဝ် ပ္ဍဲမဳဒဳယျာပရေၚ်မၞိဟ်ရ။
ပ္ဍဲကဵုဂလာန်ဗ္စန်သ္ၚိဗု မမံက်တိတ်ကၠုၚ် ပ္ဍဲဂိတုဖေဖဝ်ဝါရဳ ၆ ဂှ် ICC ပ္တိတ်ကၠုၚ်လိက်ဝါရာန် မွဲအခိၚ်ဓဝ်တုဲ ခၞံဗဒှ်ဒၟံၚ် အကြာအေဿရေ ကဵု ဟာမာသ် ညံၚ်ရဴဒ္ဂေတ်ပဋိပတ်တုပ်သၟဟ်ဒၟံၚ်ဂှ်ရောၚ် စောဲစပ်လဝ်ရ။
ပြဝ ICC ဏံဂှ်ဝွံ ဒှ်ပွကဵုပလာပ်ပထုဲ ကုကောန်ဍုၚ်အမေရိကာန်တံ၊ ဒှ်ပွကဵုအန္တရာယ်ဏောၚ်ဂှ် ထြာမ် ဟီုရ။
အမေရိကာန်ဝွံ ဍုၚ်လုပ်ဂကောံ ICC မွဲဟွံသေၚ်တုဲ နူကဵုရုၚ်သၞောဝ်ဓဝ် မပ္တိတ်ကၠုၚ်ဇြဟတ် သ္ဂောံရပ်ဒက် ကောန်ဍုၚ်အမေရိကာန်တံကဵု သၞာဲဒဴအမေရိကာန်တံဂှ်လေဝ် တးပါဲကၠုၚ်လဝ် ဂၠိုၚ်ၚ်ကဵုဝါရ။
ICC ဝွံ သ္ပကၠေံမၛ္ဇဟ် ကုဂကောံမဒစဵုဒစး အေဿရေ ကဵု အဳရာန်တံဂှ်တုဲ ကၠောန်ဒၟံၚ်ညံၚ်ဂွံထိၚ်ဒက် အခေါၚ်အေဿရေ သ္ဂောံစဵုဒၞါတဝ်စၞေဟ်ညးတံဂှ်ဏောၚ်ဂှ် သ္ၚိဗု စောဲစပ်လဝ်ရ။
ထြာမ်ဂှ်တှ်ေ အပ္ဍဲအာယုက်သမ္မတညး အလန်ပထမဏံဂှ်လေဝ် ကေၚ်ကၟာတ်လဒဵုကေတ်ကၠုၚ်လဝ်အရေဝ် လ္တူသၞာဲဒဴ ICC မဂၠိုက်ဂၠါဲစၟဳတ်လဝ် ကောန်ဒပ်အမေရိကာန် မဒှ်သံသယ ဒဒှ်မကလိလောန်လဝ်ဒုဟ်ရာဇဝတ်ပၞာန် ပ္ဍဲအာဖဂါန်နေဿတာန်တေံဂှ်ရ။
Ref: BBC